ယခုနှစ်တွင် စူရတ်ဌာနီသို့​ နိုင်ငံခြားခရီးသွား​ဝင်ရောက်မှု ၁သန်းခွဲပြည့်မြောက်

ထိုင်းနိုင်ငံတောင်ပိုင်းရှိ​ ခရီးသွားဒေသတစ်ခုဖြစ်သော စူရတ်ဌာနီသို့ နိုင်ငံခြားခရီးသွားဝင်ရောက်မှုမှာ​ယခုနှစ်တွင် ၁သန်းခွဲပြည့်မြောက်ခဲ့ပြီဖြစ်ပြီး ယမန်နှစ်ကာလတူ ဝင်ရောက်မှုနှင့် နှိုင်းယှဥ်ပါက ၁၅၅ရာခိုင်နှုန်းအထိ ခရီးသွားဦးရေမြင့်တက်ခဲ့ခြင်းဖြစ်ကြောင်း​ သိရသည်။

ယခုနှစ်ဇန်နဝါရီမှ​ စတင်၍ လက်ရှိအချိန်အထိ စူရတ်ဌာနီသို့​ ခရီးသွားဦးရေ ၂.၀၅သန်း ဝင်ရောက်ခဲ့ပြီး ၎င်းတို့တွင်မှ​ တသန်းခွဲမှာ​ နိုင်ငံ​တကာခရီးသွားများဖြစ်ကြောင်း စူရတ်ဌာနီ ပြည်နယ်အုပ်ချုပ်ရေးမှူး ဝီချာဝတ်ဂျင်တိုက ပြောကြားခဲ့သည်။

ကမ္ဘာ​လှည့်ခရီးသွားများအနေဖြင့် ဟိုတယ်၊ အစားအသောက်၊ အမှတ်တရပစ္စည်း၊ ဖျော်ဖြေ​ရေးနှင့်​ သယ်ယူပို့ဆောင်ရေးတို့တွင်​ ငွေသုံးစွခဲ့ကြပြီး လက်ရှိအချိန်တွင် ဝင်ငွေစုစုပေါင်း ဘတ်၃၅.၉​ဘီလီယံ​ရရှိထားသည်ဟု အုပ်ချုပ်ရေးမှူး ကဆိုသည်။

ဟိုတယ်ငှါးရမ်းမှု ရာခိုင်နှုန်းမှာလည်း ယမန်နှစ်​နှင့်ယှဥ်ပါက ၇၇ရာခိုင်နှုန်းမြင့်တက်ခဲ့ပြီး ပျမ်းမျှအားဖြင့် ခရီးသာ်တစ်ဦးလျှင် ၄.၈​ညခန့် တည်းခိုကြောင်း အချက်အလက်များက ဖော်ပြနေသည်။

စူရတ်ဌာနီ​အနေဖြင့်​ သဘာဝအတိုင်းကျန်နေသေးသည့် ပင်လယ်ကမ်းခြေ အလှအပများကြောင့်​နိုင်ငံ​တကာ ခရီးသွားများအကြား​ ကျော်ကြားသည့် အပန်းဖြေ​နေရာတစ်ခုအဖြစ်ရပ်တည်လျက်ရှိပြီး ကုန်ကျစရိတ်မှာလည်း ကျန်နေရာများနှင့် ယှဥ်ပါက သင့်တော်သည့် စျေးနှုန်းရှိခြင်းကြောင့်.ဖြစ်ကြောင်း​မစ္စတာ​ဝီချာဝတ်က ဂုဏ်ယူစွာဖြင့် ပြောကြားခဲ့သည်။

စူရတ်ဌာနီ​တွင်.နာမည်ကျော် ကော့စမွီကျွန်းကဲ့သို့​သာယာလှပသည့် အဓိကရနေရာများအပြင် ကော့ဖငမ်း( Koh​ Phangan) ရှိ​ လပြည့်ညပါတီတို့မှာ နာမည်ကျော်ကြားပြီး နိုင်ငံ​တကာခရီးသွားများကို အစွဲဆောင်နိုင်ဆုံးဖြစ်သည်။

အဆိုပါ​ လပြည့်ညပါတီမှာ ကော့ဖငမ်းတွင် လတိုင်းနီးပါးရှိ၍ ကမ်းခြေရှိ လဟာပြင်ကွင်းကြီးထဲတွင် နာမည်ကျော်ဒီဂျေများဖြင့် ကျင်းပခြင်းဖြစ်ကာ စူရတ်ဌာနီသို့​ဝင်ရောက်သည့် ခရီးသွားအများစု၏ အဓိကနေရာဖြစ်ကြောင်း​ ပြည်နယ်​အုပ်ချုပ်​ရေးမှူး​က​ ဖြေကြားခဲ့သည်။

ကူးယူ​ဖော်ပြ​ခွင့်မပြုပါ။

Source: Bangkok Post

Photo: xyzAsia