နိုင်ငံရေးအခြေအနေများနှင့် လတ်တလောဖြစ်ပျက်ခဲ့သည့် ဝက်ဂနာအဖွဲ့ပုန်ကန်မှုများကြောင့် ရှရှားရူဘယ်တန်ဖိုးမှာ ဒေါ်လာနှင့်ယူရိုဖလှယ်ရေးစျေးကွက်တွင် တန်ဖိုးကျဆင်းနေပြီး ၁၅လအတွင်း အနိမ့်ဆုံးတန်ဖိုးဖြစ်သည်။
ယမန်နေ့စျေးကွက်ပေါက်စျေးအရ ဒေါ်လာ-ရူဘယ် စျေးကွက်တွင် ၀.၈ ရာခိုင်နှုန်းကျဆင်းသွားပြီး ၁ဒေါ်လာလျှင် ၈၈.၂၆ ရူဘယ်အထိ ဖြစ်နေပြီး ယူရိုနှင့်မူ ၀.၉ ရာခိုင်နှုန်းကျဆင်းပြီး ၁ယူရိုလျှင် ၉၅.၉၇ ရူဘယ် ပေါက်စျေးရှိနေသည်။
လက်ရှိတွင်.ကမ္ဘာ့ ရေနံစျေးကွက်မှာ တည်ငြိမ်နေသော်လည်း ရူဘယ်တန်ဖိုးမှာ.ဆက်လက်ကျဆင်းနေဦးမည်ဟု စျေးကွက်ကျွမ်းကျင်သူများက သုံးသပ် ထားပြီး ၁ဒေါ်လာလျှင် ၉၀ရူဘယ်အထိ ရောက်သွားနိုင်ကြောင်း ခန့်မှန်းထားကြသည်။
ရုရှားအစိုးရသည် ယူကရိန်းကျူးကျော်စစ် စတင်သည့်အချိန်မှစကာ အနောက်နိုင်ငံများ၏ အရေးယူပိတ်ဆို့မှုများအတွင်း ရူဘယ်တန်ဖိုးကျမသွားစေရန်တတ်နိုင်သမျှ ကျားကန်ခဲ့သော်လည်း လတ်တလောဖြစ်ပွားခဲ့သည့် ရုရှားကြေးစားစစ်တပ် ပုန်ကန်မှုသည် ပူတင်၏ ခေါင်းဆောင်နေရာကို များစွာမေးခွန်းထုတ်ခဲ့ပြီး စျေးကွက်မတည်ငြိမ်မှုကို ဆက်လက်ဦးတည်စေခဲ့သည်။
ပုံမှန်အားဖြင့် ရူဘယ်ကို အားကောင်းစေရန် အထောက်အပံ့များထဲမှ တစ်ခုမှာ ရုရှားပို့ကုန်လုပ်ငန်းရှင်များ အခွန်ဆောင်ချိန်ဖြစ်ပြီး ထိုအချိန်တွင် ကုမ္ပဏီများသည် ၎င်းတို့ပိုင် နိုင်ငံခြားငွေကြေးများကို အခွန်အခနှင့် ပြည်တွင်းငွေလွှဲပြောင်းမှုများမတွက် ရူဘယ်သို့ပြောင်းလေ့ရှိကြပြီး ယခုအခါ အဆိုပါ ကဏ္ဍမှာလည်း အားနည်းလာကြောင်း သိရသည်။
ရုရှားရေနံစျေးကွက်အတွက် အရေးပါသော Brent ရေနံစိမ်းစျေးကွက်တွင် ကမ္ဘာ့ရေနံစျေးနှုန်းမှာ ရေနံစိမ်း၁စည်လျှင် ၇၄.၇၀ ဒေါ်လာဖြင့် ၀.၄ရာခိုင်နှုန်း စျေးတက်သော်လည်း ရုရှားစတော့စျေးကွက်တွင်တော့ အကျဘက်သာ ပြနေခဲ့သည်။
ရုရှားအစိုးပိုင် Gazprom ရေနံနှင့်ဓါတုကုမ္ပဏီသည်လည်း ၂၀၂၂ခုနှစ်အတွက် ရှယ်ယာအမြတ်ငွေများကို ထုတ်ပေးခြင်းဆိုင်းငံ့ထားရန်ဘုတ်အဖွဲ့က ဆုံးဖြတ်ပြီးနောက် ရှယ်ယာစျေးများ ၀.၇ရာခိုင်နှုန်းကျဆင်း သွားသည်ဟု သိရသည်။
ကူးယူဖော်ပြခွင့်မပြုပါ။
Source: Reuters
Photo: CBS news
