travel

အာရှခရီးသွားလာမှု ၂၀၂၃ အကုန်တွင်ပြန်လည်မြင့်တက်မည်ဟု Air Canada ခန့်မှန်း

ကနေဒါ၊ စိန့်လောဟွန့်အခြေစိုက် လေကြောင်းလိုင်း – Air Canada က အာရှပစိဖိတ်ဒေသနှင့် ကနေဒါတို့အကြား လေကြောင်းခရီးစဉ်များသည် ကပ်ဘေးမတိုင်မီအခြေအနေသို့ ပြန်လည်ရောက်ရှိရန် လာမည့် ၂၀၂၃၊ ဒီဇင်ဘာလတွင် ဖြစ်လာနိုင်သည်ဟု ခန့်မှန်းထားကြောင်း ဒေသတွင်းအကြီးအကဲတဦးက စနေနေ့တွင်ပြောကြားခဲ့သည်။

လက်ရှိတွင် ကနေဒါ – အာရှပစိဖိတ်ခရီးစဉ်များမှာ ၂၀၁၉ ခုနှစ်၏ ၃၀% ခန့်မျှသာ ပြေးဆွဲလျက်ရှိပြီး ယခုနှစ်အကုန်တွင်မူ ၂ ဆ ခန့် မြင့်တက်လာရန် မျှော်လင့်ထားသည်ဟု အာရှပစိဖိတ်ဒေသအရောင်းဒါရိုက်တာ Kiyo Weiss က ပြောကြားခဲ့သည်။

လေကြောင်းလိုင်းသည် အာရှ ပစိဖိတ်ဒေသတွင် ပျံသန်းစိုက်ရောက်စရာနေရာသစ်အတွက် လေကြောင်းခရီးစဉ်သစ်များ ထပ်မံထည့်သွင်းရန်လည်း စဉ်းစားနေသည်ဟု ဆိုသည်။
Kiyo Weiss က သူမတို့အနေဖြင့် လာမည့် ၁ လ သို့မဟုတ် အချိန်တိုအတွင်း ခရီးစဉ်အသစ်ချဲ့ထွင်မှုများအတွက် ဆုံးဖြတ်ချက်များချသွားနိုင်မည်ဟု အသေးစိတ်အချက်အလက်များမှလွဲ၍ ဖွင့်ထုတ်ပြောကြားခဲ့သည်။

ကနေဒါ၏ အကြီးဆုံးလေကြောင်းလိုင်းသည် ကပ်ဘေးအတွင်းမှ ပြန်လည်နာလန်ထူလာနေပြီဖြစ်သည့် အရှေ့တောင်အာရှနိုင်ငံများသို့ အထူးအာရုံစိုက်ကာ လေကြောင်းခရီးသွားဝယ်လိုအားလိုအပ်ချက်ကို ဖြည့်ဆည်းနိုင်ရန် ကြိုးစားနေသည်။
ကုမ္ပဏီသည် စနေနေ့က ကနေဒါ၊ မွန်ထဟရယ်မှ တိုကျို၊ နာရိတလေဆိပ်သို့ တိုက်ရိုက်ခရီးစဉ်များကို ပြန်လည် ပြေးဆွဲခဲ့သည်။

ကူးယူဖေါ်ပြခြင်းခွင့်မပြုပါ။
Source: Channel News Asia, Reuters, Corporate Office Headquarters
Image: REUTERS/Carlos Osorio

Qantas ၏ ဆစ်ဒနီ – လန်ဒန် တိုက်ရိုက်လေကြောင်း ၂၀၂၅ တွင် စနိုင်မည်

ဩစတေးလျလေကြောင်းလိုင်း Qantas သည် လာမည့် ၂၀၂၅ ခုနှစ်၌ ဆစ်ဒနီ-လန်ဒန် နှင့် ဆစ်ဒနီ-နယူးယောက် တိုက်ရိုက်ခရီးစဉ်ရှည်များကို ပျံသန်းမည်ဟု ကတိပြုကြေညာခဲ့သည်။
ဩစတေးလျအမျိုးသားလေကြောင်းလိုင်းကြီးသည် ပြင်သစ်-ဒတ်ချ် ထုတ် Airbus A350-1000 ဂျက်လေယာဉ်များကို ဝယ်ယူထားပြီး ကမ္ဘာပေါ်ရှိ မည်သည့်မြို့ကြီးများသို့မဆို တိုက်ရိုက်ပျံသန်းနိုင်မည်ဟု ဆိုသည်။
ဩစတေးလျ ဆစ်ဒနီမှ ဗြိတိန်ရှိ လန်ဒန်သို့ ခရီးစဉ်သည် ၁၉၄၇ က စတင်ခဲ့ပြီး ထိုစဉ်က အချိန် ၅၈ နာရီ ကြာမြင့်ကာ လမ်းတွင်လည်း ၇ ခါ ဆင်း၍ ရပ်နားရသေးသည်။

