oil and gas

ဆော်ဒီရေနံကုမ္ပဏီကြီး ဒုတိယ ၃ လပတ်တွင် စံချိန်တင်အမြတ်ရ

ဆော်ဒီအားရေးဘီးယားအစိုးရပိုင် ရေနံကုမ္ပဏီ Saudi Aramco သည် ၂၀၂၂ ဒုတိယ ၃ လပတ်တွင် စံချိန်တင်အမြတ်ငွေအဖြစ် ဒေါ်လာ ၄၈.၄ ဘီလျံရရှိခဲ့သည်။
အဆိုပါပမာဏမှာ ယခင်နှစ် ကာလတူအခြေအနေထက် အမြတ်ငွေ ၉၀% ခုန်တက်ခဲ့ခြင်းဖြစ်သည်။

ကုမ္ပဏီသည် ကပ်ဘေးကြောင့် ကမ္ဘာတဝှမ်းစွမ်းအင်ပိုမိုလိုအပ်လာမှုနှင့် ယူကရိန်းပေါ်ရုရှား၏ ထိုးစစ်ဆင်နွှဲခြင်းတို့ကြောင့် လောင်စာဆီ ပို့ဆောင်ရေးအခက်အခဲများ၊ ပြတ်လပ်မှုများ၊ ဈေးနှုန်းမြင့်မားမှုများအကြား အကျိုးအမြတ်ဖြစ်ထွန်းခဲ့သည်။
ပြီးခဲ့သည့် ဖေဖေါ်ဝါရီနှောင်းပိုင်းမှ ဇွန်လအထိ ရေနံစိမ်းဈေးများသည် ၃၆% ကျော် မြင့်တက်လာခဲ့ပြီး ရေနံစိမ်း ၁ စည်လျှင် ဒေါ်လာ ၁၂၀ အထိ ပေါက်ဈေးရှိခဲ့သည်။

ဆော်ဒီအာရမ်ကို (Saudi Aramco) သာ စံချိန်တင်အမြတ်ရသည်မဟုတ်ပဲ အခြား စွမ်းအင်ကုမ္ပဏီကြီးများဖြစ်သည့် Exxon Mobil, Chevron, Shell, BP နှင့် Total Energies တို့သည်လည်း စံချိန်တင် အမြတ်ငွေများရရှိခဲ့သည်ဟု သိရသည်။

ကုမ္ပဏီ၏ ရလဒ်ပိုင်းဆိုင်ရာထုတ်ပြန်ချက်များအရ ဆော်ဒီအစိုးရမှာ ဒေါ်လာ ၁၈.၈ ဘီလျံဟူသည့် အကျိုးအမြတ်ပမာဏခံစားခွင့်အား အောက်တိုဘာလကုန်တွင် ရရှိဖွယ်ရှိနေသည်။

ကူးယူဖေါ်ပြခြင်းခွင့်မပြုပါ။
Source: The New York Times, The Guardian, BBC Business
Image: The Bangkok Post

Shell ကုမ္ပဏီ၏ ဝန်ထမ်းများ အပိုဆုကြေးငွေရရှိမည်

ရေနံနှင့်စွမ်းအင်ကုမ္ပဏီကြီး Shell သည် ရေနံဈေးများမြင့်တက်မှုကြောင့် စံချိန်တင်အမြတ်ငွေများရရှိခဲ့ပြီးနောက် ကမ္ဘာတဝှမ်းရှိကုမ္ပဏီဝန်ထမ်းများအား အပိုဆုကြေးငွေများ ပေးအပ်မည်ဟု ကြေညာခဲ့သည်။
ဗြိတိန်အခြေစိုက်ကုမ္ပဏီသည် လစာငွေ၏ ၈% အပိုဆုကြေးကို ဝန်ထမ်းများအား ပေးအပ်ခြင်းသည် ငွေကြေးဖေါင်းပွနှုန်းမြင့်တက်လာခြင်းအတွက်မဟုတ်ဟု ဆိုထားပြီး ကုမ္ပဏီ၏ အကြီးတန်းဝန်ထမ်းများမှာ အဆိုပါ အပိုဆုကြေးအစီအစဉ်တွင် မပါဝင်ဟု သိရသည်။

အပိုဆုကြေး၏ စုစုပေါင်းပမာဏမှာ ဒေါ်လာ သန်း ၅၀၀ ခန့် ဖြစ်နိုင်သည်။
အစီအစဉ်တွင် Shell ၏ ကမ္ဘာအရပ်ရပ်ဝန်ထမ်းဦးရေ ၈၂,၀၀၀ ပါဝင်မည်ဖြစ်သည်။

Shell ကုမ္ပဏီ၏ ပြိုင်ဘက်ကြီးဖြစ်သော BP (Beyond Petroleum) သည်လည်း ၁၄ နှစ်အတွင်း အမြင့်ဆုံး အမြတ်ရရှိမှုအခြေအနေကို ရရှိခဲ့သည်။

ကူးယူဖေါ်ပြခြင်းခွင့်မပြုပါ။
Source: BBC Business, The Guardian, The Times, Energy Voice
Image: Getty Images

