နာဆာနှင့်အတူ အာကာသယာဉ်မှူးများမွေးထုတ်ပေးမည်ဟု ကြေငြာအပြီး ဗာဂျင်း ရှယ်ယာများဈေးတက်

ဗြိတိန် သူဌေး ရစ်ချက်ဘရန်ဆန် ပိုင် Virgin Galactic သည် အာကာသခရီးစဉ်များအတွက် အာကာသယာဉ်မှူးများ ပေါ်ထွက်လာစေရေး လေ့ကျင့်ပေးရန် NASA နှင့် သဘောတူလက်မှတ်ရေးထိုးခဲ့သည်။

အဆိုပါသဘောတူညီချက်တွင် ကုမ္ပဏီ၏ ပုဂ္ဂလိကပိုင်အာကာသယာဉ်မှူးများ အဆင်သင့်ဖြစ်ရေး စီမံကိန်းပါဝင်ပြီး ဗာဂျင်း ဂလက်တစ်၏ အနာဂတ် အာကာသသို့သွားမည့် ခရီးစဉ်များအတွက် အထောက်အကူပြုလာမည်ဖြစ်သည်။

Virgin Galactic ၏ စီအီးအိုဖြစ်သူ George Whitesides က ၎င်းတို့အနေဖြင့် နာဆာနှင့် ပူးပေါင်းဆောင်ရွက်ရခြင်းအပေါ် စိတ်လှုပ်ရှားနေကြပြီး ယခု အစီအစဉ်တွင် ကိုယ်ပိုင် အာကာသ ပတ်လမ်းအတွင်း လေ့ကျင့်ရရုံသာမက နာဆာနှင့် အခြား အဖွဲ့များကိုပါ လေ့ကျင့်ရေးအစီအစဉ်များ ကမ်းလှမ်းနိုင်မည်ဟု ပြောကြားခဲ့သည်။

Virgin Galactic နှင့် NASA တို့ သဘောတူလက်မှတ် ထိုးပြီးပြီးချင်း တနင်္လာနေ့တွင် ဗာဂျင်းအုပ်စု၏ ရှယ်ယာတန်ဖိုးများ ခုန်တက်လာခဲ့သည်။

Virgin Group ၏ ရှယ်ယာများကို အဓိကပိုင်ဆိုင်ကြသူများမှာ တည်ထောင်သူ Richard Branson နှင့် ဥက္ကဌနေရာတာဝန်ယူထားသူ Chamath Palihapitiya တို့ဖြစ်ကြပြီး NASA အပိုင် Johnson Space Center တွင် လက်မှတ်ရေးထိုးခဲ့ကြောင်း ကြေငြာခဲ့သည်။

Pre-Market Trading သို့မဟုတ် Extended-hours Trading ဟု ခေါ်ဆိုသည့် စတော့ဈေးကွက်ပြင်ပအချိန် ရောင်းဝယ်မှု၌ပင် ဗာဂျင်းဂလက်တစ်ပေါက်ဈေးမှာ ၁၃% ခန့် မြင့်တက်ခဲ့သည်။

သို့သော်လည်း ယခုသဘောတူညီချက်တွင် နာဆာမှ ဗာဂျင်းဂလက်တစ်သို့ ငွေမည်မျှ ပေးချေမည်ဆိုသည်ကို မဖေါ်ပြခဲ့ချေ။

အာကာသခရီးစဉ်များမှာ မကြာမီ အနာဂတ်တွင်မှ ဖြစ်ပေါ်လာမည်ဖြစ်သော်လည်း ဗာဂျင်းကုမ္ပဏီသို့ အာကာသခရီးစဉ် ကြိုတင်လက်မှတ်ဝယ်ယူထားသည့်အရေအတွက်မှာ ၆၀၃ စောင်ခန့်ရှိနေသည်ဟု သိရသည်။

လက်မှတ်အများစုမှာ လူ ၁ ယောက်လျှင် အမေရိကန်ဒေါ်လာ ၂၀၀,၀၀၀ မှ ၂၅၀,၀၀၀ ထိ ပေါက်ဈေးဖြင့် ရောင်းချထားနိုင်ခဲ့သည်။

ကုမ္ပဏီသည် တရားဝင်ဝန်ဆောင်မှုမပြုရသေးမီ နယူးမက္ကစီကိုပြည်နယ်တွင် စမ်းသပ်လေ့ကျင့်ခြင်းများကို ဆောင်ရွက်လျက်ရှိသည်။

NASA မှ အသေးစိတ်အချက်အလက်များကို လာမည့် အပတ်တွင် ထုတ်ပြန်ပေးသွားမည်ဟု နာဆာမှ အုပ်ချုပ်ရေးမှူး Jim Bridenstine က တွစ်တာတွင် ရေးသားခဲ့သည်။

ကူးယူဖေါ်ပြခြင်းခွင့်မပြုပါ။
Orio Economics

Source: CNBC News, Investopedia, Virgin Galactic