Thaw Htet

လက်တွဲဖော်ဟောင်းများက AirTag အသုံးပြု၍ နှောင့်ယှက်သဖြင့် Apple ကို အမျိုးသမီးနှစ်ဦး တရားစွဲ

လက်တွဲဖော်ဟောင်းများက Apple ၏ ထုတ်ကုန်တစ်ခုဖြစ်သော AirTag ကို အသုံးပြု၍ ၎င်းတို့၏ နေအိမ်များ၊ လှုပ်ရှားသွားလာမှုများကို စောင့်ကြည့်ကာ နှောင့်ယှက်မှုများ ပြုလုပ်ခဲ့သောကြောင့် ပုဂ္ဂလိက လုံခြုံရေးကို ထိပါးစေသဖြင့် Apple ကုမ္ပဏီကို အမျိုးသမီးနှစ်ဦးက တရားစွဲဆိုမှု အမေရိကန်တွင် ဖြစ်ပွားခဲ့သည်။

တရားလိုအမျိုးသမီးနှစ်ဦးအနက် တစ်ဦးမှာ တက္ကဆက်ပြည်နယ်မှဖြစ်ပြီး တစ်ဦးမှာ နယူးရော့မှာ ဖြစ်ကာ အဆိုပါ တရားစွဲဆိုမှု လျှောက်တင်လွှာကို ပြီးခဲ့သည့် တနင်္လာနေ့တွင် ဆန်ဖရန်စစ္စကို တရားရုံးသို့ တင်သွင်းခဲ့ကြောင်း သိရသည်။

Apple မှ ထုတ်လုပ်ထားသည့် AirTag မှာ ဒင်္ဂါးပြားအရွယ် ပစ္စည်းတစ်ခုဖြစ်ပြီး ပျောက်ဆုံးလွယ်သော ပစ္စည်းများတွင် တပ်ဆင်ထားခြင်းဖြင့် ပျောက်ဆုံးသည့်အချိန်တွင် iPhone ဖြင့် အလွယ်တကူပြန်လည်ရှာဖွေရန် ရည်ရွယ်ပြုလုပ်ထားခြင်းဖြစ်သည်။

တရားလို အမျိုးသမီးတစ်ဦး၏ ပြောဆိုချက်အရ ရည်းစားဟောင်းဖြစ်သူသည် သူမ၏ ကားတာယာအပေါ်ရှိ ဘော်ဒီဖရိန်တွင် အဆိုပါ AirTag ကို တပ်ဆင်သွားခဲ့ခြင်းဖြစ်ပြီး ရုတ်တရက်မမြင်နိုင်စေရန် ဆော့ပင်များဖြင့် ခြယ်သထားကာ ပလတ်စတစ်အိတ်ထဲထည့်၍ ရုပ်ဖျက်ထားကြောင်း ပြောပြခဲ့သည်။

အခြားအမျိုးသမီးတစ်ဦးကမူ သူမ၏ ခင်ပွန်းဟောင်းဖြစ်သူ၏ နှောင့်ယှက်မှုကို ခံရခြင်းဖြစ်ပြီး သူမ၏ ကလေးလွယ်သော ကျောပိုးအိတ်ထဲတွင် AirTag ကို ထည့်ထားခဲ့ခြင်းဖြစ်ကြောင်း၊ အဆိုပါ ပစ္စည်းကို တွေ့ရှိသဖြင့် Power ပိတ်လိုက်သော်လည်း နောက်ရက်များတွင် အခြားနေရာများတွင် နောက်ထပ် AirTag တစ်ခုကို ထပ်မံတွေ့ရှိရကြောင်း သိရသည်။

