airline

ဗြိတိန်တွင် လေကြောင်းပို့ဆောင်ရေး ဝန်ထမ်းများ အရေးတကြီးလိုအပ်

ဗြိတိန်တွင် လွန်ခဲ့သည့် ရက်သတ္တပတ်က ဘုရင်မကြီး၏ မွေးနေ့အထိမ်းအမှတ်အဖြစ် အားလပ်ရက်များ ရှိလေရာ ပြည်သူအများအပြား ခရီးသွားရန် ပြင်ဆင်ခဲ့ကြသော်လည်း လေကြောင်း ခရီးစဉ်များစွာ ဖျက်သိမ်းမှု၊ ရွေ့ဆိုင်းမှုများကြောင့် ခရီးသွားမည့်သူများ ကမောက်ကမဖြစ်ခဲ့ရသည်။

ထိုစဉ်က လေကြောင်းခရီးစဉ် ဖျက်သိမ်းမှုများ အပြင်၊ လေဆိပ်များတွင်လည်း ဝန်ထမ်း မလုံလောက်မှုများကြောင့် ထောင်နှင့်ချီသော ခရီးသွား ပြည်သူများသည် လေဆပ်များတွင် စုပြုံတန်းစီကာ ၎င်းတို့၏ ဆုံးရှုံးသွားတော့မည့် အားလပ်ရက်ခရီးစဉ်များအတွက် စိတ်ပျက်လက်ပျက်ဖြစ်ကြရသည်။

ဗြိတိန်လေကြောင်းလိုင်းများ မှတ်ပုံတင်လက်ခံရာ အစိုးရအဖွဲ့အစည်းဖြစ်သည့် Airlines UK ၏ အဆိုအရ နိုင်ငံ၏ လေကြောင်းခရီးသွားကဏ္ဍတွင် ၂၀၁၉ ခုနှစ်က ဝန်ထမ်းပေါင်း ၇၄၀၀၀ ထိ ရှိခဲ့သော်လည်း ကိုဗစ်ကာလအတွင်း ဝန်ထမ်း ၃၀၀၀၀ ခန့် အလုပ်အကိုင်ဆုံးရှုံသွားခဲ့ရကြောင်း သိရသည်။

သည့်အပြင် UK ရှိ လေဆိပ်များကို တာဝန်ယူလည်ပတ်နေသည့် Swissport ကုမ္ပဏီသည်လည်း ယခင်က လေဆိပ်လုံခြုံရေးနှင့် ခရီးဆောင်အိတ်များ စီမံခန့်ခွဲရန် ဝန်ထမ်းပေါင်း ၈၅၀၀ ခန့်ရှိသော်လည်း ကိုဗစ်ကာလတွင် ဝန်ထမ်းအင်အား တစ်ဝက်ခန့် လျှော့ချခဲ့ရသည်။

၎င်းတို့သည် ပြီးခဲ့သည့် ဇန်နဝါရီမှ စတင်၍ ဝန်ထမ်းအသစ်ဦးရေ ၂၈၀၀ ခန့် ပြန်လည်ခေါ်ယူခဲ့သော်လည်း ၁၂၀၀ ခန့်မှာ ယခုအချိန်အထိ နောက်ခံရာဇဝင် ပြစ်မှု ကင်းရှင်းကြောင်း စစ်ဆေးမှု မပြီးဆုံးသေးသဖြင့် တာဝန်ထမ်းဆောင်နိုင်ခြင်း မရှိသေးဟု သိရသည်။

ယခုကဲ့သို့ ကမောက်ကမဖြစ်မှုများ အပြီးတွင် UK ရှိ အလုပ်သမားသမဂ္ဂ၊ Swissport ၏ UK တာဝန်ရှိသူများနှင့် အစိုးရပိုင်း တာဝန်ရှိသူများ တွေ့ဆုံဆွေးနွေးခဲ့ကြသော်လည်း လေကြောင်းကဏ္ဍအတွက် ဝန်ထမ်းရှားပါးမှုသည့် နောက် တစ်လအထိ ကြာမြင့်နိုင်ကြောင်းသာ ကောက်ချက်ထွက်လာခဲ့သည်။

EasyJet, British Airways နှင့် Tui လေကြောင်းလိုင်းတို့က ခရီးစဉ် ဖျက်သိမ်းခဲ့ရမှုကြောင့် ခရီးသွားများ စိတ်အနှောက်အယှက်ဖြစ်ရသည့်အတွက် အလွန်စိတ်မကောင်းဖြစ်ကြောင်း ကြေငြာချက်များ အသီးသီး ထုတ်ပြန်ခဲ့ကြသည်။

၎င်းတို့တွင် ဘတ်ဂျက်လေကြောင်းလိုင်းဖြစ်သော EasyJet သည် ခရီးစဉ်ပေါင်း ၁၀၀ ကျော်ဖျက်သိမ်းခဲ့ရပြီး လေကြောင်းလိုင်း၏ ဘဏ္ဍာရေး အရာရှိချုပ်ဖြစ်သူ ဆိုဖီးဒက်ကာက မိမိတို့အနေဖြင့် ခရီးသွား ပြည်သူများအတွက် အကောင်းဆုံး ကြိုးစားနေသော်လည်း ဝန်ထမ်းသစ်ရရှိရန် မလွယ်ကူခြင်းနှင့် ဝန်ထမ်းရရှိလျှင်လည်း လုံခြုံရေးအရ နောက်ကြောင်းစစ်ဆေးသည့် အချိန်သည် ၁၄ ပတ်ခန့်ကြာမြင့်ခြင်းက အဓိက အတားအဆီးဖြစ်နေသည်ဟု ငြီးတွားခဲ့သည်။

လက်ရှိတွင် ဗြိတိန်သည် ကိုဗစ်ကြောင့်သာမက ဥရောပသမဂ္ဂမှ ထွက်ခဲ့ခြင်းကြောင့် ပြည်ပလုပ်သား ရှားပါးမှု ဒဏ်ခံနေရသလို ကိုဗစ်ကြောင့် ၂နှစ်ခန့် ခရီးမသွားခဲ့ရသဖြင့် ပြည်သူအများသည် ခရီးသွားရန်သာ စိတ်အားထက်သန်နေသဖြင့် ဝန်ထမ်းလိုအပ်ချက်မှာ ကဏ္ဍတိုင်းလိုလိုပင်ဖြစ်နေခဲ့လေသည်။