“The A350 and Project Sunrise” ဟု အမည်ခေါ်ဆိုထားသည့် ယခုအစီအစဉ်က ဩစတေးလျမှ အခြားမြို့ကြီးများသို့ လေယာဉ် ၁ ခါစီးသာ ကွာဝေးစေတော့မည်ဟု အမှုဆောင်ချုပ် Alan Joyce က ထုတ်ပြန်ချက်တွင် ထည့်သွင်းပြောကြားထားသည်။

ကန်းတက်စ် (Qantas) အနေဖြင့် ယခုအစီအစဉ်ကို အကောင်အထည်ဖေါ်နေသည်မှာ ၅ နှစ်ခန့် ကြာမြင့်နေပြီဖြစ်ပြီး ကပ်ဘေးအခြေအနေများကြောင့် နှောင့်နှေးခဲ့ရသည်။
၂၀၁၈ ခုနှစ်က လန်ဒန်နှင့် ဩစတေးလျ ၊ ပါ့သ် မြို့သို့ ၁၇ နာရီကြာသည့် တိုက်ရိုက်ခရီးစဉ်ကို စတင်မိတ်ဆက်ခဲ့ဖူးသည်။
ထို့နောက် ၂၀၁၉ တွင် ဩစတေးလျ အရှေ့ပိုင်းကမ်းရိုးတန်းမှ ဗြိတိန်နှင့် နယူးယောက်သို့ စမ်းသပ်ခရီးစဉ်များ ပြေးဆွဲခဲ့သည်။

လေယာဉ်သစ် အော်ဒါများမှာ ၂၀၂၈ တွင် အပြီးသတ်မည်ဖြစ်သော်လည်း ၂၀၂၅ အမီ လေယာဉ် အသစ် ၁၂ စီး ရောက်ရှိလာမည်ဟု သိရသည်။
လေယာဉ် ၁ စီးသည် ခရီးသည် ၂၃၈ ယောက် စီးနိုင်မည်ဖြစ်ပြီး ယခုကဲ့သို့ အချိန်ကြာမြင့်သည့် ခရီးစဉ်အတွက် ထိုင်ခုံများမှာ ပုံမှန်ထက် ကျယ်ကျယ်လွင့်လွင့်ရှိမည်ဟု ကုမ္ပဏီက ထုတ်ပြန်ထားသည်။

ကူးယူဖေါ်ပြခြင်းခွင့်မပြုပါ။
Source: BBC Business, ABC Australia, Qantas
Image: CNN

ကိုဗစ်စည်းမျဉ်းများရှိနေသော်လည်း ဂျာမဏီ၊ စပိန်နှင့် ပြင်သစ်သို့ ခရီးသွားများပြား

COVID-19 နှင့်ပတ်သက်သော စည်းမျဉ်းများအား ခရီးသည်အားလုံးအပေါ် တင်းကြပ်နေဆဲဖြစ်သော်လည်း ဂျာမဏီ၊ စပိန်နှင့် ပြင်သစ်နိုင်ငံ ၃ နိုင်ငံသို့ ခရီးသည်များ ဆိုက်ရောက်မှုနှင့် ထွက်ခွါမှုများ များပြားလျက်ရှိသည်။
ဥရောပ လေကြောင်းခရီးသွားလုံခြုံရေးအဖွဲ့ – Eurocontrol က ပြီးခဲ့သည့် သီတင်းပတ် ဧပြီ ၂၁ မှ ၂၇ အထိ ရက်များအတွင်း အဆိုပါ ၃ နိုင်ငံတွင် ၁ ရက်လျှင် လေယာဉ်ခရီးစဉ် ၃၅၀၀ ခန့်ရှိသည်ဟု ထုတ်ပြန်ခဲ့သည်။

အထက်ဖေါ်ပြပါ ရက်များအတွင်း ဂျာမဏီတွင် ၁ ရက်လျှင် ပျမ်းမျှ လေကြောင်းမှ ထွက်ခွါသူ၊ ဆိုက်ရောက်သူ အရေအတွက် ၄,၅၉၁ ဦးရှိပြီး ကပ်ဘေးမဖြစ်ပွားခင် ၂၀၁၉ ခုနှစ် ကာလတူ အခြေအနေနှင့် ယှဉ်လျှင် ၂၀% သာ လျော့နည်းလျက်ရှိသည်။
ဂျာမဏီသို့ ခရီးသွားအဝင်အထွက်များနေမှုမှာ ဗြိတိန်၊ အီတလီ၊ ပိုလန် ခရီးသွားများကြောင့်လည်း ပါဝင်သည်ဟု သိရသည်။