သူမ၏ ခင်ပွန်းဟောင်းသည် အဆိုပါ AirTag မှ ရရှိသော တည်နေရာအချက်အလက်များကို အသုံးပြု၍ ဖုန်းဖြင့် ချိန်းခြောက်ခြင်း၊ နှောင့်ယှက်ခြင်းများ ဆက်တိုက်ပြုလုပ်လျက် ရှိသဖြင့် သူမ၏ လုံခြုံရေးကို ပူပန်သောကြောင့် တရားစွဲလွှာတွင် အမည်ဝှက်ဖြင့် တင်သွင်းခဲ့သည်ဟု သတင်းများတွင် ဖော်ပြထားသည်။
Apple သည် အဆိုပါ AirTag အမည်ရှိ ပစ္စည်းကို ၂၀၂၁ တွင် စတင်မိတ်ဆက်ခဲ့ခြင်းဖြစ်ပြီး တန်ကြေးအားဖြင့် ၃၉ ဒေါ်လာကျသင့်ပြီး ကားသော့၊ ပိုက်ဆံအိတ်၊ လက်ပ်တော့၊ စက်ဘီးမှစ၍ ကားများအထိ တပ်ဆင်ထားနိုင်ပြီး ပျောက်ဆုံးခဲ့ပါက အရေးပေါ်ရှာဖွေနိုင်ရန် ရည်ရွယ်ထားခဲ့သည်။
သို့သော် အချို့သော ကျွမ်းကျင်သူများက AirTag စတင်ထွက်ရှိချိန်ကတည်းက ဖြစ်လာနိုင်သော အကျိုးဆက်များကို ထောက်ပြခဲ့ပြီး မသမာသူများသည် အဆိုပါ ပစ္စည်းသုံး၍ သူတပါးကို ခြေရာခံနှောက်ယှက်မှုများ ဖြစ်လာနိုင်ကြောင်း သတိပေးခဲ့ဖူးသည်။

AirTag ၏ ပြဿနာသည် ယခုမှ စတင်သည်မဟုတ်ဘဲ ယခုနှစ်အစောပိုင်း၌ အင်ဒီယားနားပြည်နယ်ရှိ အမျိုးသမီးတစ်ဦးသည် ၎င်းပစ္စည်းကို အသုံးပြု၍ သူမ၏ ရည်စားဖြစ်သူကို ခြေရာခံကာ လူသတ်မှု ကျုးလွန်ခဲ့ဖူးပြီး ထိုစဉ်ကတည်းက AirTag အပေါ် ဝေဖန်မှုများ စတင်ထွက်ပေါ်လာခဲ့သည်။

Apple သည် ထိုအချိန်က ၎င်းတို့အနေဖြင့် လုံခြုံရေးဆိုင်ရာပြဿနာများကို ဖြေရှင်းနိုင်ရန် အကြံပေးများဖြင့် ဆွေးနွေးသွားမည်ဟု ထုတ်ပြန်ခဲ့ဖူးသော်လည်း ယခုဖြစ်ရပ်အပေါ်တွင်မူ ထုတ်ပြန်မှု တစ်စုံတစ်ရာမရှိသေးကြောင်း သိရသည်။

ကူးယူဖော်ပြခွင့်မပြုပါ။
Source: CNN Business
Photo: BBC

ကုန်တင်ကားယာဉ်မောင်းများ သပိတ်မှောက်ထားသောကြောင့် တောင်ကိုးရီးယားတွင် စက်သုံးဆီပြတ်လပ်

တောင်ကိုးရီးယားတွင် ကုန်တင်ကားဒရိုင်ဘာများက နိုင်ငံနှင့် အဝှမ်းသပိတ်မှောက်ထားသဖြင့် စက်သုံးဆီအရောင်းဆိုင် ၁၀၀ ခန့် ဆီပြတ်လပ်မှုဖြစ်ပွားနေပြီး အဆိုပါ ကားဒရိုင်ဘာများကို ထောက်ခံသောအားဖြင့် နိုင်ငံလုံးဆိုင်ရာ သမဂ္ဂအဖွဲ့ကလည်း အထွေအထွေသပိတ်ကို ဖော်ဆောင်ရန် ပြင်ဆင်နေကြောင်း သိရသည်။

ကုန်တင်ကားဒရိုင်ဘာများသည် နိုဝင်ဘာလတွင် စတင်အသက်ဝင်မည်ဖြစ်သော အနိမ့်ဆုံးလုပ်အားခ သတ်မှတ်သည့်အစီအစဉ်ကို မကျေနပ်ရာမှ သပိတ်စတင်ခဲ့ကြခြင်းဖြစ်ပြီး အစိုးရနှင့် သမဂ္ဂတာဝန်ရှိသူများအကြား ဆွေးနွေးမှု နှစ်ကြိမ်တိုင်ပြုလုပ်ခဲ့သော်လည်း လက်ရှိအချိန်အထိ ကြေလည်မှု မရရှိသေးပါ။

