Sports

Sports Category

Man U ကိုဝယ်မှာနောက်တာဟု Elon Musk ဆို

ကမ္ဘာ့အချမ်းသာဆုံးသူဌေးကြီး Elon Musk သည် လက်ရှိအချိန်၌ ရုန်းကန်နေရသည့် အင်္ဂလိပ်ဘောလုံးကလပ် Manchester United Plc အားဝယ်ယူမည်ဟု Twitter ပေါ်တွင်ရေးသားခဲ့ပြီးနောက် နောက်ပြောင်ခြင်းသာဖြစ်ကြောင်း ဗုဒ္ဓဟူးနေ့ အစောပိုင်းကပြောကြားခဲ့သည်။

ကလပ်အားဝယ်ယူမည့်သတင်းနှင့်ပတ်သက်၍ “ကျွန်တော်နောက်တာပါ၊ ဘယ်အားကစားအသင်းကိုမှဝယ်ဖို့စိတ်ကူးမရှိပါဘူး။ အကယ်၍ ဝယ်ဖြစ်ခဲ့ရင် Man U ပဲဖြစ်မှာပါ၊ ဘာ့ကြောင့်လဲဆိုတော့ ငယ်စဉ်ဘဝက ကျွန်တော်အကြိုက်ဆုံးအသင်းဖြစ်ခဲ့လို့ပါပဲ” ဟုပြန်လည်ဖြေကြားခဲ့သည်။

Musk သည် ယခုရက်ပိုင်းခန့်က “Manchester United” ကိုဝယ်ယူလိုက်ပြီဖြစ်ကြောင်း Twitter ပေါ်တွင်ရေးသားခဲ့သည်။ မျှော်လင့်ချက်မဲ့ပြီး စိတ်ပျက်နေသော Man U fan အချို့က ကလပ်အား Musk ဝယ်ယူရန် ယခင်တည်းက Twitter ကတဆင့်တိုက်တွန်းခဲ့ဖူးသည်။

Musk သည် Twitter ပေါ်တွင် မထင်မှတ်ထားသည့်နောက်ပြောင်မှုများ ပြုလုပ်တတ်လေ့ရှိပြီး တခါတရံ နောက်ပြောင်နေခြင်းသာဖြစ်ကြောင်း ပြောပြရန်ခက်ခဲစေသည့်အချိန်အခါများလဲ ရှိခဲ့သည်။

Twitter ကုမ္ပဏီအားဝယ်ယူရန် Musk ၏ကမ်းလှမ်းချက်ကို Twitter ဘုတ်အဖွဲ့ကလက်ခံခဲ့ပြီး ၂ ရက်အကြာတွင် Musk က နောက်တကြိမ်တွင် ကိုကင်းထည့်ဖို့ Coca-Cola အားဝယ်ယူမည်ဟု ရေးသားခဲ့သည်။ ထို့နောက် နောက်ပြောင်ခဲ့ခြင်းသာဖြစ်ကြောင်း ပြန်လည်တုန့်ပြန်ခဲ့သည်။

ကူးယူဖော်ပြခြင်းခွင့်မပြုပါ။
Source: Reuters New
Photo: Getty Images

အစိုးရတင်းကြပ်ထိန်းချုပ်မှုများရှိသော်လည်း ကမ္ဘာ့အကြီးဆုံး e-sport ဈေးကွက်ဖြစ်နေဆဲတရုတ်

တရုတ်အစိုးရက စည်းကမ်းတင်းကြပ်စွာချမှတ်ထားသော်လည်း တရုတ်နိုင်ငံ၏ e-sports (ဂိမ်း)ဈေးကွက်သည် တစ်နှစ်ထပ်တစ်နှစ်ကြီးထွားလျက်ရှိပြီး ၂၀၂၁ ခုနှစ်တွင် ၁၄% တိုးတက်လာခဲ့သည်။ E-sports ဟုဆိုရာတွင် ပရော်ဖက်ရှင်နယ်ဂိမ်းကစားခြင်း၊ တိုက်ရိုက်ထုတ်လွှင့်ခြင်းတို့ပါဝင်သည်။

တရုတ်နိုင်ငံသည် ၂၀၂၁ ခုနှစ်တွင် e-sports မှ ဝင်ငွေဒေါ်လာ ၄၀၃.၁ မီလီယံဖြင့် ကမ္ဘာ့အကြီးဆုံးဈေးကွက်အဖြစ်ရပ်တည်လျက်ရှိသည်။ အစိုးရက ယခင်နှစ်မှစ၍ အသက် ၁၈ အောက်လူငယ်များအား တပတ်လျှင် ၃ နာရီထပ် ဂိမ်းကစားခြင်းမပြုရန် တားမြစ်ခဲ့သည်။ ထို့အပြင် ဖြန့်ဖြူးခြင်း ဂိမ်းမှရရှိသည့်ဝင်ငွေများကန့်သတ်ထိန်းချုပ်ခြင်းများကိုလဲ ပြုလုပ်ခဲ့သည်။ ထို့ကြောင့် NetEase နှင့် Tencent စသည့်တရုတ်အကြီးဆုံးဂိမ်းကုမ္ပဏီကြီးများအပေါ် ထိခိုက်နစ်နာမှုများရှိစေခဲ့သည်။

တရုတ် e-sports ဈေးကွက်မှာ ကောင်းမွန်စွာတည်ရှိနေသော်လည်း အစိုးရချုပ်ချယ်မှုများက အနာဂတ် ပရော်ဖက်ရှင်နယ်ဂိမ်းသမားများအပေါ်ဆိုးရွားသော သက်ရောက်မှုများဖြစ်ပေါ်စေသည်ဟု ဝေဖန်ထားကြသည်။ အရှေ့တောင်အာရှ၏ ဝင်ငွေအကောင်းဆုံး e-sports ဈေးကွက်တွင် ဂျပန်နှင့်တောင်ကိုရီးယားနိုင်ငံတို့လဲပါဝင်သည်။ တရုတ်က ချုပ်ချယ်ကန့်သတ်မှုများပြုလုပ်နေသော်လည်း ကျန်နိုင်ငံများကတော့ လျှင်မြန်စွာတိုးတက်ကြီးထွားလျက်ရှိသည်။