ကူးယူဖော်ပြခွင့်မပြုပါ။
Source: BBC Business, Indenpent
Photo: BBC

Capital A ဟူ၍ နာမည်ပြောင်းလဲခဲ့သည့် AirAsia

မလေးရှား၏ ဘတ်ဂျတ်လေကြောင်းလိုင်း တစ်ခုဖြစ်သော AirAsia သည် ၎င်းတို့အနေဖြင့် လေကြောင်း စီးပွားရေးတစ်ခုထပ်ပိုသော ကုမ္ပဏီတစ်ခု ဖြစ်လာသည့်အတွက် Capital A ဟု နာမည်ပြောင်းခဲ့ကြောင်း ယမန်နေ့ သောကြာနေ့က ထုတ်ပြန်ခဲ့သည်။

AirAsia သည် ပြီးခဲ့သည့်နှစ် ကပ်ရောဂါဖြစ်ပွားစဉ်ကာလအတွင်း အာရှဒေသများတွင် ခရီးသွားလာမှုများ ပိတ်ပင်မှုကြောင့် ဝင်ငွေ ထိခိုက်မှု ကြီးများခဲ့သည့် ကုမ္ပဏီများတွင် တစ်ခုအပါအဝင်ဖြစ်ပြီး ကုမ္ပဏီဆက်လက် ရှင်သန်စေရန် အမျိုးမျိုး ကျားကန်ခဲ့ရသည်။

ယခုအခါ ၎င်းတို့သည် ငွေပေးချေရေး ဝန်ဆောင်မှု လုပ်ငန်းဖြစ်သော BigPay တွင် ထိပ်တန်းရင်းနှီးမြှပ်နှံမှု ကုမ္ပဏီဖြစ်နေသလို၊ ကုန်စည်သယ်ယူပို့ဆောင်ရေး လုပ်ငန်းဖြစ်သည့် Teleport နှင့် ၎င်း၏ အပလီကေးရှင်းဖြစ်သည့် Super App တွင်လည်း ရင်းနှီးမြှပ်နှံမှုများ ပြုလုပ်ထားကြောင်း သိရသည်။

ပြီးခဲ့သည့် နှစ်နှစ်အတွင်း လေကြောင်း ကဏ္ဍအနေဖြင့် ခက်ခက်ခဲခဲ ရုန်းကန်ခဲ့ရသဖြင့် မိမိတို့သည် အနာဂတ်အတွက် အခြေခံကောင်းမည့် ကဏ္ဍများတွင် ပြောင်းလဲရင်းနှီးမြှပ်နှံခဲ့ရကာ ယခုအခါ ကုမ္ပဏီသည် လေကြောင်းကဏ္ဍတစ်ခုတည်းအပေါ် မှီခိုနေရခြင်းကို လျော့ချနိုင်ခဲ့ပြီဖြစ်ကြောင်း Capital A ၏ CEO ဖြစ်သူ တိုနီဖာနန်ဒက်ဇ်က ပြောကြားခဲ့သည်။

ကုမ္ပဏီအနေဖြင့် ယခုကဲ့သို့ အမည်ပြောင်း၍ ကဏ္ဍပေါင်းစုံတွင် ရင်းနှီးမြှပ်နှံမှုများ ပြုလုပ်သွားမည်ဖြစ်သော်လည်း လေကြောင်းလိုင်းကိုမူ အာရှတွင် နာမည်ရပြီးသားဖြစ်သည့် AirAsia အမည်ဖြင့် ဆက်လက်ထားရှိသွားမည်ဟု မစ္စတာ ဖာနန်ဒက်ဇ်က ဆိုသည်။

ဆက်လက်၍ သူက AirAsia အနေဖြင့် ထိုင်း၊ ဖိလစ်ပင်း၊ အိန္ဒိယနှင့် အင်ဒိုနီးရှားတို့တွင် AirAsia လက်ခွဲလေကြောင်းလိုင်းများ ရှိပြီးသော်လည်း နောက်ထပ် လက်ခွဲ လေကြောင်းလိုင်းသစ် နှစ်လိုင်း တိုးချဲ့ဦးမည် ဖြစ်ကြောင်း သတင်းဌာနများသို့ အရိပ်အမြွက်ပြောကြားခဲ့သည်။

သည့်အပြင် ၎င်းတို့ ကုမ္ပဏီသည် ယခုနှစ်တွင်လည်း ရင်းနှီးမြှပ်နှံသူများဆီမှ ရင်းဂစ် (၁) ဘီလီယံခန့် ရရှိရန် မျှော်မှန်းထားပြီး ပြီးခဲ့သည့် ၂၀၂၁ခုနှစ် နှစ်ကုန်ပိုင်းက AirAsia ၏ လေကြောင်းခရီးစဉ်များတွင် ခရီးသည်ထိုင်ခုံများ ၈၀ ရာခိုင်နှုန်းခန့် ပြန်ပြည့်လာပြီဖြစ်ကြောင်း သိရသည်။

ကူးယူဖော်ပြခွင့်မပြုပါ။
Source: Reuters
Photo: airasia newsroom

January 28, 2022 by Thaw Htet Travel 0

ဘိုးရင်း 737 MAX လေယာဉ်များအားပိတ်ပင်ထားမှုကို အင်ဒို ပယ်ဖျက်

အရှေ့တောင်အာရှ၏အကြီးဆုံးစီးပွားရေးနိုင်ငံ အင်ဒိုနီးရှားသည် Boeing 737 MAX မော်ဒယ်များအား ပျံသန်းခွင့်ပိတ်ပင်ထားခြင်းကို ပယ်ဖျက်လိုက်ကြောင်းကြေညာလိုက်သည်။
တနင်္လာနေ့က အီသီသိုးပီးယားလေကြောင်းလိုင်းက ဘိုးရင်း 737 MAX များဖြင့် ပြန်လည် ပျံသန်းတော့မည်ဟု ကြေညာအပြီးတွင် အင်ဒိုနီးရှားကလည်း ယခုကဲ့သို့ ကြေညာလိုက်ခြင်းဖြစ်သည်။
လက်ရှိအချိန်တွင် ဘိုးရင်း 737 MAX များကို ပြန်လည်ခွင့်ပြုသည့် နိုင်ငံပေါင်း ၁၈၀ အထိ ရှိလာပြီဖြစ်သည်။