သပိတ်မှောက်မှုကြောင့် နော်ဝေရေနံလုပ်ကွက်များကို Equinor စတင်ဖျက်သိမ်း

နော်ဝေ စွမ်းအင်ကုမ္ပဏီကြီး Equinor သည် နော်ဝေကမ်းလွန်ပင်လယ်ပြင်အလုပ်သမားများအကြား သပိတ်မှောက်မှုများကြောင့် မြောက်ပင်လယ်ရှိ Gudrun၊ Oseberg South နှင့် Oseberg East ရေနံလုပ်ကွက်များကို စတင်ပိတ်သိမ်းလိုက်ကြောင်း ကုမ္ပဏီက အင်္ဂါနေ့တွင်ပြောကြားခဲ့သည်။

ကူးယူဖော်ပြခြင်းခွင့်မပြုပါ။
Source: Reuters Business
Photo: Reuters

ဂျာမနီတွင် သဘာဝဓါတ်ငွေ့ မလုံလောက်မှုသည် အရေးပေါ်အခြေအနေသို့ ရောက်ရှိ

ဥရောပ၏ အကြီဆုံး စီးပွားရေး အဆောက်အဦရှိသည့် ဂျာမနီသည် ရုရှားက ဓါတ်ငွေ့ ပို့လွှတ်မှုများ လျှော့ချနေသည့်အတွက် နိုင်ငံတွင်း သဘာဝဓါတ်ငွေ့ မလုံလောက်မှုများကို ရင်ဆိုင်ရန် အရေးပေါ် စီမံချက်များ ချမှတ်နေရပြီဖြစ်သည်။

ဂျာမနီသည် ၎င်းတို့၏ အရေးပေါ် ဓါတ်ငွေ့ သုံးစွဲရေး စီမံချက် အဆင့် (၃) ဆင့်ရှိသည့်အထဲမှ ဒုတိယအဆင့်ကို စတင်လုပ်ဆောင်တော့မည့်ဖြစ်ကြောင်း ပြီးခဲ့သည့် ကြာသပတေးနေ့တွင် တရားဝင် ကြေငြာခဲ့ပြီး ၎င်းနောက်တွင် တစ်နိုင်ငံလုံး ဓါတ်ငွေ့ကို ခွဲတမ်းဖြင့် သုံးစွဲရတော့မည့် နောက်ဆုံး အဆင့်သာကျန်တော့သည်။

ဂျာမနီ စီးပွားရေးဝန်ကြီး ရောဘတ် ဟက်ဘက်က ထိုကဲ့သို့ဓါတ်ငွေ့ကို ခွဲတမ်းဖြင့် သုံးစွဲရသည့် နောက်ဆုံးအဆင့်ကို မရောက်ရှိရန် ဆောင်းရာသီအထိ တောင့်ခံနိုင်ဦးမည်ဟု မျှော်လင့်သော်လည်း ယတိပြတ်တော့ မဆိုနိုင်သေးကြောင်း သတင်းစာ ရှင်းလင်းပွဲတွင် ဖြေကြားခဲ့သည်။

ဘာလင်၌ ပြုလုပ်ခဲ့သော် အဆိုပါ သတင်းစာ ရှင်းလင်းပွဲတွင် ဝန်ကြီးက နိုင်ငံတွင်း သဘာဝဓါတ်ငွေ့ မလုံလောက်သည်အခြေအနေမှာ ပိုမိုကြပ်တည်းလာကြောင်းနှင့် ယခုအချိန်တွင် ပြည်သူအများ သတိမထားမိနိုင်သေးသော်လည်း နိုင်ငံမှာ အမှန်တကယ်ပင် ဓါတ်ငွေ့ အကြပ်အတည်းနှင့် ကြုံနေပြီဖြစ်ကြောင်း သတင်းထောက်များကို ပြောကြားခဲ့သည်။

ရုရှား အစိုးရပိုင် Gazprom သည် ပြီးခဲ့သည့် အပတ်အတွင်း ဂျာမနီသို့ ဓါတ်ငွေ့ပို့လွှတ်သော Nord Stream 1 ပိုက်လိုင်းကြီးမှ ဓါတ်ငွေ့များကို ၆၀ ရာခိုင်နှုန်းလျှော့ချပစ်ခဲ့ပြီး ယူကရိန်း ပဋိပက္ခအတွင်း ရုရှားနှင့် ဆန့်ကျင်ဘက်မှ ရပ်တည်၍ အရေးယူပိတ်ဆို့မှုများ ချမှတ်ခဲ့သည့်အတွက် တန်ပြန်ဆောင်ရွက်ခြင်းဖြစ်ကြောင်း လက်ညှိုးထိုးခဲ့သည်။

အီတလီ စွမ်းအင်ကုမ္ပဏီကြီးဖြစ်သော ENI ကလည်း Gazprom သည် ၎င်းတို့ နိုင်ငံသို့ ပို့လွှတ်သော ဓါတ်ငွေ့များကို ၁၅ ရာခိုင်နှုန်း လျှော့ချခဲ့ကြောင်း ထုတ်ဖော်ပြောကြားခဲ့ပြီး ယခုအခါ ဥရောပ သမဂ္ဂအဖွဲ့ဝင် နိုင်ငံ ၁၂ နိုင်ငံခန့်သည့် ဓါတ်ငွေ့ မလုံလောက်မှုဒဏ်ကို စတင်ခံစားနေရပြီဖြစ်သည်။