Greater southeast Asia ၏ e-sports ဝင်ငွေစုစုပေါင်းသည် တစ်နှစ်ထပ်တစ်နှစ် ၂၇.၃% တိုးတက်ခဲ့ပြီး ၂၀၂၁ ခုနှစ်တွင် ဒေါ်လာ ၈၀.၁ သန်းရှိသည်။ အိန္ဒိယသည် ယခင်နှစ်ထပ် e-sports ဝင်ငွေ ၂၆% တိုးတက်ခဲ့ပြီး ဒေါ်လာသန်း ၂၀.၃ သန်းရရှိခဲ့သည်။

ကူးယူဖော်ပြခြင်းခွင့်မပြုပါ။
Source: CNBC, BBC Business
Photo: Getty Images

ချဲလ်ဆီးအသင်းရောင်းချခြင်း လာမည့်တနင်္လာနေ့တွင် အပြီးသတ်စာချုပ်ချုပ်ဆိုမည်

ချဲလ်ဆီးအသင်းပိုင်ရှင် Roman Abramovich သည်ရုရှားသမ္မတ ဗလာဒီမာပူတင်နှင့်ပတ်သက်ဆက်နွယ်မှုများရှိနေသောကြောင့် ဒဏ်ခတ်အရေးယူသည့်အနေဖြင့် ပြီးခဲ့သည့်မတ်လက အစိုးရက ချဲလ်ဆီးအသင်းအား Abramovich ထံမှလက်လွှဲ ရောင်းချစေခဲ့သည်။ လက်ရှိတွင် ကလပ်သည် အစိုးရအထူးလိုင်စင်အောက်တွင် လည်ပတ်လျက်ရှိပြီး လာမည့် မေလ ၃၁ ရက်နေ့တွင် သက်တမ်းကုန်ဆုံးမည်ဖြစ်သည်။

ထို့နောက် အမေရိကန်ဘီလီယံနာတစ်ဦးဖြစ်သည့် Todd Boehly ၏ Clearlake Capital လုပ်ငန်းစုက လာမည့်တနင်္လာနေ့တွင် နောက်ဆုံးသဘောတူညီချက်များချမှတ်ကာ အသင်းအား လွှဲပြောင်းရယူတော့မည်ဖြစ်သည်။ အသင်းရောင်းချရေးအတွက် ပရီးမီးယားလိဂ်နှင့် ကူကေအစိုးရတို့က ပေါင်၄.၂၅ ဘီလီယံ အတည်ပြုပေးခဲ့ကြသည်။ လုပ်ငန်းစုကို Boehly ကဦးဆောင်ထားသော်လည်း ကယ်လီဖိုးနီးယား private equity firm ဖြစ်သည့် Clearlake Capital ကအဓိက ရှယ်ယာရှင်ဖြစ်လာမည်ဖြစ်သည်။ အခြားရှယ်ယာပိုင်ဆိုင်သူများထဲတွင် အမေရိကန် ဘီလီယံနာ Mark Walter နှင့် Swiss ဘီလီယံနာ Hansjorg Wyss တို့ပါဝင်သည်။

ကလပ်အသင်းရောင်းချမှုနှင့်ပတ်သက်ပြီး အစိုးရက ရောင်းချမှုမှရရှိသည့် ငွေများကို Abramovich အားလက်ခံရယူစေမည်မဟုတ်ပဲ ပိတ်သိမ်းခံထားရသော သူ၏ဘဏ်အကောင့်မှတဆင့် ပရဟိတများထံသို့ လှူဒါန်းစေမည်ဖြစ်သည်။

Abramovich သည် ချဲလ်ဆီးအသင်းအား လွန်ခဲ့သော ၁၉နှစ်၊ ၂၀၀၃ ခုနှစ်က ပေါင်သန်း ၁၄၀ ဖြင့်ဝယ်ယူခဲ့ပြီး ၎င်း၏အုပ်ချုပ်မှုအောက်တွင် ချန်ပီယံလိဂ်ဖလား ၂ကြိမ်၊ FA ဖလား ၅ကြိမ်၊ ယူရိုလိဂ်ဖလား ၂ ကြိမ်နှင့် အခြား EDL ဖလား ၃ကြိမ်တို့ ဆွတ်ခူးနိုင်ခဲ့သည်။ ၂၀၂၁ ခုနှစ် သြဂုတ်လတွင် Uefa Super Cup နှင့် ဖေဖော်ဝါရီလတွင် ပထမဆုံး ကလပ် ကမ္ဘာ့ဖလားကို ဆွတ်ခူးနိုင်ခဲ့သည်။

ကူးယူဖော်ပြခြင်းခွင့်မပြုပါ။
Source: BBC News
Photo: Getty Images

Beijing Olympics ဆုတံဆိပ်အားကစားသမားများ ဆုကြေးငွေဘယ်လောက်ရ

၂၀၂၂ ဆောင်းရာသီအိုလံပစ်ပွဲကြီးကို ဘေဂျင်းတွင်ဆက်လက်ကျင်းပလျက်ရှိပြီး ကမ္ဘာတလွှားမှ ဆုတံဆိပ်ပေါင်း ၂၀၀ ကျော်ရရှိပြီးဖြစ်သည်။ နိုင်ငံ့ဂုဏ်ဆောင်အားကစားသမားအချို့မှာ ဆုတံဆိပ်များသာမက ဆုကြေးငွေနှင့် ရရှိရန်အလွန်ခက်ခဲလှသည့် ဒေါ်လာသန်းချီတန် စပွန်စာချုပ်များကိုပင် အိမ်အပြန်သယ်ဆောင်သွားနိုင်ကြသည်။

နိုင်ငံတကာအိုလံပစ်ကော်မတီကတော့ ဆုတံဆိပ်ရှင်များကို ဆုကြေးငွေပေးလေ့မရှိ။ သို့သော် နိုင်ငံအများစုက နိုင်ငံ့ဂုဏ်ဆောင်ဆုရကစားသမားများအား ဆုငွေထပ်မံချီးမြှင့်ကြသည်။ အမေရိကန်အိုလံပစ်နှင့် မသန်စွမ်းအိုလံပစ်ကော်မတီတို့က ရွှေဆုရှင်များကို ဒေါ်လာ ၃၇,၅၀၀၊ ငွေနှင့်ကြေးတံဆိပ်ရှင်များကို ဒေါ်လာ ၁၅,၀၀၀ စီချီးမြှင့်သည်။ ကစားသမားများ၏ ဝင်ငွေဒေါ်လာ ၁ သန်း မကျော်ပါက ဆုကြေးငွေအပေါ်အခွန်ဆောင်ရန်မလိုပေ။ ထို့အပြင် အမေရိကန်အားကစားသမားများမှာ ကျန်းမာရေးအာမခံ၊ top-tier ကျန်းမာရေးဝန်ဆောင်မှုနှင့် ကောလိပ်၊ ကျူရှင်ထောက်ပံ့ကြေးများပါ ရရှိသည်။