အင်ဒိုနီးရှားပို့ဆောင်ရေးဝန်ကြီးဌာန၏ ကြေညာချက်အရ ပြန်လည်ပျံသန်းခွင့်ပြုသည့် ညွှန်ကြားချက်သည် ချက်ချင်းသက်ရောက်မည်ဖြစ်သည်ဟု သိရသည်။
ဘိုးရင်း ၇၃၇ မော်ဒယ်များ မပျံသန်းမီ စစ်ဆေးခြင်းနှင့် အစိုးရအာဏာပိုင်အဖွဲ့များက ထပ်မံစစ်ဆေးခြင်းများလည်း ပြုလုပ်သွားမည်ဟု ဆိုသည်။

737 MAX များအား မတားမြစ်မီက အင်ဒိုဘတ်ဂျက်လေကြေင်းလိုင်းကြီးဖြစ်သော Lion Air လေကြောင်းသည် အဆိုပါ မော်ဒယ်အမျိုးအစား လေယာဉ်ပေါင်း ၁၀ စီးကို အသုံးပြုခဲ့သည်။
အင်ဒိုနီးရှားအစိုးရပိုင် Garuda လေကြောင်းကမူ ကြွေးမြီနှင့်ပတ်သက်၍ ပြန်လည်ပြင်ဆင်မှုများပြုလုပ်နေသဖြင့် ဘိုးရင်း ၇၃၇ များကို ပြန်လည်တင်သွင်းရန် အစီအစဉ်မရှိချေ။

Boeing 737 MAX များသည် ၃ နှစ်ခန့် ရပ်နားနေရပြီးနောက် ပြန်လည်ပြင်ဆင်မှုများပြုလုပ်ပြီး ခရီးသည်များရှေ့သို့ ပြန်လည်ရောက်ရှိတော့မည်ဖြစ်သည်။

ကူးယူဖေါ်ပြခြင်းခွင့်မပြုပါ။
Source: BBC Business, The Globe and Mail
Image: Skift

December 29, 2021 by Min Thwe Kyaw News Travel 0

Etihad Airways က လုပ်ငန်းခွဲများ ချဲ့ထွင်လုပ်ကိုင်ဦးမည်

Etihad Airways သည် ကုမ္ပဏီ၏ လေယာဉ်ပျံသန်းရေးလုပ်ငန်းအား အထောက်အကူပြုရန် ဝန်းရံဖွဲ့စည်းထားသော လုပ်ငန်းခွဲများအား အစိုးရသို့ ပြန်လည်ရောင်းချခဲ့ပြီးနောက် လေကြောင်းလိုင်းကုမ္ပဏီအသစ်တခု တည်ထောင်ရန်စီစဉ်နေသည်ဟု မိခင်လုပ်ငန်းကြီး ADQ – Abu Dhabi Developmental Holding Company က ထုတ်ပြန်ခဲ့သည်။
Etihad လေကြောင်းကြီးကမ္ဘာ့အဆင့်မီဖြစ်လာစေရန် ပံ့ပိုးစေရေးရည်မှန်းလျက် Etihad Engineering, Etihad Airport Services Cargo, Etihad Airport Services Ground, Etihad Aviation Training, Etihad Secure Logistics, Etihad Technical Training, Etihad Airport Services Catering, Etihad Holidays စသည့် ကုမ္ပဏီ ၈ ခုကို အလျင်အမြန်ဝန်းရံကာ တည်ထောင်ခဲ့သော်လည်း အောင်မြင်မှုမရရှိခဲ့သောကြောင့် အစိုးရလက်သို့ ပြန်လည်ရောင်းချခဲ့ပြီဖြစ်သည်။

လက်ရှိအမှုဆောင်အရာရှိချုပ် တိုနီဒေါက်ဂလက်စ်က လေကြောင်းလိုင်းအား အကြီးအကျယ်အပြောင်းအလဲပြုလုပ်လိုလျက်ရှိပြီး ကုမ္ပဏီအား အမြတ်အစွန်းရရှိသော အနည်းငယ် ဝိတ်လျှော့ထားသည့် လေကြောင်းလိုင်းအဖြစ်သို့ ပြောင်းလဲလိုနေသည်။
တိုနီ (Tony Douglas) က ကုန်ကျမှုစရိတ်ထိန်းချုပ်ရန် တခုတည်းကိုသာ အာရုံစိုက်လိုနေခြင်းလည်းဖြစ်သည်။

အစိုးရပိုင်ငွေကြေးများဖြင့်လည်ပတ်သော ဓနစီမံခန့်ခွဲရေး ADQ က အီတီဟဒ်က ပြန်လည်ရောင်းချသည့် လုပ်ငန်းခွဲ ၆ ခုကို ပူးပေါင်းစေမည်ဖြစ်ပြီး အခြား Etihad Catering နှင့် Etihad Holidays တို့မှာ Abu Dhabi National Exhibitions Company (ADNEC) လက်အောက်သို့ ပူးပေါင်းရောက်ရှိသွားမည်ဖြစ်သည်။
အမှုဆောင်အရာရှိ တိုနီဒေါက်ကလက်စ်က “လေကြောင်းလုပ်ငန်းတခုတည်းကိုပဲ အာရုံစိုက်လုပ်ဆောင်သွားတော့မှာမို့ ကျွန်တော်တို့အနေနဲ့ Etihad Airways ဧည့်သည်တွေ မျှော်လင့်နေတဲ့ အကောင်းဆုံး လေကြောင်းအဆင့်အတန်း ဆိုတာနဲ့ ခရီးသွားအတွေ့အကြုံတွေကို ပေးသွားနိုင်တော့မှာပါ” ဟု ပြောကြားခဲ့သည်။

ကူးယူဖေါ်ပြခြင်းခွင့်မပြုပါ။
Source: Paddle Your Own Kanoo, Live Mint, Reuters, The National News
Image: Travel Nation UK