ထိုကဲ့သို့ သပိတ်ဖော်ဆောင်မှုကြောင့် အထိနာဆုံးကဏ္ဍများမှာ စက်သုံးဆီနှင့် ဆောက်လုပ်ရေးကဏ္ဍများဖြစ်ပြီး ကုန်စည်စီးဆင်းမှု မရှိသလောက်ဖြစ်သွားသဖြင့် တောင်ကိုးရီးယား အစိုးရသည် သပိတ်ကို အလျှင်အမြန်အဆုံးသတ်နိုင်ရန် ဖိအားပေးလာခဲ့ပြီဖြစ်သည်။

ပြီးခဲ့သည့် တနင်္ဂနွေနေ့တွင် တောင်ကိုးရီးယားသမ္မတ ယွန်းဆော့ယိုသည် ရေနံချက်စက်ရုံနှင့် သံသတ္တုစက်ရုံများနှင့် သက်ဆိုင်သည့် ကုန်တင်ကားမောင်းသမားများကို လုပ်ငန်းခွင်သို့ ပြန်ဝင်ရန် အမိန့်ထုတ်ပြန်ခဲ့ပြီး အဆိုပါကဏ္ဍများတွင် အထိနာလာသည်ကို သိသာစေခဲ့သည်။

သမ္မတယွန်းအနေဖြင့် ပြီးခဲ့သည့် အပတ်ကလည်း ဘိလပ်မြေထုတ်လုပ်ရေး ကဏ္ဍရှိ အလုပ်သမားများကို လုပ်ငန်းခွင်သို့ ပြန်ဝင်ရန် အမိန့်ထုတ်ပြန်ခဲ့ဖူးပြီး တောင်ကိုးရီးယားနိုင်ငံသမိုင်းတွင် ထိုကဲ့သို့ အတင်းအကြပ်လုပ်ငန်းခွင်သို့ ပြန်ဝင်ရန် အမိန့်ထုတ်ပြန်သည်မှာ သမိုင်းတွင် ယခုအချိန်သာရှိသေးသည်။

ဘိလပ်မြေထုတ်လုပ်ရေးကဏ္ဍတွင် ဆန္ဒပြ သပိတ်မှောက်နေသည့် ယာဉ်မောင်းများမှာ လူဦးရေ ၂၅၀၀ ခန့်ရှိပြီး လက်ရှိအချိန်တွင် နိုင်ငံအတွင်းရှိ ဆောက်လုပ်ရေး လုပ်ငန်းခွင်ပေါင်း ၅၀၈ ခုမှာ ရပ်တန့်သွားခဲ့ပြီဖြစ်ကာ အစိုးရအနေဖြင့် နေ့စဉ် ဒေါ်လာ ၂၂၄သန်း (ဝမ် ဘီလီယံ ၃၀၀ခန့်) ဆုံးရှုံးလျက်ရှိကြောင်း သိရသည်။

ကုန်တင်ယာဉ်မောင်းများ သမဂ္ဂပအပါအဝင် သမဂ္ဂများဖြင့် စုဖွဲ့ထားသည့် ကိုးရီးယားကုန်သွယ်ရေး သမဂ္ဂများ အဖွဲ့ချုပ်က သမ္မတ၏ ထုတ်ပြန်ချက်သည် ခြိမ်းခြောက်သည့် အမိန့်နှင့် တူနေပြီး အစိုးရတာဝန်ရှိသူများအနေဖြင့် ညှိုနှိုင်းရေးကို စဉ်းစားသင့်ကြောင့် တုံ့ပြန်ဖြေကြားခဲ့သည်။

တောင်ကိုးရီးယား အစိုးရပိုင်းသည် သမဂ္ဂများ၏ တောင်းဆိုချက်ကို လွယ်လွယ်နှင့် လိုက်လျောရန် သဘောထားမရှိဘဲ ကုန်တင်ကားယာဉ်မောင်းများကို လစာလုံလောက်ပါလျက် အခွင့်အရေးပိုယူချင်သူများအဖြစ် ပုံဖော်ထုတ်ပြန်လျက်ရှိသည်။