အချို့နိုင်ငံများမှာ အားကစားသမားများ ဆုတံဆိပ် ဆွတ်ခူးနိုင်ဖို့ ဆုကြေးငွေအမြောက်အများ ပေးလေ့ရှိကြသည်။ ဥပမာ -စင်ကာပူက အမေရိကန်ထက် အဆ ၂၀ နီးပါးချီးမြှင့်သည်။ နိုင်ငံကိုယ်စားပြု တစ်ဦးချင်းရွှေတံဆိပ်ရရှိသူများကို စင်ကာပူဒေါ်လာ ၁ သန်းချီးမြှင့်သည်။ ဆုကြေးအပေါ် အခွန်ဆောင်ရပြီး ရှေ့လျှောက်ကုန်ကျမည့် ထရိန်နင်နှင့်လေ့ကျင့်ရေး ကုန်ကျစားရိတ်များ ဖယ်ပြီးပါက ကျန်ငွေခွဲဝေယူရသည်။

ကာဇတ်စတန်က ရွှေတံဆိပ်အတွက် ဒေါ်လာ ၂၅၀,၀၀၀ ၊ အီတလီက ဒေါ်လာ ၂၁၃,၀၀၀ ခန့်၊ ဖိလစ်ပိုင်က ဒေါ်လာ ၂၀၀,၀၀၀ နှင့် မလေးရှားကလည်း ရက်ရက်ရောရောချီးမြှင့်သည်။ ပြီးခဲ့သည့်တိုကျိုအိုလံပစ်တွင် အိန္ဒိယလှံပစ်ကစားသမား Neeraj Chopra က နိုင်ငံအတွက်ပထမဆုံးရွှေတံဆိပ်ဆွတ်ခူးပေးနိုင်ခဲ့ပြီးနောက် နိုင်ငံရေးသမားများ၊ corporate brands များက ရူပီးသန်းပေါင်းများစွာ ချီးမြှင့်ခဲ့ကြသည်။ ဖိလစ်ပိုင် အလေးမကစားသမား Hidilyn Diaz ကနိုင်ငံ့ပထမဆုံး အိုလံပစ်ဆုရယူပေးပြီးနောက် အိမ် ၂ လုံးနှင့် လေယာဉ်လက်မှတ် တသက်တာအခမဲ့ချီးမြှင့်ခံခဲ့ရသည်။

ကစားသမားများသည် အိုလံပစ်အဖွဲ့ထဲနေရာတစ်နေရာ ရရှိရေးမှာလည်းလွယ်ကူလှသည်မဟုတ်။ ဝင်ငွေရအချိန်ပြည့်အလုပ်များ လုပ်ကိုင်ခြင်းကို စွန့်လွှတ်ကာ လေ့ကျင့်ရေးတွင် အချိန်ပြည့်မြှုပ်နှံထားရသည်။ လေ့ကျင့်ရေးကုန်ကျစားရိတ်မှာလည်း ကြီးမားလွန်းလှသည့်အတွက် အချို့ကမူ အိုလံပစ်အိမ်မက်အတွက် ငွေကြေးများပုံအောခြင်း၊ ရင်းနှီးမြှုပ်နှံပေးမည့်သူများကို ရှာဖွေကြသည်။

စပွန်ဆာရရှိရေးမှာလဲ ခက်ခဲလှသည်။ ထိပ်တန်းကစားသမား လက်တစ်ဆုပ်စာလောက်ကသာ အိုလံပစ်ပွဲမယှဉ်ပြိုင်ခင် (သို့မဟုတ်) ပြိုင်ပွဲ၌အနိုင်ရပြီးနောက် ဒေါ်လာသန်းချီသည့်စပွန်ဆာများရရှိကြသည်။ နှင်းလျှောစီးကစားသမား Shaun White က အသက် ၇ နှစ်အရွယ်တွင် ပထမဆုံး စပွန်ဆာရရှိခဲ့သည်ဟုဆိုသည်။ ထို့နောက် ၂၀၀၆ ခုနှစ် အိုလံပစ်ရွှေတံဆိပ်ရရှိပြီးနောက် snowboard ထုတ်လုပ်ရေးကုမ္ပဏီ Burdon နှင့် ၁၀ နှစ်စာချုပ်ချုပ်ဆိုခဲ့ကာ တစ်နှစ်လျှင် ဒေါ်လာ ၁၀ သန်းရရှိသည်။

ပြီးခဲ့သည့်နှစ်က အမေရိကန်ရေကူး အားကစားသမား Katie Ledecky နှင့် ကျွမ်းဘားသမား Simone Biles တို့က ဒေါ်လာသန်းပေါင်းများစွာရရှိခဲ့ကြောင်း Forbes ကဖော်ပြခဲ့သည်။ ဂျပန်တန်းနစ်မယ် Naomi Osaka က တစ်နှစ်အတွင်း ဒေါ်လာ ၅၅ သန်းရရှိကာ ဝင်ငွေအကောင်းဆုံးအမျိုးသမီးအားကစားသမား အဖြစ်သတ်မှတ်ခံထားရသည်။

ကူးယူဖော်ပြခြင်းခွင့်မပြုပါ။

Source: SCMP, CNBC, Forbes
Photo: AFP

နာမည်ကျော် စပွန်ဆာများ အခက်တွေ့၊ နှုတ်ဆိတ်နေခဲ့သည့် ဘေဂျင်း ဆောင်းရာသီ အိုလံပစ်

နောက်လတွင် ဘေဂျင်းဆောင်းရာသီ အိုလံပစ် စတင်တော့မည်ဖြစ်ပြီး ပုံမှန်အားဖြင့်ဆိုလျှင် အိုလံပစ် ပွဲတော်ကြီးသည် နာမည်ကြီး ကုမ္ပဏီများအတွက် မိမိတို့၏ အမှတ်တံဆိပ်ကို လူသိများစေရန် စပွန်ဆာပေး ကြော်ငြာလေ့ရှိရာ အခွင့်အလမ်းကြီးဖြစ်သည်။