December 25, 2021 by Min Thwe Kyaw News Travel 0

ခရစ်စမတ်အမီ Ryanair လက်မှတ်ခများ ဈေးလျှော့မည်

ဥရောပမှထွက်ခဲ့သည့် ဗြိတိန်သားများ ရှယ်ယာပိုင်ဆိုင်ခွင့်ရမည်မဟုတ်

ကမ္ဘာ့အကြီးဆုံးဘတ်ဂျက်လေကြောင်းလိုင်းဖြစ်သည့် အိုင်ယာလန်အခြေစိုက် Ryanair သည် ဆောင်းရာသီလေကြောင်းလက်မှတ်ခများကို လျှော့ချပြီး ဝယ်လိုအားတက်လာရန်စီစဉ်ထားကြောင်း တနင်္လာနေ့က ကြေညာခဲ့သည်။
ကုမ္ပဏီသည် အများနည်းတူ ကိုဗစ်ကပ်ဘေးကြောင့် ခရီးသွားလုပ်ငန်းအားလုံးထိခိုက်ရသည့်အထဲတွင် ပါဝင်ခဲ့ပြီး ပထမဆုံး အမြတ်ပြသော ၃ လပတ်ကာလကို ရရှိခဲ့သည်။
၂၀၂၁ နှစ်ဝက်တွင် လေကြောင်းလိုင်းသည် ဝင်ငွေ ယူရို ၂.၂ ဘီလျံ ရရှိခဲ့ပြီး ယခင်နှစ်ထက်စာလျှင် ၈၃% ပိုမိုတိုးတက်ခဲ့ခြင်းဖြစ်ကာ ခရီးသည်အရေအတွက်အားဖြင့် ၂ ဆကျော် တိုးတက်ခဲ့သည်။

Ryanair သည် ဥရောပမှထွက်ခွါခဲ့သည့် ဗြိတိန်အခြေအနေကြောင့် ၎င်း၏ရှယ်ယာဝေစုများကို ဗြိတိန်နိုင်ငံသားများပိုင်ဆိုင်ခြင်းမှ တားမြစ်ခြင်းစည်မျဉ်းအား ဆက်လက်ထားရှိသွားမည်ဖြစ်သည်။
ထို့အတွက်ကြောင့် လန်ဒန်စတော့အိတ်ချိန်းပေါ်တွင် အရောင်းတင်ထားသော Ryanair ၏ ရှယ်ယာများကို ကုမ္ပဏီအနေဖြင့်ပြန်လည်နုတ်ယူရမည်ဖြစ်သည်။

ယခုနှစ် ပထမနှစ်ဝက်တွင် အမြတ်အစွန်းအပေါင်းလက္ခဏာဆောင်ခဲ့သော်လည်း နှစ်ကုန်တွင်မူ အခွန်အခများနှင့် စရိတ်အရပ်ရပ်ကြောင့် ကုမ္ပဏီသည် လိုငွေ ယူရို သန်း ၁၀၀ မှ သန်း ၂၀၀ အထိ ရှိနေဦးမည်ဟု ဆိုသည်။
လေကြောင်းလိုင်း၏ အမှုဆောင်အရာရှိချုပ် မိုက်ကယ်အိုလာရီ (Michael O’Leary) က ကုမ္ပဏီ၏ရှယ်ယာများအား နိုင်ငံခြားသားပိုင်ဆိုင်မှု စည်းမျဉ်းများအရ လန်ဒန်အိတ်ချိန်းမှ ၂၀၂၂ တွင် အပြီးထွက်ခွါရမည်ဟု ဘီဘီစီ ရေဒီယိုသို့ပြောကြားခဲ့သည်။
ဥရောပ-ဗြိတိန်လမ်းခွဲအပြီး ထွက်ပေါ်လာသောစည်းမျဉ်းများအရ ဥရောပသမဂ္ဂအဖွဲ့ဝင်မဟုတ်တော့သော ဗြိတိန်ကဲ့သို့ နိုင်ငံသားရှယ်ယာဝင်များအား မဲပေးခွင့်ကို ပယ်ဖျက်ထားပြီးဖြစ်သည်ဟု ဆိုသည်။
ကုမ္ပဏီ၏ ရှယ်ယာ ၄၅% သည် အမေရိကတွင် ရှိနေသည်။
အဆိုပါပိုင်ဆိုင်မှုကိန်းဂဏန်းများအား ဥရောပနိုင်ငံသားများပါဝင်နေသော ပိုင်ဆိုင်မှုများနှင့် ထိန်းညှိရန် လုပ်ဆောင်သွားမည်ဟုလည်း သိရသည်။

ကူးယူဖေါ်ပြခြင်းခွင့်မပြုပါ။
Source: The Guardian, Yahoo Finance, UK, BBC Business
Image: Forbes

November 2, 2021 by Min Thwe Kyaw Travel News 0

ဆီယက်တဲနှင့် ဗန်ကူးဗားခရီးစဉ်များ စင်ကာပူလေကြောင်းလိုင်း ပြန်လည်ပျံသန်းတော့မည်

ပစိဖိတ်အနောက်မြောက်ဒေသသို့ Singapore Airlines ၏ ခရီးစဉ်များရပ်နားထားသည်မှာ ၁၂ နှစ်ခန့်ရှိပြီဖြစ်သည်။
ယခုအခါတွင်တော့ အမေရိကန်ပြည်ထောင်စုနှင့် ကနေဒါ၏ အနောက်ဘက်ကမ်း မြို့များသို့ ၁ ပတ်လျှင် လေးကြိမ် ပြန်လည်ပြေးဆွဲတော့မည်ဖြစ်သည်။
အစောဆုံးခရီးစဉ်များမှာ ဒီဇင်ဘာလ အစတွင် ဖြစ်နိုင်ကြောင်း စင်ကာပူလေကြောင်းက ထုတ်ပြန်ထားသည်။
Singapore Airlines သည် Airbus ကုမ္ပဏီထုတ် A350 လေယာဉ်ကြီးများကို အသုံးပြုသွားမည်ဖြစ်ပြီး ခရီးသည် ၂၅၃ ယောက် တင်ဆောင်နိုင်မည်ဖြစ်သည်။

Singapore Airlines (SIA) သည် လေယာဉ်လက်မှတ်အမျိုးအစားများကို
Business Class – ၄၂ ခုံ
Premium Economy Class – ၂၄ ခုံ နှင့်
Economy Class – ၁၈၇ ခုံဟူ၍ သတ်မှတ်ထားမည်ဟုဆိုသည်။