ဥရောပ သမဂ္ဂ၏ ရာသီဥတုဆိုင်ရာ မူဝါဒရေးရာ အကြီးအကဲ ဖရန် တင်မာမန်းက ရုရှားသည် ဓါတ်ငွေ့ကို လက်နက်သဖွယ် အသုံးချ၍ မိမိတို့ စည်းလုံးမှုကို တိုက်ဖျက်နေကြောင်းနှင့် မကြာမီ ဥရောပတွင် မကြုံဖူးသည့် ဓါတ်ငွေ့ အကြပ်အတည်း ဖြစ်လာဖွယ်ရှိကြောင်း ပြောကြားခဲ့သည်။

ကရင်မလင်၏ ပြောရေးဆိုခွင့်ရှိသူ ဒီမီထရီ ပတ်စကော့က ပြီးခဲ့သည့် ရက်ပိုင်းများအတွင်း ဥရောပသို့ ဓါတ်ငွေ့ အဝင်နည်းသွားခြင်းသည် နည်းပညာပိုင်ဆိုင်ရာ ချို့ယွင်းချက်များကြောင့်သာ ဖြစ်ပြီး နိုင်ငံရေးနှင့် မဆိုင်ကြောင်း ဆင်ခြေကန်သွားသည်။

ဂျာမနီ စီးပွားရေး ဝန်ကြီးကတော့ ယခု အကြပ်အတည်းသည် ဒုတိယ ကမ္ဘာစစ်ပြီးနောက် အဆုံးဝါးဆုံး ဖြစ်ပြီး ဂျာမန်ရှိ စီးပွားရေးလုပ်ငန်းများ၊ အိမ်ရှင်မများနှင့် အခြားသော ဓါတ်ငွေ့သုံးစွဲသည့် အဖွဲ့အစည်း အားလုံးကို ဓါတ်ငွေ့များ တတ်နိုင်သမျှ ခြွေတာသုံးစွဲရန် တိုက်တွန်းသွားခဲ့ပြီး သို့မှသာ ဆောင်းတွင်းအထိ တောင့်ခံနိုင်မည်ဟု ပြောကြားခဲ့သည်။

ကူးယူဖော်ပြခွင့်မပြုပါ။
Source: BBC, CNN, Reuters
Photo: Financial Times

US တွင် ဓါတ်ဆီ ၁ ဂါလံဈေး ၅ဒေါ်လာ အထက်သို့ စံချိန်တင်ရောက်ရှိ

အမေရိကန်နိုင်ငံ တဝှမ်းရှိ ပျမ်းမျှ ဓါတ်ဆီဈေးနှုန်းသည် ပြီးခဲ့သည့် ဇွန်လ ၁၁ ရက်နေ့ (စနေနေ့တွင်) ၁ဂါလံ ၅ ဒေါ်လာ အထက်သို့ သမိုင်းတလျှောက် ပထမဆုံး အကြိမ် ရောက်ရှိခဲ့ခြင်းဖြစ်ပြီး ဇွန်လ ၁၀ ရက်နေ့တွင် ၁ဂါလံ ၄.၉၈၆ ဒေါ်လာ ရှိနေရာမှ ဈေးမြင့်တက်သွားခဲ့ခြင်းဖြစ်သည်။

ယခုကဲ့သို့ လောင်စာဆီဈေးနှုန်း မြင့်တက်ပြီး ငွေကြေးဖောင်းပွမှုကို ပိုမိုအားပေးစေမည် ဖြစ်ရာ လာမည့် နိုဝင်ဘာ ကွန်ဂရက်ရွေးကောက်ပွဲကို အားခဲထားသည့် သမ္မတ ဘိုင်ဒန်နှင့် သူ၏ ဒီမိုကရက် ပါတီဝင်များအတွက် ခေါင်းခဲစရာ ဖြစ်စေခဲ့သည်။

သမ္မတ ဘိုင်ဒန်အစိုးရသည် လောင်စာဆီဈေးနှုန်းများ စတင်မြင့်တက်စဉ်ကတည်းက အရေးယူဆောင်ရွက်မှုများကို စဉ်ဆက်မပြတ်လုပ်နေခဲ့ပြီး နိုင်ငံ၏ အရန် ရေနံ သိုလှောင်မှုများကို ထုတ်ပေးခြင်းနှင့် ရေနံ ထုတ်လုပ်သည့် OPEC အဖွဲ့ဝင်နိုင်ငံများကို ရေနံပိုမိုထုတ်လုပ်ကြရန် ဖိအားပေးခြင်းများ လုပ်ဆောင်ခဲ့ခြင်းဖြစ်သည်။

သို့သော် တဖက်တွင်လည်း ရုရှား-ယူကရိန်း အရေးကြောင့် ရုရှားမှ ရေနံများနှင့် ရေနံချက်စက်ရုံများကို အရေးယူပိတ်ဆို့မှုများ ချမှတ်ထားခြင်းက ကမ္ဘာ့ ရေနံထုတ်လုပ်မှုကို အတိုင်းအတာတစ်ခုအထိ ထိခိုက်စေပြီး ကိုဗစ်အလွန်တွင် လောင်စာဆီ ဝယ်လိုအား ဆက်လက်မြင့်တက်နေခြင်းက ကမ္ဘာ့ရေနံဈေးကို အမြင့်ပိုင်းသို့ ဆက်တိုက်တွန်းပို့ နေခဲ့သည်။