သို့သော် ယခုအခါ အမေရိကန်နှင့် တရုတ်အကြားဖြစ်ပွားနေသည့် တင်းမာမှုများကြောင့် အိုလံပစ်ပွဲတော်ကြီး၏ ကမ္ဘာလုံးဆိုင်ရာ အဓိက စပွန်ဆာ ကုမ္ပဏီကြီး (၁၃) ခုသည် ဆောင်းရာသီ အိုလံပစ်ပွဲတော်တွင် ပါဝင်ရေး၊ မပါဝင်ရေးကို ခေါင်းခဲနေရပြီဖြစ်သည်။

လက်ရှိအချိန်တွင် အမေရိကန်ဦးဆောင်၍ ယူကေ၊ သြစတြေးလျနှင့် ကနေဒါတို့သည် ဘေဂျင်း ဆောင်းရာသီ အိုလံပစ်ကို သံတမန်နည်းအရ သပိတ်မှောက်ရာတွင် အဓိကပါဝင်သူများ ဖြစ်ကြသော်လည်း သက်ဆိုင်ရာ အားကစားသမားများကိုမူ စေလွှတ်သွားဦးမည်ဟု သိရသည်။

တရုတ်နိုင်ငံသည် ၎င်းတို့နိုင်ငံအတွင်းရှိ လူနည်းစု ဝီဂါ မူစလင်လူမျိုးများကို အတင်းအဓ္ဓမ ဖိနှိပ်ခြင်း၊ တိဘက်နှင့် ဟောင်ကောင်တို့တွင် နိုင်ငံရေး ကုလားဖန်ထိုးမှုများ ပြုလုပ်ကာ လူအခွင့်ရေးချိုးဖောက်မှုများ ပြုလုပ်ခြင်း တို့ကြောင့် သပိတ်မှောက်ရခြင်းဖြစ်ကြောင်း အမေရိကန်နှင့် မဟာမိတ်တို့က ဆိုသည်။

ဘီဘီစီ သတင်းဌာန၏ စောင့်ကြည့် သုံးသပ်ချက်များအရ ယမန်နှစ် တိုကျိုအိုလံပစ်တွင် ဆိုရှယ်မီဒီယာများထက်၌ တက်တက်ကြွကြွ လှုံ့ဆော်ပါဝင်ခဲ့ကြသော အဓိက စပွန်ဆာ ကုမ္ပဏီကြီးများသည် ယခု ဘေဂျင်းအိုလံပစ်တွင် အသံဆိတ်နေသည်ကို တွေ့ရှိနေခဲ့ရသည်။

အဆိုပါ ကုမ္ပဏီ (၁၃) ခုကို တရုတ်နိုင်ငံ၏ လူအခွင့်အရေးချိုးဖောက်မှုများနှင့် အိုလံပစ် စပွန်ဆာအကြောင်း ဘီဘီစီ သတင်းဌာနက ဆက်သွယ်မေးမြန်းခဲ့သော်လည်း မည်သည့် ကုမ္ပဏီမျှ တိတိပပ ဖြေကြားခြင်း မပြုခဲ့ဘဲ ရေငုံနှုတ်ပိတ်လျက်ရှိကြောင်း သိရသည်။

အမေရိကန် အိုလံပစ် ကော်မတီ၏ လှုံ့ဆော်ရေး တာဝန်ခံတစ်ဦးဖြစ်သူ ရစ်ခ် ဘာတန်ကတော့ ကုမ္ပဏီများသည် လက်ရှိအချိန်တွင် ကြိုးတန်းပေါ်လမ်းလျှောက်နေရသလို ဖြစ်နေပြီး မိခင် နိုင်ငံများ၏ ဖိအားက တစ်ဖက်၊ တရုတ် စားသုံးသူဈေးကွက်ကြီး၏ သပိတ်မှောက်မှုကို စိုးရိမ်နေရခြင်းက တစ်ဖက် ဖြစ်လျက်ရှိသည်ဟု သုံးသပ်သွားခဲ့သည်။

အိုလံပစ် ကော်မတီ၏ ကမ္ဘာလုံးဆိုင်ရာ အဓိကစပွန်ဆာ ကုမ္ပဏီ (၁၃) ခုမှာ Airbnb, Alibaba, Allianz, Atos, Bridgestone, Coca-Cola, Intel, Omega, Panasonic, Procter & Gamble, Samsung, Toyota နှင့် Visa တို့ ဖြစ်ကြသည်။

ဘီဘီစီကတော့ နမူနာအနေဖြင့် ပြင်သစ် နည်းပညာကုမ္ပဏီဖြစ်သော Atos ကို ထုတ်ပြသွားခဲ့ပြီး Atos သည် တိုကျိုအိုလံပစ် မစတင်ခင်တုန်းက တစ်ရက်မပြတ် တွစ်တာပို့စ်များ တင်၍ ဆိုရှယ်မီဒီယာများတွင် တက်တက်ကြွကြွရှိခဲ့သော်လည်း ယခုအခါ ဘေဂျင်း အိုလံပစ်နှင့် ပတ်သတ်၍ တိတ်ဆိတ်နေသည်မှာ အလွန်သိသာလွန်းကြောင်း ထောက်ပြခဲ့သည်။

Altos ကဲ့သို့ပင် Visa နှင့် Coca-Cola တို့သည်လည်း ပုံမှန်မဟုတ်သော ဆိတ်ငြိမ်ခြင်း မျိုးဖြင့် လက်ရှောင်လျက်ရှိကြကြောင်း သိရသည်။

နိုင်ငံတကာ အိုလံပစ်ကော်မတီကတော့ အဓိက စပွန်ဆာ ကုမ္ပဏီများသည် ကော်မတီနှင့် ရေရှည်လက်တွဲရန် စာချုပ်ချုပ်ဆိုထားကြခြင်းဖြစ်ပြီး ကျင်းပရာ အိမ်ရှင်နိုင်ငံနှင့် ပတ်သတ်မှုမရှိကြောင်း ရှင်းရှင်းလင်းလင်း ရှိစေချင်သည်ဟု ဆိုသည်။