ကနေဒါ – ဗန်ကူးဗား ခရီးစဉ်သည် ၁၄ နာရီ ကြာမြင့်မည်ဖြစ်ပြီး ဗန်ကူးဗားခရီးသည်များကို လေယာဉ်မှချပြီးလျှင် ဆီယက်တဲ-တာကိုးမား နိုင်ငံတကာလေဆိပ်သို့ ဆက်လက်ထွက်ခွါမည်ဟု သိရသည်။
စင်ကာပူ – ချန်ဂီလေဆိပ်သို့ ပြန်လည်ထွက်ခွါလျှင်လည်း ဆီယက်တဲမှ ခရီးသည်များကို ဦးစွာတင်ဆောင်ပြီးမှ ကနေဒါဘက်ခြမ်း ဗန်ကူးဗားသို့ ကူးမည်ဖြစ်သည်။
ပုံမှန်အားဖြင့် ဤသို့ အရှေ့နှင့် အနောက်ကမ္ဘာခြမ်းတို့ကို သွားသည့်ခရီးစဉ်မှာ အရှေ့အာရှ၏ အဓိကမြို့တော်များဖြစ်သော တိုင်ပေ၊ တောင်ကိုးရီးယား၏ အင်ချွန်း၊ ဟောင်ကောင် သို့မဟုတ် တိုကျိုတို့သာ ဦးဆောင်နေခဲ့သည်။

ယခုနှစ်မကုန်မီတွင်မူ စင်ကာပူလေကြောင်းအနေဖြင့် ပြိုင်ဘက်များနှင့် ပြန်လည်ယှဉ်ပြိုင်နိုင်သည့် အခြေအနေသို့ ရောက်ရှိလာပြီဖြစ်သည်။

ကူးယူဖေါ်ပြခြင်းခွင့်မပြုပါ။
Source: Simple Flying
Image: GCMap, BBC

October 13, 2021 by Min Thwe Kyaw News Travel 0

အော့ကလန်လော့ဒေါင်းကြောင့် နယူးဇီလန်လေကြောင်း ရုန်းကန်နေရ

ဩစတေးလျနယ်စပ်ဖြတ်ကျော်ခွင့်ပြန်ဖွင့်လျှင် ခရီးသွားလုပ်ငန်းတဟုန်ထိုးတိုးတက်မည်ဆိုသည်ကိုလည်း သံသယရှိ

Air New Zealand သည် ၎င်း၏ပြည်တွင်းလေကြောင်းခရီးစဉ်များကို ဝန်ဆောင်မှုပေးနိုင်သည့်ပမာဏ၏ ၃ ပုံ ၁ ပုံ ထက်ပင်လျော့နည်းသော အရေအတွက်ဖြင့် ပြေးဆွဲနေရသည်။
နယူးဇီလန်၏အကြီးဆုံးမြို့ဖြစ်သော အော့ကလန်အား ကိုဗစ်-၁၉ ကြောင့် အသွားအလာကန့်သတ်သည့် လော့ဒေါင်းချထားသည်မှာ ရက် ၅၀ ကျော်လာခဲ့ပြီဖြစ်သည်။
Auckland နှင့် Waikato မြို့၏ နေရာအတော်များများအား သတိပြုရန်အဆင့် ၃ အဖြစ် အစိုးရက သတ်မှတ်ထားသည်။

ထို့ပြင် ဩစတေးလျနိုင်ငံမှ နယ်စပ်ဖြတ်ကျော်ခွင့်များ ပြန်လည်ခွင့်ပြုမည့်အချိန်တွင် စီးပွားရေးလုပ်ငန်းများ လည်ပတ်လာပြီး ခရီးသွားလာမှု တဟုန်ထိုးပြန်လည်မြင့်တက်မည်ဆိုသော Travel Bubble ယူဆမှုများအား ယုံကြည်မှုနည်း၍ သံသယရှိနေသည်ဟု Air New Zealand ၏ အမှုဆောင်အရာရှိချုပ်က ကြာသပတေးနေ့တွင်ပြောကြားခဲ့သည်။

“ကျွန်တော်တို့က အော့ကလန်မြို့ကလွဲလို့ တခြားနေရာတွေမှာပဲ ၁၀၀% အလုပ်လုပ်နေရပါတယ်။ အဆင်ပြေတဲ့ လုပ်ငန်းလည်ပတ်မှုဆိုပေမယ့် အော့ကလန်က ပြည်တွင်းလေကြောင်းခရီးရဲ့ ၃ ပုံ ၂ ပုံ စာ ကွန်ယက်ဆက်သွယ်နေတဲ့ မြို့ပါ။ အဲ့တော့ Auckland ကို ချန်ထားရတဲ့အခါ လုပ်ငန်းအပေါ် ထိခိုက်မှုက တော်တော်လေး များပါတယ်” ဟု အမှုဆောင်အရာရှိ ဂရက်ဖိုရန် (Greg Foran) က ဆိုသည်။

လေကြောင်းလိုင်းသည် အော့ကလန်မြို့အား လော့ဒေါင်းစတင်ချသည့်အချိန်မှစ၍ တလလျှင် နယူဇီလန်ဒေါ်လာ ၂၅ သန်းမျှ ဆုံးရှုံးနေသည်ဟု ဆိုသည်။
ပစိဖတ်ဒေသရှိ ကျွန်းနိုင်ငံငယ်ကလေးသည် ပြီးခဲ့သည် ကပ်ဘေးတလျှောက်လုံး ကိုဗစ် ကူးစက်မှု သုညအထိ လျှော့ချနိုင်ခဲ့သည့် နိုင်ငံများထဲတွင် အပါအဝင်ဖြစ်ခဲ့သည်။
သို့သော်လည်း မျိုးဗီဇကွဲ အသစ် ဒယ်တာ ပေါ်လာပြီးနောက်ပိုင်း ဩဂုတ်လလယ်ခန့်မှစ၍ ကူးစက်မှုများ ပြန်လည်ဖြစ်ပွားခဲ့သည်။