ကူးယူဖော်ပြခွင့်မပြုပါ။
Source: Reuters, CNA
Photo: The Korea Times

Air India နှင့် Vistara လေကြောင်းလိုင်းတို့ ပူးပေါင်းရန် Tata နှင့် စင်္ကာပူလေကြောင်းလိုင်း သဘောတူ

Vistara လေကြောင်းလိုင်းသည် အိန္ဒိယ Tata ကုမ္ပဏီနှင့် စင်္ကာပူလေကြောင်းလိုင်း (SAI) တို့ ပူးတွဲပိုင်ဆိုင်သည့် လေကြောင်းလိုင်းဖြစ်ပြီး Air India မှာမူ Tata မှ အလုံးစုံပိုင်ဆိုင်ထားခြင်းဖြစ်ရာ ယခုပေါင်းစည်းမှုကြောင့် အိန္ဒိယ လေကြောင်းပို့ဆောင်မှုတွင် Tata ၏ အခန်းကဏ္ဍမှာ ပိုမိုကြီးမားလာတော့မည်ဖြစ်သည်။

ကားမှစ၍ သံမဏိအပါအဝင် နယ်ပယ်စုံတွင် ရင်းနှီးမြှပ်နှံထားသည့် အိန္ဒိယ၏ Tata စီးပွားရေး လုပ်ငန်းစုကြီးသည် ယခုပေါင်းစည်းမှုတွင် ရှယ်ယာ ၇၄.၉ ရာခိုင်နှုန်း ပိုင်ဆိုင်မည်ဖြစ်ပြီး စင်္ကာပူလေကြောင်းလိုင်းက ၂၅.၁ ရာခိုင်နှုန်းပိုင်ဆိုင်မည်ဖြစ်ကြောင်း သိရသည်။

ယခုသဘောတူညီချက်တွင် အပြန်အလှန်အားဖြင့် စင်္ကာပူလေကြောင်းလိုင်း (SIA) က Air India တွင် ဒေါ်လာ သန်း ၂၅၀ ပြန်လည်ရင်းနှီးမြှပ်နှံမည်ဖြစ်ပြီး အိန္ဒိယလေကြောင်း အာဏာပိုင်အဖွဲ့အစည်း၊ ဗဟိုဘဏ်နှင့် စီးပွားရေးလက်ဝါးကြီးအုပ်မှု တိုက်ဖျက်ရေးအဖွဲ့တို့၏ ခွင့်ပြုချက် ချထားပေးမှုအပေါ် မူတည်ကာ ပေါင်းစည်းမှုသည် ၂၀၂၄ တွင် အပြီးသတ်နိုင်မည်ဟု မျှော်မှန်းထားကြသည်။

Tata လုပ်ငန်းစုကြီး၏ ဥက္ကဋ္ဌဖြစ်သူ အန် ချန်ဒရာဆီခရန်က ယခုပေါင်းစည်းမှုသည် Air India ကို ကမ္ဘာ့ထိပ်တန်း လေကြောင်းလိုင်းတစ်ခုအဖြစ် ပြန်လည်ဆွဲတင်ပေးနိုင်မည့် မှတ်တိုင်တစ်ခုအဖြစ် မှတ်ချက်ပြုသည်။

Air India သည် စတင်တည်ထောင်စဉ်က ၎င်းတို့၏ မဟာရာဇာပုံ လာဘ်ကောင်လေးနှင့် လေယာဉ်အတွင်းပိုင်း အပြင်အဆင်များကြောင့် လူသိများခဲ့သော်လည်း ၂၀၀၀ ခုနှစ်နောက်ပိုင်းတွင် လေယာဉ်အတွင်းခန်း ယိုယွင်းမှုများ၊ ဝန်ဆောင်မှု ညံ့ဖျင်းမှုများကြောင့် နာမည်ပြန်လည် ကျဆင်းသွားခဲ့ရသည်။

အဆိုပါ လေကြောင်းလိုင်းကို Tata လုပ်ငန်းစုကြီး၏ ကနဦး တည်ထောင်သူဖြစ်သော သူဌေးကြီး JRD Tata က ၁၉၃၂ ခုနှစ်တွင် စတင်တည်ထောင်ခဲ့ခြင်းဖြစ်ပြီး ၁၉၅၃ ခုနှစ်တွင် အိန္ဒိယ အစိုးရပိုင်အဖြစ် ပြောင်းလဲခဲ့ကာ နှစ်ပေါင်းများစွာ ကြာပြီးနောက် Tata လုပ်ငန်းစု၏ လက်ထဲသို့ ပြန်လည် ရောက်ရှိခဲ့ခြင်းဖြစ်သည်။