သို့သော် အထက်ပါ အဓိက စပွန်ဆာ (၁၃) ခုကဲ့သို့ မဟုတ်ဘဲ အိုလံပစ်ကော်မတီကို သီးသန့် စပွန်ဆာပေးသည့် Omega ကဲ့သို့ ကုမ္ပဏီများလည်း ရှိသေးကြောင်း ၎င်းတို့ကဆိုသည်။

Omega သည် အိုလံပစ်ပွဲတော်များ၏ အချက်အလက်စုဆောင်းခြင်းနှင့် အချိန်မှတ်ခြင်း နည်းပညာများကို အဓိက စပွန်ဆာပေးသူဖြစ်သောလည်း သူသည် ဘေဂျင်း ဆောင်းရာသီအိုလံပစ်၏ စပွန်ဆာစာရင်းတွင် အကျုံးမဝင်ကြောင်း သိရသည်။

ထူးခြားချက်အနေဖြင့် အဓိက စပွန်ဆာ (၁၃) ခုတွင် အပါအဝင်ဖြစ်ပြီး တရုတ်ကုမ္ပဏီဖြစ်သည့် Alibaba သည် တရုတ် ပြည်တွင်း ဆိုရှယ်မီဒီယာများတွင် အိုလံပစ်ပို့စ် အချို့တင်သော်လည်း အနောက်တိုင်း ဆိုရှယ်မီဒီယာများထက်တွင် အခြား ကုမ္ပဏီများ နည်းတူ အသံတိတ်နေခြင်းဖြစ်သည်။

ကျွမ်းကျင်သူများက Alibaba သည် နယူးရော့ စတော့အိတ်ချိန်းတွင် ပါဝင်သည့် ကုမ္ပဏီဖြစ်သလို အမေရိကန်တွင် စီးပွားရေးအဆောက်အဦ အခိုင်အမာရှိထားသည့် ကုမ္ပဏီဖြစ်သောကြောင့် ယခုကဲ့သို့ ငြိမ်နေသည်မှာ ထူးဆန်းသည့် ကိစ္စမဟုတ်ကြောင်းနှင့် စူပါပါဝါ နိုင်ငံကြီးနှစ်ခု ကြားတွင် အဆင်ပြေအောင် နေရခြင်းမှာ ကုမ္ပဏီများအတွက် မလွယ်လှကြောင်း ထောက်ပြသွားခဲ့သည်။

ကူးယူဖော်ပြခွင့်မပြုပါ။
Source: BBC
Photo: The Japan Times

ကိုဗစ်နှင့် ကုန်သွယ်ရေး အကြပ်အတည်းကြောင့် ဒေါ်လာ ၁ဘီလီယံခန့် ဆုံးရှုံးဖွယ်ရှိသည့် Adidas

ဂျာမန် အားကစားပစ္စည်း ထုတ်လုပ်ရေး ကုမ္ပဏီဖြစ်သည့် Adidas သည် ယခုနှစ်အတွင်း ဖြစ်ပွားခဲ့သည့် ဒယ်လ်တာမျိုးကွဲ ပျံ့နှံ့မှုနှင့် လက်ရှိဖြစ်ပေါ်နေသည့် ကုန်သွယ်ရေး လမ်းကြောင်း အကြပ်အတည်းကြောင့် ဒေါ်လာ ၁.၂ ဘီလီယံခန့် ဆုံးရှုံးဖွယ်ရှိကြောင်း ထုတ်ပြန်ခဲ့သည်။

ဒယ်လ်တာ ပျံ့နှံ့မှုကာလအတွင်း ဗီယက်နမ်ရှိ ထုတ်လုပ်မှုလုပ်ငန်းများ ရပ်ဆိုင်းရခြင်းနှင့် လက်ရှိ ရင်ဆိုင်နေရသည့် ရေကြောင်း ကုန်သွယ်ရေး အကြပ်အတည်းကြောင့် ကုမ္ပဏီ၏ ရောင်းအားကို ထိခိုက်ခဲ့ခြင်းဖြစ်ပြီး ရှယ်ယာ တန်ဖိုးမှာလည်း ၅ရာခိုင်နှုန်းခန့် ကျဆင်းသွားကြောင်း သိရသည်။

အချက်အလက်များအရ ပြီးခဲ့သည့် ဇူလိုင်မှ စက်တင်ဘာအတွင်း ဗီယက်နမ်ရှိ Adidas စက်ရုံများ ပိတ်ထားခဲ့ရပြီး အောက်တိုဘာနောက်ပိုင်းတွင်မှ ဖြည်းဖြည်းခြင်း ပြန်လည်ဖွင့်လှစ်နိုင်ခဲ့ရာ ဈေးကွက်အတွင်းသို့ ပစ္စည်းအရေအတွက် သန်း၁၀၀ ခန့် အဝင်နောက်ကျခဲ့ကြောင်း ထုတ်ပြန်ချက်တွင် ပါရှိသည်။

ဒယ်လ်တာ ပျံ့နှံ့မှုကို ထိန်းချုပ်နိုင်ခဲ့ပြီးနောက် ကမ္ဘာ့စီးပွားရေးများ အပြိုင်အဆိုင် ပြန်လည် စတင်ခဲ့ရာ ကုန်ပစ္စည်းများ တင်ပို့ရန် ကွန်တိန်နာများ မလုံလောက်မှု၊ ကုန်တင်သင်္ဘောများ ရှားပါးမှုနှင့် ဆိပ်ကမ်းများ အချိန်မီ မလည်ပတ်နိုင်မှုကြောင့် ကမ္ဘာလုံးဆိုင်ရာ ရေကြောင်း ကုန်သွယ်ရေး အကြပ်အတည်းကို ဖန်တီးခဲ့တော့သည်။

သည့်အတွက်ကြောင့်ပင် Adidas၏ ထုတ်ကုန်များသည် ထုတ်လုပ်ရာ နိုင်ငံများတွင် သောင်တင်နေသည်များ ရှိသလို အချို့မှာ သက်ဆိုင်ရာ နိုင်ငံများ၌ ဆိုက်ကပ်ရန် စောင့်ဆိုင်းနေသော သင်္ဘောများပေါ်တွင် သောင်တင်ခဲ့ရာ ဈေးကွက်သို့ အချိန်မီ မရောက်နိုင်ခဲ့သည့် ဖြစ်ရပ်များလည်း ဖြစ်ပွားခဲ့သည်။