ယင်းမတိုင်ခင်က ကပ်လျက်အိမ်နီးချင်း ဩစတေးလျနှင့် လေကြောင်းခရီး အနည်းငယ်အလုပ်ဖြစ်နေပြီး ကိုဗစ် ဒယ်တာ ဝင်လာချိန်မှစ၍ လေကြောင်းလိုင်းသည် နယူဇီလန်ဒေါ်လာ သန်း ၂၀ မှ ၂၅ သန်း အထိ လစဉ်ထိခိုက်ခဲ့သည်။
ကုမ္ပဏီသည် ဇွန်လ ၃၀ တွင်ကုန်ဆုံးခဲ့သည့် ဘဏ္ဍာရေးနှစ်အတွက် ဝင်ငွေပိုင်းနှင့်ပတ်သက်သော ညွှန်ကြားချက်များကို စိန်ခေါ်မှုများရှိနေသော ဈေးကွက်အခြေအနေကြောင့် ယာယီဆိုင်းငံ့ထားသည်ဟု သိရသည်။

(ကန် ၁ ဒေါ်လာ လျှင် နယူဇီလန် ၁.၄၄၅၃ ဒေါ်လာ ပေါက်ဈေးရှိနေသည်။)

ကူးယူဖေါ်ပြခြင်းခွင့်မပြုပါ။
Source: Reuters Business, Money US News, COVID19 Government NZ, The Conversation
Image: An Air New Zealand passenger jet taxis at Sydney’s airport September 17, 2001. Mark Baker/File PhotoREUTERS

October 8, 2021 by Min Thwe Kyaw News Travel 0

Qantas လေကြောင်း ကပ်ဘေးကြောင့်ထိခိုက်မှု ကြီးမားနေဆဲဖြစ်

ဩစတေးလျအခြေစိုက် Qantas လေကြောင်းလိုင်းသည် ကိုရိုနာဗိုင်းရပ်ကပ်ဘေးကြောင့် စီးပွားရေးထိခိုက်နေဆဲဖြစ်ကြောင်း ဆုံးရှုံးမှုပမာဏကို ထုတ်ပြန်ခဲ့သည်။
ကုမ္ပဏီသည် ယခု ၂၀၂၀-၂၀၂၁ ဘဏ္ဍာရေးနှစ်တွင် ဆုံးရှုံးမှု ဒေါ်လာ ၁.၇၃ ဘီလျံ အထိ ရှိခဲ့သည်ဟု ကြေညာခဲ့သည်။

အဆိုပါပမာဏမှာ ယမန်နှစ် ၂၀၁၉-၂၀၂၀ ဘဏ္ဍာရေးနှစ်တွင် ဆုံးရှုံးခဲ့သော ဒေါ်လာ ၁.၉၆ ဘီလျံနှင့် ယှဉ်လျှင် အနည်းငယ်သက်သာသည်ဟု ပြောနိုင်သည်။
ယခင် ဘဏ္ဍာရေးနှစ်မှာ ကပ်ဘေးကာလ အဆိုးဆုံးအခြေအနေဖြစ်ခဲ့ပြီး လေကြောင်းလိုင်းအနေဖြင့် ဆုံးရှုံးမှု သက်သာစေရန် စရိတ်လျှော့ချခြင်း၊ ဝန်ထမ်းများအား အလုပ်မှရပ်နားခြင်း စသည်တို့ကို အကြီးအကျယ်ပြုလုပ်ခဲ့ရသည်။
ကပ်ဘေးကြောင့် ကမ္ဘာတဝှမ်းစီးပွားရေးထိခိုက်ရာတွင် လေကြောင်းလိုင်းအားလုံးမှာ အဆိုးဆုံးအခြေအနေဖြစ်ခဲ့ပြီး နိုင်ငံဖြတ်ကျော်ခရီးစဉ်များ ရပ်နားခဲ့သည်။
ဩစတေးလျသည် Zero Cast Strategy ကိုဗစ် ကူးစက်မှု လုံးဝမရှိစေရန် ဆောင်ရွက်သော၊ စည်းမျဉ်းများ ပြင်းပြင်းထန်ထန်ထုတ်ပြန်သည့် နိုင်ငံများထဲတွင် ပါဝင်ခဲ့သည်။

နောက်ပိုင်းမှသာ ဩစတေးလျနှင့် အနီးဆုံး နယူးဇီလန်သို့ လေယာဉ်အပြန်အလှန် ပျံသန်းခွင့်ပြုခဲ့ရာ Qantas အနေဖြင့် ကူကယ်ရာ ကောက်ရိုးတမျှင် ရရှိခဲ့သည်။
ယခုနှစ် ခရစ်စမတ်ကာလအား Qantas အနေဖြင့် အကောင်းမြင်ကာ မျှော်လင့်လျက်ရှိသည်။
လေကြောင်း၏ အမှုဆောင်အရာရှိချုပ် Alan Joyce က “နိုင်ငံတကာကို ပျံသန်းဖို့ကိစ္စက အစိုးရအပေါ် လုံးဝမူတည်နေပါတယ်။ စီးပွားရေးပြန်ဖွင့်လှစ်လိုက်ရင် ဘာပြဿနာတွေ ရှုပ်ထွေးလာမလဲဆိုတာကို ကျွန်တော်တို့အနေနဲ့ ကြိုပြင်ထားရမှာပါ” ဟု ပြောကြားခဲ့သည်။

“တချို့လူတွေက ကျွန်တော်တို့ကို အရမ်းအကောင်းမြင်လွန်းနေတယ်လို့ထင်ကြမှာပါ။ ဒါပေမယ့် ကာကွယ်ဆေးထိုးနေတဲ့ အပေါ် အခြေတည်ပြီး စဉ်းစားနေတာပါ။ ကျွန်တော်တို့ အဆင့်သင့်ဖြစ်ပြီဆိုတာ သေချာသလောက်ရှိပြီဆိုတဲ့ အခြေအနေရောက်နေပါပြီ” ဟု သူက ဆိုသည်။
နိုင်ငံတကာခရီးစဉ်များအတွက် Qantas စီစဉ်ထားသည့် ကနဦး လမ်းကြောင်းများမှာ စင်ကာပူ၊ အမေရိကန်ပြည်ထောင်စု၊ ကနေဒါ တို့ပါဝင်ပြီး နယူးဇီလန်နှင့် ခရီးစဉ်များလည်း ပိုမိုတိုးတက်လာမည်ဟု မျှော်လင့်လျက်ရှိသည်။