ယခုပေါင်းစည်းမှုကြောင့် လက်ရှိ အိန္ဒိယလေကြောင်းကဏ္ဍတွင် ဦးဆောင်သူဖြစ်သော IndiGo လေကြောင်းလိုင်းကို ပခုံးခြင်းယှဉ်ပြိုင်လာနိုင်မည်ဖြစ်ကာ အိန္ဒိယပြည်တွင်းတွင် ဈေးကွက်နည်းပါးနေသေးသော SIA အတွက်လည်း ခြေကုပ်ကောင်းကောင်း ရရှိသွားမည်ဖြစ်သည်။

ကူးယူဖော်ပြခွင့်မပြုပါ။
Source: Reuters
Photo: The Online Citizen Asia

တရုတ်တွင် စက္ကူဖြူဆန္ဒပြပွဲများကြောင့် စာရေးကိရိယာကုမ္ပဏီ အခက်တွေ့

နိုင်ငံရေးလှုပ်ရှားမှုများ မရှိသလောက်ရှားသည့် တရုတ်နိုင်ငံတွင် ပြီးခဲ့သည့်အပတ်က စတင်၍ နိုင်ငံနှင့် အဝှမ်း ဆန္ဒပြပွဲများ ဖြစ်ပေါ်လျက်ရှိပြီး နိုင်ငံ၏ တင်းကြပ်သော ကိုဗစ်စည်းကမ်းများနှင့် ဆင်ဆာကိစ္စများအပေါ် ပြုပြင်ပြောင်းလဲရန် တောင်းဆိုသည့် အဓိပ္ပါယ်ဖြင့် ဆန္ဒပြလူငယ်များသည် စက္ကူဖြူများကို ကိုင်ဆောင်ကာ ချီတက်ဆန္ဒပြလျက်ရှိကြသည်။

ကနဦးတွင် ကိုဗစ်စည်းမျဉ်များ တင်းကြပ်မှုကို ဆန္ဒပြခြင်းဖြစ်သော်လည်း တရုတ်နိုင်ငံ၏ တင်းကြပ်သော ဆင်ဆာစည်းမျဉ်များကြောင့် လွတ်လပ်စွာထုတ်ဖော်ခွင့် မရှိခြင်းကိုပါ ထုတ်ဖော်လာကြပြီး ဆန္ဒပြသူများက A4 ရုံးသုံးစက္ကူများ ကိုင်ဆောင်ကာ ဆန္ဒပြလျက်ရှိသဖြင့် တရုတ်၏ အကြီးဆုံးသော စာရေးကိရိယာ ထုတ်လုပ်ရေး ကုမ္ပဏီကြီး M&Gသည် မျက်ခုံးလှုပ်စရာ ဖြစ်ရပ်နှင့် ကြုံရလျက်ရှိသည်။

M&Gသည် ရှန်ဟိုင်းအခြေစိုက် စာရေးကိရိယာထုတ်လုပ်ရေး ကုမ္ပဏီဖြစ်ပြီး ၎င်းတို့၏ ထုတ်ကုန်များကို နိုင်ငံပေါင်း ၅၀ကျော်သို့ တင်ပို့ရောင်းလျက်ရှိကာ တရုတ်နိုင်ငံအတွင်း စာရေးကိရိယာဆိုင်ပေါင်း ၈သောင်းကျော်ဖွင့်လှစ်ထား၍ ရှန်ဟိုင်းစတော့အိတ်ချိန်းတွင် ပါဝင်ထားသည့် ကုမ္ပဏီဖြစ်သည်။