အဆိုပါ အကြပ်အတည်းနှစ်ခု၏ အရှိန်ကို ယခုနှစ်၏ စတုတ္ထသုံးလပတ်-Q4 နှင့် လာမည့်၂၀၂၂ ၏ အစောပိုင်း ကာလများတွင် ပိုမိုခံစားရမည်ဖြစ်ပြီး ယင်းကာလများအတွင်း ဆုံးရှုံးမှုမှာ ဒေါ်လာ ၁.၂ ဘီလီယံခန့် ရှိမည်ဖြစ်ကြောင်း ခန့်မှန်း တွက်ချက်ထားခြင်းဖြစ်သည်။

Adidas ၏ ၂၈ ရာခိုင်နှုန်းသော ထုတ်ကုန်များသည် ဗီယက်နမ်မှ ထွက်ရှိခြင်းဖြစ်ပြီး အများစုမှာ ရှုးဖိနပ်များ ဖြစ်ကာ ပြီးခဲ့သည့် ဒယ်လ်တာ ကူးစက်မှု ကာလအတွင်း တရုတ်နှင့် အင်ဒိုနီရှားရှိ စက်ရုံများမှ ဗီယက်နမ်အစား ကုန်ပစ္စည်းအရေအတွက်ပေါင်း သန်း ၃၀ ကျော် ပိုမိုထုတ်လုပ်ခဲ့ကြောင်း သိရသည်။

ယခုအခါ Adidasသည် ရေကြောင်း ကုန်သွယ်မှု အကြပ်အတည်းကို ကျော်လွှားရန်အတွက် လေကြောင်း သယ်ယူမှုကို ပိုမိုအားပြုနေရပြီး ဆုံးရှုံးမှုများကို ပြန်လည်ကာမိစေရန် လာမည့် ၂၀၂၂တွင် လျှော့ဈေးပေးသော ပစ္စည်းအရေအတွက်ကို လျှော့ချမည်ဖြစ်ပြီး ဈေးနှုန်းကိုလည်း ၅ ရာခိုင်နှုန်း တိုးမြှင့်မည်ဖြစ်ကြောင်း တာဝန်ရှိသူတစ်ဦးက မီဒီယာများသို့ ဖြေကြားခဲ့သည်။

ကူးယူဖော်ပြခွင့်မပြုပါ။
Source: Reuters, Bloomberg
Photo: Global Times

အိုင်ယာလန်တွင်အမျိုးသမီးဘောလုံးကစားသမားလစာကို အမျိုးသားလစာအတိုင်းတန်းတူပေးမည်

အိုင်ယာလန်နိုင်ငံတွင် ယခုနှစ် World Cup မတိုင်မီမှစတင်၍ ဘောလုံးကစားသမားများ၏လစာကို ကျား၊မ ခွဲခြားခြင်းမပြုတော့ပဲ တန်းတူပေးတော့မည်ဖြစ်ကြောင်း အိုင်ယာလန်ဘောလုံးအဖွဲ့ချုပ် The Football Association of Ireland (FAI) ကကြေညာလိုက်သည်။

အမျိုးသား၊ အမျိုးသမီးအသင်းခေါင်းဆောင်များဖြစ်ကြသည့် Seamus Colemand နှင့် Katie McCabe တို့နှင့် တွေ့ဆုံတိုင်ပင်ခဲ့ပြီးနောက် သမိုင်းဝင်ပြောင်းလဲမှုအား စတင်တော့မည်ဖြစ်ကြောင်း FAI ကဆိုသည်။ အမျိုးသားဘောလုံးသမားများရရှိနေသည့် လစာလျှော့ချ၍ အမျိုးသမီးများအား တူညီသည့်လစာပမာဏ ရောက်အောင်ဖြည့်တင်းပေးသွားမည်ဖြစ်သည်။ အမျိုးသမီး ဘောလုံးသမားများရရှိသည့် လစာပမာဏမှာ အမျိုးသားကစားသမားများနှင့် ကွဲပြားနေသောကြောင့် လွန်ခဲ့သောနည်းများစွာကတည်းက အငြင်းပွားနေသည့် ပြဿနာတရပ်လည်းဖြစ်သည်။ အင်္ဂလန်၊ ဘရာဇီး၊ သြစတြေးလျ၊ နော်ဝေနှင့် နယူဇီလန်နိုင်ငံတို့က ပြီးခဲ့သည့်နှစ်ကတည်းက လစာ ကျား၊မတန်းတူညီမျှပေးအပ်နေပြီဖြစ်သည်။

အိုင်းရစ်အမျိုးသမီးဘောလုံးကစားသမားဖြစ်သည့် Stephanie Roche က “ယခုဆုံးဖြတ်ချက်သည် ပိုက်ဆံပမာဏက အဓိကမဟုတ်ပဲ ကျား၊မ တန်းတူညီမျှအခွင့်အရေးကို ဖော်ဆောင်ပေးခြင်းဖြစ်သောကြောင့် ကြီးမားသောပြောင်းလဲမှုကြီးတရပ်ဖြစ်ကြောင်း” ပြောကြားခဲ့သည်။ အိုင်ယာလန်အသင်းခေါင်းဆောင် Katie McCabe ကလည်း အိုင်းရစ်ဘောလုံးလောကအတွက် “အလွန်ဂုဏ်ယူဖွယ်ရာနေ့” ဟုပြောကြားခဲ့သည်။

ထို့ကြောင့် အမျိုးသမီးဘောလုံးအသင်းနှင့် FAI ၏ဆက်ဆံရေးမှာလည်း သိသိသာသာတိုးတက်လာခဲ့ပြီး အနာဂတ်တွင် ကစားသမားများ၏လူမျိုး၊နောက်ခံ ခွဲခြားခြင်းမရှိပဲ ကစားပွဲများကို အကောင်းဆုံး ကစားသွားနိုင်ရန်မျှော်လင့်မိကြောင်း သူမကထည့်သွင်းပြောကြားခဲ့သည်။

Source: Euronews, BBC
Photo: Getty Images

ဖိအားများကြောင့် Reebok ကိုရောင်းချတော့မည့် Adidas

အားကစားပစ္စည်းထုတ်လုပ်ရေး ကုမ္ပဏီ Adidas သည် ၎င်းတို့ပိုင် အားကစားပစ္စည်းထုတ်လုပ်ရေး ကုမ္ပဏီဖြစ်သည့် Reebok ကို အမေရိကန် အခြေစိုက် Authentic Brands Group (ABG) သို့ ဒေါ်လာ ၂.၅ ဘီလီယံဖြင့် ရောင်းချရန် သဘောတူခဲ့ပြီဖြစ်ကြောင်း သိရသည်။