ကူးယူဖေါ်ပြခြင်းခွင့်မပြုပါ။
Source: ABC Australia, BBC Business
Image: Simple Flying

August 27, 2021 by Min Thwe Kyaw Travel News 0

လစာမဲ့ခွင့်ဖြင့် ဝန်ထမ်း ၁၄,၀၀၀ ရပ်နားခံနိုင်ရကြောင်း United လေကြောင်းထုတ်ပြန်

အမေရိကန်ပြည်ထောင်စုရှိ United Airlines သည် နောက်ထပ် ဝန်ထမ်း ၁၄,၀၀၀ ကို လစာမဲ့ခွင့်ဖြင့် ရပ်နားရမည့် အခြေအနေရောက်လာကြောင်း သောကြာနေ့က ထုတ်ပြန်ခဲ့သည်။
ကုမ္ပဏီသည် သမ္မတသစ် ဂျိုးဘိုင်ဒင်နှင့် ကန်လွှတ်တော်အား နောက်ထပ် ဒေါ်လာ ၁၅ ဘီလျံကို အစိုးရအထောက်အပံ့ဖြင့် ကူညီရန်တောင်းပန်ထားပြီး ထိုအကူအညီရမှသာ ဝန်ထမ်းများကို လာမည့် စက်တင်ဘာ ၃၀ အထိ ဆက်လက်အလုပ်ပေးထားနိုင်မည်ဟု ဆိုသည်။

ချီကာဂိုအခြေစိုက် လေကြောင်းကုမ္ပဏီသည် လစာပေးချေရန် အစိုးရမှ ထောက်ပံ့ကြေးရရှိခဲ့မှုများသည် ဧပြီ ၁ ရက်နေ့တွင် ပြီးဆုံးမည်ဖြစ်ကြောင်းကိုလည်း သတိပေးထားခဲ့ဖူးသည်။
လေကြောင်းနယ်ပယ်အား ကပ်ဘေးကြောင့် ထိခိုက်ခဲ့မှုများ၏ အကျိုးဆက်အနေဖြင့် သိသာသော အလုပ်လျှော့ချမှုများကို ထပ်မံလုပ်ဆောင်ရန် ဖိအားများပြားနေခဲ့သည်ဟု ဆိုသည်။
ကန်အစိုးရက လေကြောင်းလုပ်ငန်းများအား ဒေါ်လာ ၁၅ ဘီလျံ ထောက်ပံ့သည့် အချိန်တွင် United လေကြောင်းသည် ၎င်း၏ လစာမဲ့ခွင့်ဖြင့် နားနေရသော ဝန်ထမ်း ၁၃,၀၀၀ ကို ပြန်လည်ခေါ်ယူကာ လစာငွေပေးချေနိုင်ခဲ့သော်လည်း ယင်းမှာ လာမည့် မတ်လ အထိသာ ခံမည်ဖြစ်သည်။

ကာကွယ်ဆေးများ ဖြန့်ချိနေခြင်းများ ဆက်လက်ပြုလုပ်နေသည်မှာမှန်သော်လည်း လေကြောင်းခရီးသွားများ၏ လက်မှတ်ဝယ်ယူမှုများ တိုးတက်လာခြင်းမရှိဟု United က ဆိုသည်။
ကန်အစိုးရသည် ယခင် ဒေါ်လာ ၁၅ ဘီလျံ ထောက်ပံ့မှုကို ပြီးခဲ့သည့် ဒီဇင်ဘာတွင် ပြုလုပ်ခဲ့ခြင်းဖြစ်ကာ လေကြောင်းကုမ္ပဏီများရှိ ဝန်ထမ်းပေါင်း ၃၂,၀၀၀ ခန့်ကို ပြန်လည် လစာငွေပေးချေနိုင်ခဲ့သည်။
အလုပ်သမားသမဂ္ဂ ၂ ခုမှ ခေါင်းဆောင်များသည် ၎င်းတို့၏ လေယာဉ် မောင်၊မယ်ပေါင်း ၇၅,၀၀၀ ကို ကိုယ်စားပြု၍ လစာရရှိနိုင်ရန် ထောက်ပံ့မှုများဆက်လက်ပြုလုပ်ပေးဖို့ လွှတ်တော်သို့ စာပေးပို့ အကူအညီတောင်းခံခဲ့သည်။
ယခုတကြိမ် ဒေါ်လာ ၁၅ ဘီလျံ ထောက်ပံ့ပါက လာမည့် စက်တင်ဘာလအထိ ငွေပေးချေနိုင်မည်ဟုလည်း ရှင်းလင်းခဲ့သည်။

အလုပ်သမားသမဂ္ဂများမှ ခေါင်းဆောင်များဖြစ်သည့် Sara Nelson နှင့် Julie Hedrick တို့က ဧပြီလမှ စတင်၍ အလုပ်လျှော့ချမှုများကို အကြီးအကျယ်တွေ့မြင်ရတော့မည်ဟု ပြောကြားခဲ့သည်။
အခြား လေကြောင်းလိုင်းတခုဖြစ်သော American Airlines သည် ပြီးခဲ့သည့် အောက်တိုဘာလတွင် ဝန်ထမ်းပေါင်း ၁၉,၀၀၀ ကို လစာမဲ့ခွင့်ဖြင့် ရပ်နားစေခဲ့သည်။
Hawaiian Airlines လေကြောင်းသည် ၎င်း၏ ဝန်ထမ်း ၉၀၀ ကို လစာမဲ့ခွင့်ဖြင့် အနားပေးခံရနိုင်ကြောင်း သတိပေးစာများ ထုတ်ပြန်ပြီးဖြစ်သည်ဟု သိရသည်။