လက်ရှိတွင် စက်သုံးဆီဈေးနှုန်းများ အမေရိကန်နိုင်ငံအတွင်း မြင့်မားနေသော်လည်း နိုင်ငံတွင်း ခရီးသွားလာမှုမှာ ကိုဗစ် မဖြစ်ခင် ကာလများ၏ ရာခိုင်နှုန်းကို မီရန် နည်းနည်းသာလိုတော့သည်ဟု အချက်အလက်များက ဆိုသည်။

အကယ်၍သည် ဓါတ်ဆီဈေးနှုန်းသည် ၁ဂါလံ ၅ဒေါ်လာ အထက်တွင် အချိန်အတော်ကြာ ဆက်လက်တည်နေမည်ဆိုပါက စက်သုံးဆီ ဝယ်လိုအားသည် အချိန်နှင့်အမျှ ပြန်လည် ကျဆင်းသွားနိုင်ကြောင်း စီးပွားရေး ပညာရှင်များက သုံးသပ်ထားသည်။

အမေရိကန် စွမ်းအင်ဌာန၏ အချက်အလက်များအရ ပြီးခဲ့သည့် လများတွင် လောင်စာဆီဈေးနှုန်းများ မြင့်တက်သည့်ကြားမှပင် ပြည်သူများ၏ စက်သုံးဆီ သုံးစွဲမှုနှုန်းသည် အားကောင်းနေဆဲဖြစ်ပြီး လွန်ခဲ့သည့် အပတ်ကဆိုလျှင် တစ်ရက်လျှင် ရေနံစိမ်းစည်ပေါင်း ၉.၂သန်းနှုန်းဖြင့် သုံးစွဲနေကြောင်း သိရသည်။

သည့်အတွက်ကြောင့်ပင် ရေနံဓါတု ကုမ္ပဏီကြီးများသည် အမြတ်အစွန်းများ တိုးတက်ကြောင်း ကြေငြာချက် အသီးသီးထွက်ပေါ်ခဲ့ကြပြီး Shell, BP နှင့် Chevron တို့သည် စံချိန်တင် ဝင်ငွေများ တိုးတက်ခဲ့ကြောင်း ထုတ်ပြန်ခဲ့ဖူးသည်။

ယခု ဓါတ်ဆီဈေးနှုန်းသည် အမေရိကန်တွင် သမိုင်းတလျောက် အမြင့်ဆုံး ဈေးနှုန်းဖြစ်သော်လည်း ငွေကြေးဖောင်းပွမှုနှုန်းများကို တန်းညှိ၍ ယှဉ်ကြည့်ပါက ပြီးခဲ့သည့် ၂၀၀၈ တွင် ရောက်ခဲ့သော ဓါတ်ဆီဈေးနှုန်းသည် ၁ဂါလံလျှင် ၅.၄၁ ဒေါ်လာဖြစ်နေပြီး ယခုဈေးထက် ၈ ရာခိုင်နှုန်း မြင့်နေသေးသည်ဟု သိရသည်။

ကူးယူဖော်ပြခွင့်မပြုပါ။
Source: Reuters, CNN
Photo: NBC News

နိုင်ဂျီးရီးယားရှိ တရားမဝင်ရေနံသန့်စင်ရာနေရာပေါက်ကွဲမှု လူ ၁၀၀ ကျော်သေဆုံး

နိုင်ဂျီးရီးယားနိုင်ငံ တောင်ပိုင်းရှိ မြစ်ဝကျွန်းပေါ်ဒေသဖြစ်သော ‘Rivers State’ ရေးဗားပြည်နယ်တွင် တရားမဝင် ရေနံသန့်စင်ရေးနေရာတခု၌ ပေါက်ကွဲမှုဖြစ်ပွားခဲ့သောကြောင့် လူ ၁၀၀ ကျော် သေဆုံးခဲ့သည်ဟု ပြည်နယ်အစိုးရမှ တာဝန်ရှိသူတဦးက စနေနေ့တွင် ပြောကြားခဲ့သည်။
၁ ညတည်းပေါက်ကွဲမှု၌ လူ ၁၀၀ ကျော်သည် မည်သူမည်ဝါဖြစ်ကြောင်း ခွဲခြားမရနိုင်အောင် လောင်ကျွမ်းခဲ့သည်ဟု ပြည်နယ်ကော်မရှင်နာမင်းကြီး (ရေနံအရင်းအမြစ်ဌာန)မှ Goodluck Opiah က ဆိုသည်။

နိုင်ဂျီးရီးယားသည် အာဖရိကတွင် အကြီးဆုံး ရေနံနှင့် သဘာဝဓါတ်ငွေ့ထုတ်လုပ်သည့် နိုင်ငံဖြစ်ပြီး ပြီးခဲ့သည့် နှစ်များအတွင်း ခိုးယူခံခဲ့ရသည့် ရေနံစည်ပေါင်း ၅၃ သန်း ခန့်ရှိပြီး တန်ဖိုးအားဖြင့် ဒေါ်လာ ၂ ဘီလျံ ကျော် ရှိသည်ဟု အစိုးရက ခန့်မှန်းထားသည်။