စပိန်တွင် အဆိုပါရက်များအတွင်း လေကြောင်းမှ ထွက်ခွါသူ၊ ဆိုက်ရောက်သူ ၁ ရက်လျှင် ပျမ်းမျှ ၄,၄၂၆ ဦး ရှိပြီး ၂၀၁၉ နှင့်ယှဉ်လျှင် ၈% ခန့် သာ လျော့နည်းတော့သည်ဟု Eurocontrol က ထုတ်ပြန်ခဲ့သည်။

အလားတူပင် ပြင်သစ်နိုင်ငံ၌လည်း ပျမ်းမျှ ခရီးသွားသူ အရေအတွက် ၃,၈၇၅ ဦး ရှိနေပြီး ဂျာမဏီနှင့် ဂရိ အဝင်အထွက်များကြောင့် ဖြစ်သည်ဟု ဆိုသည်။

လက်ရှိတွင် ဂျာမဏီသည် အသက် ၁၂ နှစ် နှင့် အထက်အား ကိုဗစ်ကာကွယ်ဆေးထိုးရန် သတ်မှတ်ထားပြီး လေဆိပ်ရောက်ရှိချိန်တွင် စာရွက်စာတမ်းများ ပြသရမည်ဖြစ်သည်။
စပိန်သည်လည်း ဥရောပ/Schengen ဧရိယာရှိ ခရီးသွားအားလုံးကို ကာကွယ်ဆေးထိုးနှံပြီးကြောင်း၊ ပြန်လည်ပျောက်ကင်းမှုနှင့် စမ်းသပ်ပြီး စာရွက်စာတမ်းများကို ဂျာမဏီကဲ့သို့ပင် စစ်ဆေးလျက်ရှိသည်။
ပြင်သစ်ကျန်းမာရေးဝန်ကြီးဌာနက လူပုဂ္ဂိုလ်အားလုံးသည် ကာကွယ်ဆေးထိုးပြီး သို့မဟုတ် ကူးစက်ခံရလျှင်လည်း ပြန်လည်ပျောက်ကင်းထားပြီးဖြစ်ရမည်ဟု ကြေညာထားသည်။

ကူးယူဖေါ်ပြခြင်းခွင့်မပြုပါ။
Source: Schengen Visa Info
Image: JoshuaWoroniecki | Pixabay

ရုရှားနှင့်ဘီလာရုစ်ရှိလုပ်ငန်းများကို Airbnb ရပ်ဆိုင်း

အိမ်ခန်းအငှားကုမ္ပဏီကြီး Airbnb က ရုရှားနှင့် ဘီလာရုစ်ရှိ ၎င်း၏လုပ်ငန်းများအားလုံးကို ရပ်ဆိုင်းကြောင်း ပြီးခဲ့သည့်တနင်္လာနေ့က ကြေညာခဲ့သည်။

“ရုရှား သို့မဟုတ် ဘီလာရုစ်တွင် ယာယီနေထိုင်ရေးအတွက် ခရီးသွားဧည့်သည်များက အိမ်ခန်းအငှားရှာဖွေမှုများ၊ တည်းခိုရန်ကြိုတင်စာရင်းသွားခြင်းများ လုပ်ဆောင်နိုင်တော့မည်မဟုတ်” ဟု ကုမ္ပဏီ၏ ထုတ်ပြန်ချက်တွင်ဖော်ပြထားသည်။ ကြိုတင် booking များကိုလည်း ဧပြီလ ၄ ရက်နေ့မှစတင်၍ ပယ်ဖျက်လိုက်ပြီဟုလည်းပါရှိသည်။

မတ်လ ၄ ရက်နေ့တွင် Airbnb ၏ CEO ဖြစ်သူ Brian Chesky ကလုပ်ငန်းများရပ်ဆိုင်းမည့် အစီအစဉ်ကို Twitter ပေါ်မှတဆင့် ကြေညာခဲ့ပြီးဖြစ်သည်။

ရုရှားအပေါ် အနောက်နိုင်ငံများ၏ အရေးယူပိတ်ဆို့မှု စီးပွားရေးဆန်ရှင်များကြောင့် ကုမ္ပဏီဖက်က ငွေလွှဲခြင်း၊ ငွေပေးချေခြင်းများနှင့် ပတ်သက်၍ ရုရှားနှင့်ဘီလာရုစ်ရှိ ဘဏ္ဍာရေးအဖွဲ့အစည်းများနှင့် ပူးပေါင်းဆောင်ရွက်ရန် မဖြစ်နိုင်တော့ကြောင်း ယခင်ကတည်းက ထုတ်ပြောခဲ့ဖူးသေးသည်။