American Airlines မှ အမှုဆောင်အရာရှိချုပ်ဖြစ်သူ ဒေါက် ပါကား (Doug Parker) က ဧပြီလ ၁ ရက်နေ့သည် နီးကပ်လာပြီဖြစ်ကြောင်း၊ လက်မှတ်ရောင်းအား တက်လာသည်ကို မမြင်ရသေးကြောင်း၊ ထို့ကြောင့် ဤပြဿနာကို ဖြေရှင်းရန် သေချာပေါက်လိုအပ်ပြီဖြစ်ကြောင်းများကို ကြာသပတေးနေ့က ပြောကြားခဲ့သည်။
၎င်းတို့အနေဖြင့် အကူအညီအထောက်အပံ့များရရှိရန် လွှတ်တော်ရှိတာဝန်ရှိသူများကို စတင်ပြောကြားနေပြီဖြစ်သည်ဟု ဆိုသည်။

ကူးယူဖေါ်ပြခြင်းခွင့်မပြုပါ။
Source: Reuters Business, CNBC Business
Image: WSJ

January 30, 2021 by Min Thwe Kyaw News Travel 0

လာမည့် နွေရာသီအတွက် EasyJet ကြိုတင်လက်မှတ်အရောင်း ၂၅၀% မြင့်တက်

ဗြိတိန်၊ လူတန်တောင်း အခြေစိုက် EasyJet သည် လာမည့် ဇွန်လအကုန်တွင် ကျရောက်မည့် နွေရာသီကာလအတွက် ကြိုတင်လက်မှတ်ရောင်းချရမှု ယခင်နှစ်နှင့်ယှဉ်လျှင် ၂၅၀% မြင့်တက်ခဲ့သည်။
ဤအချင်းအရာကြောင့် ဗြိတိန်နှင့် အခြားသော ဥရောပနိုင်ငံများအကြား အသွားအလာကန့်သတ်ထားမှုများ ဖြေလျော့ချိန်တွင် လေကြောင်းခရီးသွားလုပ်ငန်းအတွက် မျှော်လင့်ချက်ရှိစရာအဖြစ်လာသည်။
EasyJet ၏ အမှုဆောင်အရာရှိချုပ်ဖြစ်သူ Johan Lundgren က ကိုရိုနာဗိုင်းရပ်အလွန်ကာလတွင် ခရီးသွားလုပ်ငန်းများအဆင်ပြေလာမည်ဟု ယုံကြည်နေသည်ဟု ဆိုသည်။

“အခြေအနေပေးပြီဆိုတာနဲ့ လူတွေက အားလပ်ရက် ခရီးတွေသွားကြတော့မယ်ဆိုတာ ကျွန်တော်တို့ သိပါတယ်” ဟု သူက ဆိုသည်။
မေလ သည် အားလပ်ရက်များအတွက် ရေပန်းအစားဆုံး ဖြစ်နေသည်ဟု ပြောကြားခဲ့သည်။
ဥရောပနိုင်ငံများအကြား အသွားအလာထိန်းချုပ်ထားသော စည်းမျဉ်းများတင်းကြပ်ခြင်း၊ လေကြောင်းခရီးစဉ်များပိတ်သိမ်းထားခြင်း၊ ဥရောပမှ ခွဲခွာပြီးဖြစ်သည့် ဗြိတိန် စသည့်အကြောင်းအရာများကြောင့် ဗြိတိန်လေကြောင်းကုမ္ပဏီများမှာ ၂၀၂၁ စသည်နှင့်ပင် ဖိအားများ စုပြုံနေသည်။

ပြီးခဲ့သည့် နှစ်တွင် British Airways, Virgin Atlantic, EasyJet စသည့် လေကြောင်းလိုင်းများအားလုံး ဝန်ထမ်ဦးရေ ထောင်နှင့်ချီ လျှော့ချခဲ့ရသည်။
ပြီးခဲ့သည့် သီတင်းပတ်တွင်ပင် Norwegian Airline သည် ဝန်ထမ်း ၁ ထောင် လျှော့ချခဲ့ပြီး ခရီးရှည်ပျံသန်းသည့် ခရီးစဉ်များကိုလည်း ဖျက်သိမ်းပြီဖြစ်ကြောင်း ကြေညာခဲ့သည်။

မစ္စတာ လန်ဂရမ် (Lundgren) က ကာကွယ်ဆေးထိုးနှံမည့် အစီအစဉ်သည်သာ ခရီးသွားလာရေးလုပ်ငန်းပြန်လည်စတင်ရန် အဓိကကျသည့် အရာဖြစ်လာသည်ဟု ပြောကြားခဲ့သည်။
လေယာဉ်ပေါ်မတက်မီ ကိုရိုနာဗိုင်းရပ် ဆေးစစ်မှုများသည်လည်း ပုံမှန်လုပ်ငန်းစဉ်ထဲတွင် ပါဝင်လာပြီး အတားအဆီးဖြစ်စေသည့် အရာများထဲတွင် ပါဝင်နေသေးသည်ဟု ဆိုသည်။
ပိုးစစ်ဆေးရာတွင် နေရာအများစု၌ ၇၅ ပေါင် ခန့် ကုန်ကျနေပြီး အချို့သောနေရာများတွင် ပေါင် ၁၅၀ ခန့်ပင် စရိတ်ရှိနေရာ အလွန်ဈေးကြီးနေဆဲ အခြေအနေဖြစ်သည်။
ဗြိတိန်အတွင်းဝင်ရောက်လာသည့် ခရီးသည်များသည် ၇၂ နာရီအတွင်း ကိုရိုနာဗိုင်းရပ်ပိုးကင်းစင်ကြောင်း စစ်ဆေးထားခြင်းကို ပြသရန်လိုအပ်ပြီး ဗြိတိန်အတွင်း ရောက်ရှိပြီးချိန်တွင်လည်း အများဆုံး ၁၀ ရက်ခန့် တကိုယ်တည်း နေထိုင်ရမည်ဖြစ်သည်။

လန်ဒန်မြို့ ဟိသရိုးလေဆိပ်တွင် ဆိုက်ရောက်ချိန်၌ ပတ်စပို့ ကြီးကြပ်ရေးများကို အချိန်ယူလုပ်ဆောင်နေသောကြာင့် ကြာမြင့်ချိန် ၁ နာရီနှင့် အထက် စောင့်ဆိုင်းရမှုများ ရှိနေသည်ဟု သိရသည်။

ကူးယူဖေါ်ပြခြင်းခွင့်မပြုပါ။
Source: BBC Business, EasyJet
Image: Reuters

January 19, 2021 by Min Thwe Kyaw Travel 0