Adidas သည် ၎င်းတို့၏ မဟာပြိုင်ဘက် Nike ကို အမေရိကန်ဈေးကွက်တွင် ယှဉ်ပြိုင်ရန်ဟူသော ရည်ရွယ်ချက်ဖြင့် ၂၀၀၆ ခုနှစ်တွင် Reebok ကို ဒေါ်လာ ၃.၈ ဘီလီယံဖြင့် ဝယ်ယူခဲ့ခြင်းဖြစ်သော်လည်း လက်တွေ့တွင် Reebokသည် Nike ကိုမယှဉ်နိုင်ခဲ့ပေ။

၁၉၅၈ တွင် စတင်တည်ထောင်ခဲ့ပြီး လက်ရှိ ဘော်စတွန်တွင် ရုံးချုပ်တည်ရှိသော Reebok အတွက် ၁၉၈၀နှင့် ၁၉၉၀ ကာလများသည် ရွှေခေတ်ဟုဆိုရမည်ဖြစ်ပြီး အမေရိကန်တစ်ဝှမ်း လူကြိုက်များခဲ့သော်လည်း နောက်ပိုင်းတွင် Nike ၏ အောင်မြင်မှုများအကြား မှေးမှိန်သွားခဲ့ရသည်။

ထို့ကြောင့် နှစ်စဉ် ရောင်းအား အနှုတ်လက္ခဏာပြနေသည့် Reebok ကိုရောင်းချလိုက်ရန် Adidas ၏ ရင်းနှီးမြှပ်နှံသူများက အမြဲဖိအားပေးလာကြခြင်းဖြစ်ပြီး နောက်ဆုံးတွင် Adidas အနေဖြင့် လက်လွှတ်ရတော့မည့် အချိန်ကို ရောက်ရှိလာခဲ့ပြီဖြစ်သည်။

Reebok မရှိသည့်နောက် အမေရိကန် ဈေးကွက်တွင် Nike နှင့် ကိုယ်တိုင် ယှဉ်ပြိုင်ရတော့မည့် Adidas သည် ယခုအခါ အမေရိကန် နာမည်ကျော် စူပါစတားများဖြစ်သည့် ကိန်းဝက်စ်၊ ဘီယွန်းဆေး၊ ဖာရယ် ဝီလီယံ စသူတို့နှင့် ပါတနာများ ပြုလုပ်ကာ ဖိနပ်ဒီဇိုင်းသစ်များဖြင့် ထိုးဖောက်ရန် ကြံစည်နေပြီဖြစ်သည်။

Reebok ကို ဝယ်ယူသွားသည့် Authentic Brands Group (ABG) ကတော့ ရုံးချုပ်ကို ဘော်စတွန်တွင် ဆက်လက်ထားရှိမည်ဟု ပြောကြားထားပြီး ယခင်အတိုင်း လက်တင်အမေရိက၊ အာရှ-ပစိဖိတ်၊ ဥရောပနှင့် ရုရှားတို့တွင် ဈေးကွက်များ ဆက်လက် ထားရှိသွားမည်ဖြစ်ကြောင်း အတည်ပြုထားသည်။

Authentic Brands Group (ABG) သည် အားကစားပစ္စည်း၊ အဝတ်အစားနှင့် လူသုံးကုန် ပစ္စည်း အမှတ်တံဆိပ်ပေါင်း ၃၀ ကျော်ကို စီမံခန့်ခွဲနေသည့် ကုမ္ပဏီဖြစ်ပြီး ၎င်းတို့ လည်ပတ်နေသည့် စတိုးဆိုင်ပေါင်း ၆၀၀၀ ခန့်ရှိကြောင်း သိရသည်။

ABG ၏ တည်ထောင်သူလည်းဖြစ်၊ CEO လည်းဖြစ်သည့် ဂျေမီ ဆော့လ်တာကတော့ Reebok ကဲ့သို့ သမိုင်းကြောင်းအစဉ်အလာရှိသည့် ထိပ်တန်း အမှတ်တံဆိပ်ကို ရရှိခဲ့ခြင်းအတွက် အရမ်းစိတ်လှုပ်ရှားမိကြောင်းနှင့် ထိုကဲ့သို့ ဝယ်ယူရန် ကြိုးပမ်းနေသည်မှာလည်း ကြာမြင့်နေပြီဖြစ်ကြောင်း ထုတ်ဖော်ပြောကြားခဲ့သည်။

ကူးယူဖော်ပြခွင့်မပြုပါ။
Source: Reuters, The Guardian

 

ဘာစီလိုနာဘောလုံးကလပ် Credit Agencyထံမှ ယုံကြည်နိုင်သောအဆင့် credit rating လက်ခံရရှိ

ဘာစီလိုနာဘောလုံးကလပ်၏ ဒါရိုက်တာအဖွဲ့ဝင်များသည် Credit Agency Fitch ထံမှ ယုံကြည်လက်ခံနိုင်ဖွယ်အဆင့်ရှိသော triple B negative – credit rating ရရှိခဲ့ကြောင်း အသင်းက တရားဝင်ထုတ်ပြန်ကြေညာခဲ့သည်။ (Credit rating ဆိုသည်မှာ ကုမ္ပဏီတခုအား ချေးငွေထုတ်ပေးရန် ယုံကြည်ရခြင်းရှိမရှိ ဆုံးဖြတ်ချက်ရာတွင် ထိုကုမ္ပဏီ၏ ဂုဏ်သိက္ခာ၊ တောင့်တင်းသော ငွေကြေးအင်အားနှင့် တည်ငြိမ်သောဝင်ငွေလမ်းကြောင်း စသည့် အချက်အလက်များအပေါ် အခြေခံ၍ အဆင့်သတ်မှတ်ပေးသော စနစ်ဖြစ်သည်။ ငွေချေးပေးသူက သူယူရမည့် risk ကိုသိအောင်တွက်ချက်ရာတွင် အရေးပါသည်။ ချေးငွေပြန်မဆပ်နိုင်သူ (သို့မဟုတ်) အချိန်မီ ပြန်မဆပ်နိုင်သူတို့၏ credit rating အဆင့်မှာ နိမ့်ကြသည်။ Agency အပေါ်မူတည်၍ သတ်မှတ်ချက် ကွဲပြားမှုရှိသည်။)