အလုပ်အကိုင်မရရှိခြင်းနှင့် ဆင်းရဲမွဲတေမှုများက နိုင်ဂျီးရီးယား မြစ်ဝကျွန်းပေါ်ဒေသတွင် တရားမဝင် ရေနံစိမ်းများခိုးယူခြင်း၊ ရေနံများကို တရားမဝင်သန့်စင်ခြင်း လုပ်ငန်းများအား အများ မျက်စိကျရာလုပ်ငန်းများ ဖြစ်လာစေခဲ့ပြီး လူသေဆုံးမှုများမှာ နောက်ဆက်တွဲဆိုးကျိုးများ ဖြစ်လာခဲ့သည်။
အန္တရာယ်များပြားလှသည့် ရေနံခိုးယူခြင်းနှင့် သန့်စင်ခြင်းများကြောင့် အသေအပျောက်များရုံသာမက ဒေသတွင်း၌ ရေနံဖိတ်စင်ခြင်းများကြောင့် ရေနံများနှင့် ရောနှောညစ်နွမ်းနေသော မြေဆီလွှာပြုန်းတီးမှုများ၊ လယ်ယာမြေ၊ ချောင်းနှင့် သဲသောင်ပြင်များ ရေနံစိမ်းများဖြင့် ညစ်ပတ်နေခြင်းများလည်း ရှိနေသည်။

နိုင်ဂျီးရီယားသားတို့၏ အကြပ်အတည်းများကြား တနိုင်ငံလုံး နေ့စဉ်ထုတ်လုပ်နိုင်သော ရေနံပမာဏ၏ ၁၀% ခန့်ဖြစ်သော ရေနံစည် ၂၀၀,၀၀၀ မှာ နေ့စဉ် ရေနံပိုက်လိုင်းဖေါက်ခြင်း၊ ခိုးယူခြင်းများမှ ဆုံးရှုံးနေရသည်ဟု ၎င်းတို့အစိုးရက ထုတ်ပြန်ထားသည်။

ကူးယူဖေါ်ပြခြင်းခွင့်မပြုပါ။
Source: ABC Australia, iNews UK, Reuters, Independent UK
Image: The Guardian

ရုရှားမှ ထွက်ခွါခြင်းအတွက် Shell ဒေါ်လာ ၅ ဘီလျံ နစ်နာနိုင်

ရေနံကုမ္ပဏီကြီး Shell သည် ရုရှားနိုင်ငံမှ ထွက်ခွါရန် စီစဉ်သည့်အနေဖြင့် ရုရှားအတွင်းရှိ လုပ်ငန်းပိုင်ဆိုင်မှုများကို လျှော့ချနေပြီး ယင်းကပင် ကုမ္ပဏီ၏စီးပွားရေးကို ဒေါ်လာ ၅ ဘီလျံ မျှထိခိုက်လာမည်ဖြစ်ကြောင်း ကုမ္ပဏီက အတည်ပြုထုတ်ပြန်ခဲ့သည်။
ကုမ္ပဏီသည် ရုရှားက ယူကရိန်းအား မကျူးကျော်မီအချိန်က ချုပ်ဆိုခဲ့သော ရေနံစာချုပ်များမှလွဲ၍ ရုရှား ရေနံများအား ထပ်မံဝယ်ယူခြင်းမပြုလုပ်တော့ဟုလည်း ကတိပြုခဲ့သည်။
ကျူးကျော်စစ် စတင်ပြီးနောက်တွင် ရုရှားထံမှ ရေနံများကို ဈေးပေါပေါဖြင့် ဝယ်ယူခဲ့သည်ဟုလည်း Shell အပေါ် ပြစ်တင်ဝေဖန်မှုများရှိခဲ့သည်။
သို့သော်လည်း ထိုအကြောင်းအရာများအတွက် ပြီးခဲ့သည့် မတ်လတွင် ကုမ္ပဏီက တောင်းပန်စာများ ထုတ်ပြန်ခဲ့သည်။

Shell ၏ ထိခိုက်နစ်နာမှုများတွင် ရုရှားအစိုးရပိုင် ရေနံကုမ္ပဏီဖြစ်သော Gazprom နှင့် လမ်းခွဲခြင်းများလည်း ပါဝင်သည်။
ကုမ္ပဏီက ကမ္ဘာ့ရေနံဈေးကွက်သည် ငွေဖြစ်လွယ်နေဆဲဖြစ်ကြောင်းကိုလည်း ထည့်သွင်း ပြောကြားခဲ့သည်။

စစ်ပွဲကြောင့် ကမ္ဘာ့အကြီးဆုံး ရေနံတင်ပို့ရောင်းချသူများတွင် တဦးအပါအဝင်ဖြစ်သည့် ရုရှားနှင့် ငွေပေးချေမှုများ၊ ရေနံပိုက်လိုင်းကိစ္စများ၊ သင်္ဘောဖြင့် တင်ပို့ရောင်းချခြင်း၊ ရုရှားပိုင် သယ်ယူပို့ဆောင်ရေးနှင့် အခြား ဆက်စပ်စီးပွားရေး၊ ဘဏ်များ အားလုံးကို နိုင်ငံတကာအသိုင်းအဝိုင်းမှ ပိတ်ပင်ခြင်းများကြောင့် ရေနံဈေးများ ကမောက်ကမဖြစ်ခဲ့သည်။