M&Gက နိုင်ငံအတွင်း A4 စာရွက်များ ရောင်းချမှုကို ၎င်းတို့၏ ဆိုင်များတွင်သာမက အွန်လိုင်းပါ ရပ်နားထားမည်ဖြစ်ကြောင်း ထုတ်ပြန်ထားသည် စာတစ်စောင်သည် ပြီးခဲ့သည် တနင်္လာနေ့တွင် တရုတ်ဆိုရှယ်မီဒီယာများထက် ပျံနှံနေခဲ့ပြီး မကြာခင်မှာပင် ၎င်းတို့၏ ရှယ်ယာဈေးနှုန်းများသည် ၃ ရာခိုင်နှုန်းကျဆင်းသွားခဲ့ရသည်။

အဆိုပါ စာထဲတွင် ၎င်းတို့ကုမ္ပဏီထုတ် A4 စက္ကူများကို ဥပဒေနှင့် မညီသော ကိစ္စများတွင် အသုံးပြု၍ နိုင်ငံ၏ တည်ငြိမ်အေးချမ်းမှုကို ပျက်ပြားစေခြင်းမှ ကာကွယ်ရန်အတွက် စက္ကူများရောင်းချမှုကို ခေတ္တရပ်ဆိုင်းထားမည်ဖြစ်ကြောင်းပါရှိသည်။

သို့သော် ထိုကဲ့သို့ ရှယ်ယာဈေးများ ထိုးကျပြီး မကြာမီမှာပင် အဆိုပါ စာသည် လုပ်ကြံရေးသားထားသည့် စာသာဖြစ်ပြီး M&Gမှ ထုတ်ပြန်ခြင်း မဟုတ်ကြောင်းနှင့် ရဲဌာနသို့ တိုင်ချက်ဖွင့်ထားပြီဖြစ်ကြောင်း M&Gက ထုတ်ပြန်ကြေငြာခဲ့သည်။

သည့်အပြင် ကုမ္ပဏီ၏ ထုတ်လုပ်ရေးနှင့် စာရေးကိရိယာဆိုင်များကိုလည်း ပုံမှန်အတိုင်း လည်ပတ်နေကြောင်း ရေးသားထားသော်လည်း အင်တာနက် အသုံးပြုသူ တရုတ်ပြည်သူတစ်ဦးကမူ ၎င်းအနေဖြင့် တရုတ်၏ အကြီးဆုံး အွန်လိုင်းရှော့ပင်းဆိုက် ဖြစ်သော Taobao မှ A4 စက္ကူမှာယူရာတွင် မှာယူ၍ မရပါဟု တုံပြန်စာ ရရှိကြောင်း ပြောပြခဲ့သည်။

အခြားတစ်ဦးကလည်း အကယ်၍ ထွက်ပေါ်ခဲ့သော စာသည် ကောလာဟလသာဖြစ်ပါက မည်သည့်အတွက်ကြောင့် Waobao တွင် မှာယူ၍ မရသည်လဲဟု မှတ်ချက်ရေးသားခဲ့ပြီး အထူးသဖြင့် ဘေဂျင်းနှင့် ရှန်ဟိုင်းကဲ့သို့ မြို့ကြီးများ၏ လိပ်စာဖြင့် မှာယူပါက delivery fail ဟု ပြသကြောင်း အခြားတစ်ဦးကလည်း မှတ်ချက်ပြုသွားခဲ့သည်။

M&G ကုမ္ပဏီအနေဖြင့် အဆိုပါ ဖြစ်ရပ်များအပေါ် မီဒီယာများ၏ မေးခွန်းပေးပို့မှုများကို တုံပြန်ဖြေကြားခြင်း မပြုသေးကြောင်း သိရသည်။

ကူးယူဖော်ပြခွင့်မပြုပါ။
Source: CNN Business
Photo: CBC

ဒေဝါလီခံသွားသည့် FTX တွင် စင်္ကာပူမှ အသုံးပြုသူများမှာ ဒုတိယ အများဆုံးဖြစ်

မကြာသေးခင်က ဒေဝါလီခံသွားသည့် ဒစ်ဂျစ်တယ်ငွေကြေးဖလှယ်ရေးဝက်ဆိုက် FTX သို့ ၂၀၂၂ ခုနှစ် ဇန်နဝါရီမှ အောက်တိုဘာအတွင်း ဝင်ရောက်အသုံးပြုမှ အများဆုံး နိုင်ငံစာရင်းကို ထုတ်ပြန်ကြေငြာခဲ့ရာ စင်္ကာပူသည် ၅ရာခိုင်နှုန်းဖြင့် ဒုတိယ အများဆုံးအဖြစ်ရပ်တည်ခဲ့သည်။