ကူးယူဖော်ပြခြင်းခွင့်မပြုပါ။
Source: Reuters
Photo: Reuters

ခရီးသွားကဏ္ဍပြန်ဖွင့်ချိန် ဖိလစ်ပိုင်လေကြောင်း ခရီးစဉ် ၁,၅၀၀ ထပ်မံတိုးချဲ့မည်

ဖိလစ်ပိုင်အစိုးရ၏ ကိုဗစ်-၁၉ ဆိုင်ရာကန့်သတ်ချက်များကို ရပ်တန့်ပေးပြီးနောက် နိုင်ငံတကာခရီးသွားလာရေးကဏ္ဍများကို ပြန်လည်ဖွင့်လှစ်ပေးချိန်တွင် Philippine Airlines က ယခုလအတွင်း ပြည်တွင်းပြည်ပခရီးစဉ်များကို ၅၂% တိုးချဲ့သွားမည်ဖြစ်သည်။
လေကြောင်းလိုင်းသည် နိုင်ငံတကာနှင့် ပြည်တွင်းခရီးစဉ် စုစုပေါင်း ၁,၅၀၀ ကျော်ကို တိုးမြှင့်သွားမည်ဟု ကြေညာခဲ့သည်။

လေကြောင်းလိုင်းသည် ပြီးခဲ့သည့် ဒီဇင်ဘာလက ဒေဝါလီခံရခြင်းမှကာကွယ်နိုင်ရန် အကြွေး ဒေါ်လာ ၂ ဘီလျံအား ပယ်ဖျက်နိုင်ရန် ဘဏ္ဍာရေးပြင်ဆင်ချက် – Debt Restructuring အစီအစဉ်ကို အမေရိကန်တရားရုံးသို့ တင်သွင်းလျှောက်ထားခဲ့ပြီး တရားရုံးကခွင့်ပြုခဲ့သည်။
အဆိုပါဆောင်ရွက်ချက်မှာ ကပ်ဘေးအတွင်း စီးပွားရေးအကြီးအကျယ်ထိခိုက်ခဲ့သော လေကြောင်းလိုင်းကုမ္ပဏီကြီးများ ပြုလုပ်ခဲ့ရသည့် ပေးရန် အကြွေးများကို ကုမ္ပဏီ၏ ပိုင်ဆိုင်မှုအတွင်းသို့ ပြောင်းလဲရေးသွင်းသည့် Debt Restructuring Plan များလည်း ဖြစ်သည်။

Philippine Airlines (PAL) အနေဖြင့် ရရှိလာသော အခွင့်အရေးအား နိုင်ငံအတွင်း နိုင်ငံတကာခရီးသွားများလာရောက်မှုကို မြှင့်တင်ရန်၊ ဖိလစ်ပီနိုလူမျိုးများ၏ နိုင်ငံခြားခရီးစဉ်ဝယ်လိုအားမြင့်တက်လာမှုကို ဝန်ဆောင်မှုပေးရန်၊ နိုင်ငံ့စီးပွားရေးနာလန်ထူစဉ်တွင် တုံ့ပြန်ဆောင်ရွက်ရန် စသည်တို့အားအသုံးချခြင်းဖြစ်ကြောင်း လေကြောင်းလိုင်း၏ ဥက္ကဌနှင့် COO ဖြစ်သူ Stanley Ng က ပြောကြားခဲ့သည်။
လေကြောင်းလိုင်း၏ တိုးမြှင့်မည့် ခရီးစဉ်များထဲတွင် မြောက်အမေရိက၊ အရှေ့တောင်အာရှ၊ ဂျပန်နှင့် အရှေ့အလယ်ပိုင်းဒေသများ ပါဝင်လျက်ရှိသည်။

ကူးယူဖေါ်ပြခြင်းခွင့်မပြုပါ။
Source: Asia Nikkei, Forbes, Manila Times, Bilyonaryo
Image: Aviation Week

Qatar Airways ၏ လေယာဉ်အမြောက်အများမှာယူမှုကို Boeing ရရှိ

တနင်္လာနေ့က အမေရိကန်အိမ်ဖြူတော်တွင်ပြုလုပ်သည့်အခမ်းအနားတွင် ကာတာလေကြောင်း (Qatar Airways) ထံမှ လေယာဉ်အော်ဒါမှာယူမှုကြီးကြီးမားမားကို အမေရိကန်လေယာဉ်ထုတ်လုပ်သူ ဘိုးရင်း (Boeing) က ရရှိခဲ့သည်။
အော်ဒါမှာယူမှုတန်ဖိုးသည် ဒေါ်လာ ၃၄ ဘီလျံဖိုးရှိသည်ဟု ဘိုးရင်းက ကြေညာအပြီးတွင် ရှယ်ယာတန်ဖိုးများလည်း ၅.၁% မြင့်တက်ခဲ့ပြီး ရှယ်ယာ ၁ စုလျှင် ၂၀၀.၂၄ ဒေါ်လာသို့ရောက်ရှိခဲ့သည်။
အဆိုပါပွဲတွင် ကာတာလေကြောင်း၏ အမှုဆောင်ချုပ် အက္ကဘာ အယ် ဘေကာ (Akbar Al Baker) က ဘိုးရင်း 737 Max 10 မော်ဒယ် ၂၅ စီး ကနဦးဝယ်ယူမည်ဆိုသည်ကို လက်မှတ်ရေးထိုးခဲ့ပြီး စာချုပ်တွင် နောက်ထပ် ၂၅ စီး ထပ်မံဝယ်ယူခွင့်လည်း ပါရှိခဲ့သည်။
737 Max 10 အမျိုးအစားများသည် 737 Max အုပ်စုတွင် အကြီးဆုံး လေယာဉ်များဖြစ်ပြီး ယခုကဲ့သို့ အမြောက်အများမှာယူမှုများအတွက် လေကြောင်းလိုင်းများက လျှော့ဈေးများဖြင့် ရရှိလေ့ရှိကြသော်လည်း တန်ဖိုးမှာ များပြားနေဆဲဖြစ်ခဲ့သည်။