Shell ကုမ္ပဏီသည် ရုရှားနှင့် ဂျာမဏီတို့အကြား သွယ်တန်းထားသော Nord Stream 2 ရေနံပိုက်လိုင်း စီမံကိန်းတွင် ပါဝင်ပတ်သတ်နေမှုကိုလည်း အဆုံးသတ်မည်ဟု သိရသည်။
ဥရောပအင်အားကြီးနိုင်ငံများသည် လက်ရှိတွင် ရုရှားရေနံများအား ချက်ချင်းစွန့်ခွါရန် အခက်တွေ့နေကြပြီး အများစုက ၂၀၂၂ နှစ်ကုန်ပိုင်းတွင် ရုရှားနှင့်ရေနံကိစ္စအား အပြီးအပြတ်လမ်းခွဲဖွယ်ရှိနေသည်။

ကူးယူဖေါ်ပြခြင်းခွင့်မပြုပါ။
Source: BBC Business, Shell, Money. CNN, CNBC Business
Image: Getty Images

ရေနံနှင့်ဓါတ်ငွေ့ကို Bitcoin ဖြင့်လက်ခံရန် ရုရှားစဉ်းစားနေ

ရုရှား Duma Committee မှ စွမ်းအင်ဆိုင်ရာ ဥက္ကဌ ပေဗယ် ဇာဗယ်နီ (Pavel Zalvalny) က ကြာသပတေးနေ့က ဗီဒီယိုမှတဆင့်ပြုလုပ်သောသတင်းစာရှင်းလင်းပွဲတွင် မိတ်ဖက်နိုင်ငံများအကြား ရေနံဖိုးပေးချေရာတွင် ပိုမိုအဆင်ပြေသောနည်းလမ်းများကို အသုံးပြုသွားရန်ဆန္ဒရှိသည်ဟု ပြောကြားသွားခဲ့သည်။
ပေဗယ်ရည်ညွှန်းသည်မှာ တရုတ်နှင့် တူရကီကဲ့သို့ နိုင်ငံများဖြစ်ပြီး ၎င်းက ဒစ်ဂျစ်တယ်ငွေကြေး – cryptocurrency တမျိုးဖြစ်သော Bitcoin ကိုလည်း နိုင်ငံ၏တရားဝင်ငွေကြေးကဲ့သို့ စဉ်းစားပေးမည်ဟု ထည့်သွင်းပြောကြားသွားခြင်းဖြစ်သည်။

ပေဗယ်၏ပြောကြားမှုများအပြီး ၂၄ နာရီအတွင်း Bitcoin ၏ ဈေးနှုန်း ၄% ခန့် တန်ဖိုးမြင့်တက်ကာ 1 Bitcoin လျှင် ဒေါ်လာ ၄၄,၀၀၀ သို့ ရောက်ရှိလာခဲ့သည်။
ယူကရိန်းကိုကျူးကျော်မှုအတွက် ရုရှားအား အနောက်နှင့် ဒီမိုကရေစီနိုင်ငံအတော်များများက တားမြစ်ပိတ်ဆို့မှု အကြီးအကျယ်ပြုလုပ်လာနေချိန်တွင် ရုရှားသည်လည်း ကန်ဒေါ်လာကို မဖြစ်မနေစွန့်ခွာနိုင်ရန် ကြိုးစားလာနေရသည်။
လက်ရှိတွင် တရုတ်နှင့် တူရကီငွေကြေးများဖြစ်သော ယွမ်နှင့် လီရာ စသည်တို့နှင့် ရုရှား၏ ငွေကြေး ရူဘယ်တို့မှာ ရုရှားရေနံတင်ပို့ကုန်များအတွက် အပြန်အလှန် ငွေချေရာ၊ ဖလှယ်သုံးစွဲရာ ယူနစ်များ ဖြစ်လာဖွယ်ရှိသည်။

နယူးယောက်တိုင်းသတင်းစာကမူ ပြီးခဲ့သည့် လကတည်းက ရုရှားအနေဖြင့် အမေရိကန်ဦးဆောင်သော စီးပွားရေးပိတ်ဆို့မှုများကို သက်သာစေရန် Bitcoin အပါအဝင် အခြား ဘလော့ချိန်း – Blockchain နည်းပညာပေါ်ရှိ ဒစ်ဂျစ်တယ်ငွေကြေးများ – cryptocurrencies များကို သုံးစွဲလာဖွယ်ရှိသည်ဟု ရေးသားခဲ့ဖူးသည်။
၂၀၂၁ ခန့်က ရုရှားသမ္မတ ပူတင်သည် Bitcoin ၏ တန်ဖိုးရှိမှုအပေါ် ယုံကြည်သော်လည်း ရေနံအတွက် ဖလှယ်ရမည့် ငွေကြေးအဖြစ်တော့ လက်ခံနိုင်ဦးမည်မဟုတ်ဟူသော စကားများကို အင်တာဗျူးတွင် ဖြေဖူးသည်။
သို့သော်လည်း လက်ရှိအခြေအနေများအရ ဒစ်ဂျစ်တယ်ငွေကြေးအပေါ် ရုရှား၏ ရှုမြင်ပုံမှာ ပြောင်းလဲလာပြီဖြစ်သည်။