ယင်း triple B အဆင့်သတ်မှတ်ချက်မှာ credit agency က ကုမ္ပဏီ၏ ငွေကြေးအင်အားတောင်းတင်းမှု၊ ယုံကြည်ကိုးစားနိုင်မှုရှိမှသာ ပေးအပ်သော အဆင့်ဖြစ်သည်။ ထိုရလဒ်သည် ဘာစီလိုနာကလပ်အတွက် အရေးကြီးသော အချက်ဖြစ်ပြီး ထိုရလဒ်ကြောင့် ကလပ်၏အနာဂတ်အား ပိုမိုကောင်းမွန်အောင်ပြုလုပ်ရန် ယုံကြည်မှုပိုရှိစေသည်။

ယခုနွေရာသီကာလတခုလုံးတွင် ဘာစီလိုနာအသင်း၏ ငွေကြေးအခြေအနေအကြောင်းမှာ သတင်းခေါင်းစဉ်အဖြစ် မကြာခဏဖော်ပြခံရလျက်ရှိသည်။ ဥက္ကဌ Joan Laporta နှင့် ဒါရိုက်တာ Mateu Alemany တို့က အသင်း၏ စားရိတ်စားက ပိုမိုသက်သာစေရန် အပိုမလိုအပ်သောအသုံးစားရိတ်များကို ပြင်းပြင်းထန်ထန်ဖယ်ထုတ်နေပြီး၊ လာလီဂါ၏ တင်းကြပ်သော ကစားသမားလစာ စည်းမျဉ်းနှင့်အတူ အားထားနေရသော ဂန္ဓဝင်ကစားသမား Lionel Messi ၏ အသင်းစာချုပ်သက်တမ်း ထပ်တိုးနိုင်စေရန် ကြိုးပမ်းနေခြင်းဖြစ်သည်။

Source: FC Barcelona, Investopedia
Photo: Getty Images

Covid ကာကွယ်နိုင်သောအားကစားဝတ်စုံဟု ကြော်ငြာခဲ့သောကြောင့် Lorna Jane ဒဏ်ရိုက်ခံရ

သြစတြေးလျ အားကစားအဝတ်အထည်ကုမ္ပဏီ Jorna Jane က သူ၏အားကစားဝတ်စုံများသည် ကိုဗစ်ဗိုင်းရပ်စ်ပျံ့ပွားခြင်းနှင့် ကူးစက်ခြင်းကိုကာကွယ်ပေးနိုင်သည်ဟု ကြော်ငြာရောင်းချခဲ့သောကြောင့် သြစတြေးလျဒေါ်လာ ၅ သန်းဒဏ်ရိုက်ခံခဲ့ရသည်။

သြစတြေးလျ၊ အမေရိက၊ တရုတ်နှင့် ထိုင်ဝမ်သို့ဖြန့်ဖြူးရောင်းချနေသည့် အဝတ်အထည်များတွင် ထည့်သွင်းအသုံးပြုထားသော ကုန်ကြမ်းများမှာ ဗက်တီးရီးယားများကို ကာကွယ်နိုင်သည့် နည်းပညာအသုံးပြုထားသည်ဟု ကုမ္ပဏီမှ မှားယွင်းစွာ ယုံကြည်ခဲ့မိပြီး၊ Customers များအား ၎င်းတို့ယုံကြည်ထားတဲ့အတိုင်း အကောင်းဆုံးကိုပေးဖို့ ကြော်ငြာခဲ့ခြင်းဖြစ်ကြောင်း ကုမ္ပဏီကဆိုသည်။

ကုမ္ပဏီသည် သူ၏ယုံကြည်ရသော supplier ထံမှ ကိုဗစ်ကာကွယ်နိုင်သည့်ပစ္စည်းများဟု အာမခံ၍ ရောင်းချခဲ့ခြင်းဖြစ်ပြီး ပစ္စည်းအရည်အသွေးမှာ ကတိပေးထားသည့်အတိုင်း လုပ်ဆောင်နိုင်စွမ်းမရှိခဲ့ကြောင်း Lorna Jane ၏ CEO Bill Clarkson ကဝန်ခံခဲ့သည်။

သြစတြေးလျ စားသုံးသူများအခွင့်အရေးကော်မရှင် (Australian Competition & Consumer Commission – ACCC) က Lorna Jane သည် Customers များကိုမှားယွင်းသော ယုံကြည်ချက်နှင့် အချက်အလက်များ ဖြန့်ဝေမှုဖြင့် တရားစွဲဆိုခဲ့ပြီး အများပြည်သူကျန်းမာရေးနှင့်ပတ်သက်၍ အထင်အမြင်လွဲမှားအောင် မားကတ်တင်းပြုလုပ်ခဲ့သည်ဟု တရားရုံးမှ ဆုံးဖြတ်ချက်ချကာ ဒဏ်ရိုက်ခဲ့သည်။

ကုမ္ပဏီပိုင်ရှင် Lorna Jane Clarkson ကလည်း မှားယွင်းကြောင်းဝန်ခံခဲ့ပြီး သူ၏မှားယွင်းစွာ ချမှတ်ခဲ့သော ဆုံးဖြတ်ချက်နှင့် ပတ်သက်၍ သတင်းစာရှင်းလင်းပွဲနှင့် Instagram video တခုကို ထုတ်လွှင့်ခဲ့သည်။ သြစတြေးလျ၊ နယူးဇီလန်၊ အမေရိကားနှင့် စင်ကာပူတို့တွင် ဖွင့်လှစ်ထားသည့် Lorna Jane စတိုးဆိုင်များအား အားကစားဝတ်စုံနှင့်ပတ်သက်၍ သတင်းအမှန် အမြန်ဆုံး ပြန်လည်ထုတ်ပြန်ရန် တရားရုံးမှ အမိန့်ထုတ်ထားသည်။ ထို့အပြင် ကုမ္ပဏီအား ဗိုင်းရပ်စ်ကာကွယ်နိုင်သော အားကစားဝတ်စုံများကို ၃ နှစ်ထုတ်လုပ်ခွင့်ပိတ်သိမ်းထားသည်။

Source: BBC Business
Photo: Lorna Jane