ဘိုးရင်းကုမ္ပဏီသည် ၎င်းတို့၏ ကုန်စည်သယ်ဆောင်သည့် လေယာဉ်အမျိုးအစား 777X ဂျက်လေယာဉ်ကြီးများအား တရားဝင်မိတ်ဆက်နိုင်ရန်လည်း ပြင်ဆင်လျက်ရှိသည်။
ကာတာလေကြောင်းကပင် အဆိုပါကုန်စည်သယ်လေယာဉ် 777X ဂျက်လေယာဉ်ကြီး ၃၄ စီး ဝယ်ယူရန် လက်မှတ်ရေးထိုးခဲ့ပြီးဖြစ်သည်။
777X များသည် General Electric မှ ထုတ်လုပ်သော လေယာဉ်အင်ဂျင်များကို ၂ လုံးတပ်ဆင်၍ အသုံးပြုထားသည်။
ဘိုးရင်းသည် အဆိုပါ မော်ဒယ်များကို ခရီးသည်တင်လေယာဉ်များအဖြစ် ရောင်းချနိုင်ရန်လည်း စမ်းသပ်နေပြီး လာမည့် ၂၀၂၃ တွင် ခရီးသည်တင်ယာဉ်များအဖြစ် စတင်တာဝန်ထမ်းဆောင်နိုင်မည်ဟု ခန့်မှန်းထားသည်။

ပြီးခဲ့သည့်သီတင်းပတ်အတွင်းက လေကြောင်းမှကုန်စည်သယ်ယူမှုများသည် ကပ်ဘေးမဖြစ်ခင် အနေအထားထက်ပင် ၇% ပိုမိုတိုးတက်လာသည်ဟု ဘိုးရင်းက ကြေညာထားသည်။
ယခု ကုန်စည်သယ်ဆောင်မည့်လေယာဉ်အသစ်များသည် ကာဗွန်ထုတ်လုပ်မှုလည်း ၂၅% လျှော့ချနိုင်မည်ဟု ကုမ္ပဏီက ဆိုသည်။

ဘိုးရင်း၏ပြိုင်ဘက် ဥရောပ၏ Airbus လေယာဉ်ထုတ်လုပ်ရေးကလည်း ကုန်စည်သယ်ဆောင်မည့် ကိုယ်ထည်ကြီးမားသော A350 မော်ဒယ်အား ပြီးခဲ့သည့်နှစ်ကတည်းက မိတ်ဆက်လာနေခဲ့သည်ဟု ထုတ်ပြန်ထားသည်။
ယခုကဲ့သို့ ဘိုးရင်းနှင့် ကာတာလေကြောင်းတို့ အရောင်းအဝယ်မှာ ပြီးခဲ့သည့် သီတင်း ၂ ပတ်အတွင်း Airbus က ကာတာလေကြောင်းနှင့် A321neo အမျိုးအစားလေယာဉ် အစီး ၅၀ စာချုပ်အား ဖျက်သိမ်းကြောင်းကြေညာအပြီး ထွက်ပေါ်လာခြင်းဖြစ်သည်။

ကူးယူဖေါ်ပြခြင်းခွင့်မပြုပါ။
Source: CNBC Business, SupplyChainBrain
Image: UPI

အိုမီခရွန်ကြောင့် ခရီးစဉ်အချို့ကို ရပ်ဆိုင်းလိုက်ရသည့် Royal Caribbean သင်္ဘောလိုင်း

အပျော်စီး ခရီးသွား သင်္ဘောလိုင်းကြီးဖြစ်သည့် Royal Caribbean သင်္ဘောလိုင်းကြီးသည် ကမ္ဘာတစ်ဝှမ်း မြင့်တက်လာသော အိုမီခရွန် ကူးစက်မှုများကြောင့် လက်ရှိပြေးဆွဲနေသည့် ခရီးစဉ် အချို့ကို ယာယီရပ်နားလိုက်ကြောင်း ထုတ်ပြန်ခဲ့သည်။