စီးပွားရေးပိတ်ဆို့မှုများမှ ရှောင်လွှဲရန်ကြိုးစားနေသော ရုရှားအား အကူအညီဖြစ်လာစေမည့် ဒစ်ဂျစ်တယ်ငွေကြေးများနှင့် ဒစ်ဂျစ်တယ်ငွေကြေးဖလှယ်ခြင်း၊ ရောင်းဝယ်ခြင်းပြုလုပ်နိုင်သည့် crypto exchanges များကိုမူ ဥရောပအပါအဝင် နိုင်ငံကြီးများက စည်းမျဉ်းထပ်မံတင်းကြပ်မှု၊ ဥပေဒများ ထပ်မံပြဌာန်းမှုများပြုလုပ်လာနိုင်သည်။
ဥရောပနိုင်ငံများ၏ လောင်စာဆီ၊ စွမ်းအင်ဆိုင်ရာလိုအပ်ချက် ၄၀% ကို ရုရှားက တင်ပို့ရောင်းချနေသည်ဖြစ်ရာ လက်ရှိတွင် ထိုနိုင်ငံများကို ရုရှားရူဘယ်ငွေဖြင့် ပေးချေရန် တောင်းဆိုတော့မည်ဖြစ်သည်။
ထိုပမာဏမှာ ၁ ရက်လျှင် ယူရိုငွေ ဒေါ်လာ သန်း ၂၀၀ မှ ၈၀၀ အထိ ရှိနေသည်ဟု သိရသည်။

ကူးယူဖေါ်ပြခြင်းခွင့်မပြုပါ။
Source: CNBC Business, New York Times, Coin Desk, Coin Telegraph, BBC Business
Image: Bloomberg Business

ဆော်ဒီရေနံကုမ္ပဏီက ထုတ်လုပ်ရေးအတွက် ရင်းနှီးမြှုပ်နှံမှုမြှင့်တင်

ဆော်ဒီအာရေးဘီးယားအစိုးရပိုင် ရေနံကုမ္ပဏီကြီးဖြစ်သော ဆော်ဒီ အာရမ်ကို (Saudi Aramco) သည် ၂၀၂၁ အတွင်း အမြတ်ငွေ ၂ ဆ ရခဲ့ကြောင်း ထုတ်ပြန်ခဲ့ပြီးနောက် စွမ်းအင်ထုတ်လုပ်ရေးအတွက် ရင်းနှီးမြှုပ်နှံမှုပမာဏကို သိသိသာသာမြှင့်တင်ရန် စီစဉ်နေသည်။
လာမည့် ၅ နှစ်အတွင်း ရေနံတိုးထုတ်ရန် ရည်ရွယ်နေပြီး ထိုအတွက် ရင်းနှီးထည့်ဝင်ငွေအား ၅၀% တိုးမြှင့်မည်ဟု ကြေညာခဲ့ပြီး ယင်းပမာဏသည် ဒေါ်လာ ဘီလျံ ၄၀ မှ ၅၀ အတွင်း ရှိလာမည်ဟု ယမန်နေ့က ထုတ်ဖေါ်ပြောကြားခဲ့သည်။
ကမ္ဘာ့အကြီးဆုံး ရေနံကုမ္ပဏီအနေဖြင့် ယခု ဆယ်စုနှစ်အလယ်ခန့်တွင် ရင်းနှီးထည့်ဝင်ငွေ ပိုမိုတိုးတက်လာဦးမည်ဟုလည်း ခန့်မှန်းထားသည်။

ဆော်ဒီအာရမ်ကိုသည် ၂၀၂၁ တွင် ရေနံမှ အမြတ်ငွေ ဒေါ်လာ ၁၁၀ ဘီလျံ ရရှိခဲ့ပြီး ၂၀၂၀ ခုနှစ်တွင် ရရှိခဲ့သော အမြတ်ငွေ ဒေါ်လာ ၄၉ ဘီလျံထက် ၂ ဆကျော် ကျော်လွန်ရရှိခဲ့ခြင်းလည်းဖြစ်သည်။
ကုမ္ပဏီသည် ဝန်ထမ်းဦးရေ ၆ သောင်းကျော်ဖြင့် လည်ပတ်လျက်ရှိသည်။

ကမ္ဘာတဝှမ်း ပြန်လည်ပြည့်ဖြိုးမြဲစွမ်းအင်ဖြစ်သော လျှပ်စစ်နှင့် အခြားစွမ်းအင်များကို ပိုမိုအသုံးပြုရန်တာဆူနေကြပြီး ကာဗွန်လျှော့ချခြင်းကို အားပေးလျက် ကာဗွန်ထုတ်လွှတ်မှု သုည အခြေအနေကို ရောက်ရှိရန်လုပ်ဆောင်နေသည်။
သို့သော်လည်း ရေနံကုမ္ပဏီသည် လာမည့် ၂၀၂၇ တွင် ရေနံတူးဖေါ်နှုန်း ၁ ရက်လျှင် ရေနံစိမ်းစည်ပေါင်း ၁၃ သန်း ဖြင့် “အမြင့်ဆုံးထုတ်လုပ်နိုင်မှုအခြေအနေ” သို့ ရောက်ရှိနိုင်သည်ဟု ဆိုသည်။