လက်ရှိတွင် ခရီးစဉ် ရပ်နားလိုက်သည့် သင်္ဘောများမှာ Serenade of the Seas, Jewel of the Seas နှင့် Symphony of the Seas အမည်ရှိ သင်္ဘောကြီး (၃) စီးဖြစ်ပြီး အခြား သင်္ဘောတစ်စီးဖြစ်သည့် Vision of the Seas သင်္ဘောကြီးမှာမူ မူလစတင်ပြေးဆွဲမည့် ရက်အစား မတ်လ ၇ ရက်သို့ ရွေ့ဆိုင်းလိုက်ကြောင်း သိရသည်။

ကုမ္ပဏီ၏ ထုတ်ပြန်ချက်တွင် ဧည့်သည်များ ကာလကြာ စောင့်ဆိုင်းခဲ့ရသည့် ခရီးစဉ်များကို ယခုကဲ့သို့ ရပ်ဆိုင်းလိုက်ရသည့်အတွက် အလွန်အားနာမိကြောင်းနှင့် ယခုကဲ့သို့ ခက်ခဲသည့် ကာလမှာပင် မိမိတို့ သင်္ဘောလိုင်းကို အားပေးကြသည့်အတွက် အလွန်ကျေးဇူးတင် ဝမ်းမြောက်ပါကြောင်း ရေးသားခဲ့သည်။

Royal Caribbean သင်္ဘောလိုင်းသည် ပြီးခဲ့သည့် ဇန်နဝါရီ ၆ရက်နေ့ကလည်း ၎င်းတို့ပိုင် Spectrum of the Sea သင်္ဘောခရီးစဉ်တွင် ပါဝင်ခဲ့သူ ခရီးသည် ကိုးဦးသည် ဟောင်ကောင် အိုမီခရွန် လူနာနှင့် ထိတွေ့ခဲ့သောကြောင့် အရေးပေါ် ရပ်နားမှု ပြုလုပ်ခဲ့ရ ပါသေးသည်။

အဆိုပါ ခရီးသည် ကိုးဦးကို ကနဦး စစ်ဆေးမှုများ ပြလုပ်ပြီးနောက် negative ထွက်ခဲ့သော်လည်း ခရီးစဉ်ကို ဆက်လက်ထွက်ခွာခြင်း မပြုရန် ဆုံးဖြတ်ခဲ့ပြီး ကျန်ခရီးသည်များနှင့် သင်္ဘောဝန်ထမ်းများ အားလုံးကိုလည်း ဇန်နဝါရီ ၈ရက်နေ့တွင် ကိုဗစ် စစ်ဆေးမှုများ ပြုလုပ်ခဲ့သည်ဟု သိရသည်။

Royal Caribbean ကဲ့သို့ပင် အခြား အမေရိကန် အခြေစိုက် အပျော်စီး သင်္ဘောလိုင်းဖြစ်သည့် Norwegian Cruise Line သည်လည်း သင်္ဘောခရီးစဉ် ရှစ်ခုကို ရပ်နားခဲ့ရပြီး ခရီးသည်များ၊ သင်္ဘောဝန်ထမ်းများနှင့် သင်္ဘောရပ်နားရာ ဒေသများ၏ ကျန်းမာရေးသည် အဓိက ဦးစားပေး ဖြစ်ကြောင်း ကုမ္ပဏီ၏ ကြေငြာချက်တွင် ပါရှိသည်။

ထိုကဲ့သို့ အပျော်စီး သင်္ဘောလိုင်းကြီးများ သင်္ဘောခရီးစဉ်အချို့ ဖျက်သိမ်းလိုက်သော်လည်း ဆက်လက်ပြေးဆွဲနေသေးသည့် သင်္ဘောခရီးစဉ်များလည်း ရှိနေသေးပြီး အမေရိကန် ကူးစက်ရောဂါ တာဆီးကာကွယ်ရေးဌာနကတော့ ပြည်သူများအနေဖြင့် အပျော်စီးခရီးစဉ်များ ရှောင်ကြဉ်သင့်ကြောင်း သတိပေးချက် ထုတ်ပြန်ထားသည်။

ကူးယူဖော်ပြခွင့်မပြုပါ။
Source: Reuters, USA Today
Photo: Reuters

ဘိုးရင်း 737 MAX လေယာဉ်များအားပိတ်ပင်ထားမှုကို အင်ဒို ပယ်ဖျက်

အရှေ့တောင်အာရှ၏အကြီးဆုံးစီးပွားရေးနိုင်ငံ အင်ဒိုနီးရှားသည် Boeing 737 MAX မော်ဒယ်များအား ပျံသန်းခွင့်ပိတ်ပင်ထားခြင်းကို ပယ်ဖျက်လိုက်ကြောင်းကြေညာလိုက်သည်။
တနင်္လာနေ့က အီသီသိုးပီးယားလေကြောင်းလိုင်းက ဘိုးရင်း 737 MAX များဖြင့် ပြန်လည် ပျံသန်းတော့မည်ဟု ကြေညာအပြီးတွင် အင်ဒိုနီးရှားကလည်း ယခုကဲ့သို့ ကြေညာလိုက်ခြင်းဖြစ်သည်။
လက်ရှိအချိန်တွင် ဘိုးရင်း 737 MAX များကို ပြန်လည်ခွင့်ပြုသည့် နိုင်ငံပေါင်း ၁၈၀ အထိ ရှိလာပြီဖြစ်သည်။

အင်ဒိုနီးရှားပို့ဆောင်ရေးဝန်ကြီးဌာန၏ ကြေညာချက်အရ ပြန်လည်ပျံသန်းခွင့်ပြုသည့် ညွှန်ကြားချက်သည် ချက်ချင်းသက်ရောက်မည်ဖြစ်သည်ဟု သိရသည်။
ဘိုးရင်း ၇၃၇ မော်ဒယ်များ မပျံသန်းမီ စစ်ဆေးခြင်းနှင့် အစိုးရအာဏာပိုင်အဖွဲ့များက ထပ်မံစစ်ဆေးခြင်းများလည်း ပြုလုပ်သွားမည်ဟု ဆိုသည်။

737 MAX များအား မတားမြစ်မီက အင်ဒိုဘတ်ဂျက်လေကြေင်းလိုင်းကြီးဖြစ်သော Lion Air လေကြောင်းသည် အဆိုပါ မော်ဒယ်အမျိုးအစား လေယာဉ်ပေါင်း ၁၀ စီးကို အသုံးပြုခဲ့သည်။
အင်ဒိုနီးရှားအစိုးရပိုင် Garuda လေကြောင်းကမူ ကြွေးမြီနှင့်ပတ်သက်၍ ပြန်လည်ပြင်ဆင်မှုများပြုလုပ်နေသဖြင့် ဘိုးရင်း ၇၃၇ များကို ပြန်လည်တင်သွင်းရန် အစီအစဉ်မရှိချေ။

Boeing 737 MAX များသည် ၃ နှစ်ခန့် ရပ်နားနေရပြီးနောက် ပြန်လည်ပြင်ဆင်မှုများပြုလုပ်ပြီး ခရီးသည်များရှေ့သို့ ပြန်လည်ရောက်ရှိတော့မည်ဖြစ်သည်။

ကူးယူဖေါ်ပြခြင်းခွင့်မပြုပါ။
Source: BBC Business, The Globe and Mail
Image: Skift

Ethiopian Airlines က ဘိုးရင်း 737 MAX များအသုံးပြု၍ ဖေဖေါ်ဝါရီတွင်ပြန်လည်ပျံသန်းမည်

အီသီယိုးပီးယားအစိုးရပိုင်လေကြောင်းလိုင်းဖြစ်သော Ethiopian Airlines က Boeing 737 MAX လေယာဉ်ကြီးများ၏ စိတ်ချရမှုအခြေအနေကို ကျေနပ်မှုရှိသည်ဟုပြောကြားပြီးနောက် အဆိုပါလေယာဉ်များကို အသုံးပြု၍ လာမည့် ၂၀၂၂ ဖေဖေါ်ဝါရီတွင် ပြန်လည်ပျံသန်းမှု စတင်တော့မည်ဟု ကြေညာခဲ့သည်။
ဘိုးရင်း 737 MAX လေယာဉ်များသည် ၂၀၁၉ ခုနှစ်တွင် ဖြစ်ပွားခဲ့သော လူအများအပြားသေစေခဲ့သည့် ပျက်ကျမှု ၂ ခု အပြီး နိုင်ငံအများအပြားက အသုံးပြုခွင့်မပေးသောကြောင့် ရပ်နားခဲ့ရသည်။
ထို့နောက် အမေရိကန်ပြည်ထောင်စုလေကြောင်းစီမံအုပ်ချုပ်ရေး – FAA ထံ ခွင့်ပြုချက်တောင်းခံကာ စစ်ဆေးမှုနှင့် ပြင်ဆင်မှုများ အကြိမ်ကြိမ်ပြုလုပ်ပြီးနောက် ပျံသန်းရန်ပြန်လည်ခွင့်ပြုချက် ရရှိခဲ့သည်။
ယခုအခါတွင် Boeing 737 MAX အား ပြန်လည်ခွင့်ပြုသည့် နိုင်ငံများထဲတွင် တရုတ်၊ ဩစတေးလျ၊ ဘရာဇီး၊ ကနေဒါ၊ ဥရောပ၊ အင်ဒိုနီးရှား၊ ဂျပန်၊ စင်ကာပူနှင့် အာရပ်စော်ဘွားပြည်ထောင်စုတို့ ပါဝင်လာပြီဖြစ်သည်။