ကုမ္ပဏီသည် ယခင်နှစ်က လုပ်ငန်းလည်ပတ်ရန် စရိတ်အဖြစ် ဒေါ်လာ ၃၁.၉ ဘီလျံကုန်ကျခဲ့သည်။
၎င်းတို့အနေဖြင့် ကာဗွန်ကို လေထုအတွင်းမှဖမ်း၍ ထိန်းသိမ်းခြင်းနည်းပညာတွင် ဦးဆောင်သူဖြစ်လာကြိုးစားနေပြီး ဟိုက်ဒရိုဂျင်တင်ပို့သူဖြစ်လာနိုင်ရန်လည်း စီမံကိန်းချကြိုးစားနေသည်ဟု ထုတ်ပြန်ထားသည်။

ကူးယူဖေါ်ပြခြင်းခွင့်မပြုပါ။
Source: BBC Business, The Times UK, This Is Money, National Grid
Image: Arabian Business

ရုရှားရှိ ရေနံနှင့်ဓါတ်ငွေ့ကဏ္ဍတွင် အားထည့်ရင်းနှီးမြှုပ်နှံရန် အိန္ဒိယကိုတောင်းဆို

နိုင်ငံ၏ ရေနံနှင့်သဘာဝဓါတ်ငွေ့လုပ်ငန်းများအား စီးပွားရေးပိတ်ဆို့မှုများခံလာရပြီးနောက် ရုရှားသည် အာရှ၏ တတိယအကြီးဆုံးစီးပွားရေးနိုင်ငံဖြစ်သော အိန္ဒိယအား ၎င်းတို့၏ ရေနံ၊ ဓါတ်ငွေ့ကဏ္ဍ၌ ရင်းနှီးမြှုပ်နှံမှုများ ပိုမို နက်နက်ရှိုင်းရှိုင်းပြုလုပ်ရန် တိုက်တွန်းလိုက်သည်။
ရုရှစီးပွားရေးသည် ၁၉၉၁ ခုနှစ် ဆိုဗီယက်ယူနီယံပြိုကွဲပြီးနောက်ပိုင်း အဆိုးဆုံးအခြေအနေကို ရင်ဆိုင်နေရပြီး ယူကရိန်းသို့ကျူးကျော်စစ်ဆင်နွှဲခြင်း၏ နောက်ဆက်တွဲရလဒ်အဖြစ် ခံစားနေရခြင်းလည်းဖြစ်သည်။

အနောက်မဟာမိတ်နိုင်ငံအချို့က ရုရှား၏ယူကရိန်းကျူးကျော်စစ်အပေါ် ကန့်ကွက်မဲထည့်ရန် ရှောင်နေသော နယူးဒေလီအစိုးရအား ရုရှားကိုရှုတ်ချရန် တိုက်တွန်းလျက်ရှိသည်။
ရုရှား၏ ဒုဝန်ကြီးချုပ် အလက်ဇန်းဒါးနိုဗက် (Alexander Novak) က ရုရှား၏ ရေနံ၊ လောင်စာဆီနှင့်ဆက်စပ်သော ထုတ်ကုန်များ အိန္ဒိယသို့ တင်ပို့မှုမှာ ဒေါ်လာ ၁ ဘီလျံသို့ ရောက်ရှိလာကြောင်းနှင့် ထိုပမာဏကို မြှင့်တင်ရန် သိသာသော အခွင့်အရေးများ ရှိနေကြောင်းပြောကြားချက်များကို အိန္ဒိယရှိ ရုရှားသံရုံးက သောကြာနေ့တွင် ထုတ်ပြန်ခဲ့သည်။

အမေရိကန်ပြည်ထောင်စုက ရုရှားလောင်စာဆီတင်သွင်းမှုများကို တားမြစ်ကြောင်း ယခုသီတင်းပတ်ထဲတွင် ထုတ်ပြန်ခဲ့ပြီး ဥရောပ၏ လောင်စာဆီ ၃ ပုံ ၁ ပုံကို ရုရှားရေနံအပေါ်မှီခိုနေရခြင်းကြောင့် ဗြိတိန်ကမူ ယခုနှစ်ကုန်တွင် တဆင့်ချင်း ပယ်ဖျက်သွားရန်လုပ်ဆောင်မည်ဟု ထုတ်ပြန်ခဲ့သည်။

အိန္ဒိယအစိုးရပိုင် ကုမ္ပဏီများသည် ရုရှားရေနံနှင့် သဘာဝဓါတ်ငွေ့တွင်းများအား ရှယ်ယာပိုင်ဆိုင်မှု၊ လုပ်ငန်းပိုင်ဆိုင်မှုများရှိနေပြီး ရုရှား၏ Rosneft ကလည်း အိန္ဒိယရှိ Nayara ရေနံသန့်စင်ရေးစက်ရုံတွင် ရှယ်ယာအများစုကို ပိုင်ဆိုင်လျက်ရှိသည်။
ရုရှားအနေဖြင့် ၎င်းတို့ ၂ နိုင်ငံအကြား နျူစွမ်းအင်၊ နျူကလိယစွမ်းအင်သုံးလျှပ်စစ်စက်ရုံတည်ဆောက်မှု စသည့်ကိစ္စများကို ပူးပေါင်းဆောင်ရွက်မှုများ ဆက်လက်ပြုလုပ်နိုင်မည်ဟု မျှော်လင့်နေသည်။

ကူးယူဖေါ်ပြခြင်းခွင့်မပြုပါ။
Source: Reuters, The Independent, The Federal News
Image: Reuters