လေကြောင်းလိုင်း၏ အမှုဆောင်အရာရှိချုပ်ဖြစ်သူ Tewolde Gebremariam က “ဘေးကင်းလုံခြုံမှုဟာ ကျွန်တော်တို့ရဲ့ အလေးအထားဆုံးအရာပဲဖြစ်ပါတယ်။ ဒါကပဲ ကျွန်တော်တို့ ဆုံးဖြတ်ချက်တွေ၊ ဆောင်ရွက်ချက်တွေ ချမှတ်ရာမှာ လမ်းပြပေးတာပါ” ဟု ကုမ္ပဏီ၏ ထုတ်ပြန်ချက်တွင် ရေးသားဖေါ်ပြခဲ့သည်။

ကုမ္ပဏီသည် ဘိုးရင်းလေယာဉ်၏ ဒီဇိုင်းပိုင်းတိုးတက်မှုများ၊ ပြန်လည်စစ်ဆေးမှုများကို လေယာဉ်မှူး၊ အင်ဂျင်နီယာ၊ လေကြောင်းနည်းပညာရှင်များနှင့် လ ၂၀ ကျော်ကြား စစ်ဆေးမှုပြုလုပ်ခဲ့သည်ဟု ဆိုပြီး လေယာဉ်မောင်မယ်များသည်လည်း ဘေးအန္တရာယ်ကင်းရှင်းရေးနှင့်ပတ်သက်၍ ယုံကြည်မှု ရှိနေသည်ဟု ထုတ်ပြန်ထားသည်။

ကူးယူဖေါ်ပြခြင်းခွင့်မပြုပါ။
Source: NBC News, Reuters, Ethiopian Airlines
Image: NBC

ကမ္ဘာ့ပထမဆုံး ဘတ်စ်-ရထား ဂျပန်တွင်စတင်ပြေးဆွဲ

DMV (dual-mode vehicle) ဟုခေါ်သည့် ဘတ်စ်ကား-ရထား ယာဉ်ပုံစံနှစ်မျိုးပြောင်းမောင်းနှင်နိုင်သော ကမ္ဘာ့ပထမဆုံး DMV ကိုဂျပန်နိုင်ငံ တိုကူရှီးမားမြို့တွင် ပထမဆုံးစတင်ပြေးဆွဲခဲ့သည်။

ဘတ်စ်ကားပုံစံတည်ဆောက်ထားသည့် ယင်းDMV မှာပုံမှန်ကားလမ်းပေါ်တွင် မောင်းနှင်နိုင်ပြီး ရထားလမ်းသို့ရောက်ရှိချိန်တွင် ယာဉ်၏အောက်ခြေမှ ရထားသံလမ်းပေါ်မောင်းနှင်နိုင်သည့် စတီးဘီးများထွက်ပေါ်လာကာ သံလမ်းပေါ်တွင် ရထားကဲ့သို့ကောင်းမွန်စွာ ဆက်လက်မောင်းနှင်နိုင်မည်ဖြစ်သည်။

ဘတ်စ်-ရထား စတင်ပြေးဆွဲသည့် Asa Coast Railway ကုမ္ပဏီ၏ CEO က ယင်းယာဉ်ငယ်မှာ သက်ကြီးရွယ်အိုများပြားပြီး လူဦးရေကျဆင်း၍ သယ်ယူပို့ဆောင်ရေးကုမ္ပဏီများက အမြတ်ဝင်ငွေ ရရှိရန်ခက်ခဲနေသည့် Kaiyo ကဲ့သို့မြို့ငယ်များအတွက် ထိရောက်စွာ ကူညီပေးနိုင်လိမ့်မည်ဟုဆိုသည်။

ဘတ်စ်-ရထားသည် ခရီးသည် ၂၁ ဦးလိုက်ပါနိုင်ပြီး ရထားသံလမ်းပေါ်တွင် တနာရီလျှင် ၆၀ ကီလိုမီတာမောင်နှင်နိုင်ပြီး ကားလမ်းပေါ်တွင် ကီလိုမီတာ ၁၀၀ အထိ မောင်းနှင်နိုင်ကြောင်း Asa Coast Railway ကဆိုသည်။ ဒီဇယ်လောင်စာဖြင့် မောင်းနှင်သည့် DMV ကို ဂျပန်နိုင်ငံတောင်ဖက် Shikoku ကမ်းရိုးတန်းမှ အခြားအထင်ကရဆိပ်ကမ်းမြို့ငယ်များစွာသို့ ဆက်သွယ်ထားသည်။ ဘတ်စ်-ရထားအား ဂျပန်သို့လာရောက်လည်ပတ်ရာတွင် ရထားဖြင့်သွားရောက်ခရီးထွက်လိုသူများအတွက်လည်း ဆွဲဆောင်မှုတခုဖြစ်လာလိမ့်မည်ဟု မျှော်လင့်ထားကြောင်း CEO ဖြစ်သူ Shigeki Miura ကဆိုသည်။

ကူးယူဖော်ပြခြင်းခွင့်မပြုပါ။
Source: CNN Business
Photo: G