ဒစ်ဂျစ်တယ်ငွေကြေးများ၏ အချက်အလက်များကို ကောက်ယူစုဆောင်းသော CoinGecko ဝဘ်ဆိုက်၏ တင်ပြချက်အရ စင်္ကာပူမှ ပျမ်းမျှ တစ်လလျှင် FTX သို့ ဝင်ရောက်အသုံးပြုသူပေါင်း ၂သိန်း ၄သောင်းကျော် ရှိကြောင်းသိရသည်။

FTX သို့ ဝင်ရောက် အသုံးပြုသည့် နိုင်ငံများ စာရင်းတွင် တောင်ကိုးရီးယားနိုင်ငံက တစ်လ ပျမ်းမျှအသုံးပြုသူဦးရေ ၂သိန်း ၉သောင်းကျော်ဖြင့် အများဆုံးဖြစ်ပြီး ရာခိုင်နှုန်းအားဖြင့် ၆.၁ ရာခိုင်နှုန်းရှိကာ ဂျပန်မှာ ၄.၆ ရာခိုင်နှုန်းဖြင့် တတိယလိုက်လျက်ရှိသည်။

ပြီးခဲ့သည့် ၂၀၂၁ ခုနှစ်တွင် ဒစ်ဂျစ်တယ်ငွေလဲဝဘ်ဆိုက်တစ်ခုဖြစ်သော Binance က စင်္ကာပူမှ ထွက်ခွာခဲ့ပြီးနောက် စင်္ကာပူရှိ ဒစ်ဂျစ်တယ်ငွေကြေး အသုံးပြုသူအများစုသည် FTX သို့ ရွှေ့သွားခြင်းဖြစ်ကြောင်း CoinGecko ၏ အဆိုအရ သိရသည်။

CoinGecko ၏ အချက်အလက်များအရ FTX ကို အသုံးများသည့် အာရှနိုင်ငံများတွင် ထိုင်ဝမ်၊ အိန္ဒိယ၊ ထိုင်း၊ ဟောင်ကောင်၊ ဖိလစ်ပိုင်၊ ဗီယက်နမ်နှင့် အင်ဒိုနီးရှားတို့လည်းပါဝင်ကြသည်။

Binance နှင့် FTX တို့နှစ်ခုစလုံးသည် စင်္ကာပူတွင် တရားဝင် လိုင်စင်တင်ထားခြင်းမရှိသည့်အပြင် Binance သည် ယမန်နှစ်က အသုံးပြုသူများလာစေရန် ဆွဲဆောင်မှုများ ရှိသဖြင့် စင်္ကာပူ ငွေလွှဲဝန်ဆောင်မှု ဥပဒေကို ချိုးဖောက်ရာရောက်သောကြာင့် စင်္ကာပူအာဏာပိုင်များ၏ သတိထားရမည့် ကုမ္ပဏီစာရင်းတွင် ထည့်သွင်းခြင်းခံခဲ့ရသေးသည်။

ထိုစဉ်ကမူ FTX မှာ အသုံးပြုသူများကို ဆွဲဆောင်ခြင်းပြုလုပ်ကြောင်း အထောက်အထားများ မတွေ့ရှိသလို စင်္ကာပူဒေါ်လာဖြင့် ဒစ်ဂျစ်တယ်ငွေကြေး ဝန်ဆောင်မှု မပေးသောကြောင့် သတိထားရမည့် စာရင်းတွင် ထည့်သွင်းခြင်းမှ လွတ်ကင်းခဲ့သည်။

လက်ရှိအချိန်တွင် စင်္ကာပူရှိ FTX အသုံးပြုသူများမှာ ဝဘ်ဆိုက်သို့ ဝင်ရောက်၍ ရနေသေးသော်လည်း ရင်းနှီးမြှပ်နှံမှုများ ပြန်လည်ရရှိမည်မှာ မသေချာကြောင်းနှင့် FTX မှာ တရားဝင် လိုင်စင်ပြုလုပ်ထားခြင်း မရှိသောကြောင့် စင်္ကာပူအာဏာပိုင်များအနေဖြင့် ကြားဝင်အရေးယူဆောင်ရွက်ရန် မလွယ်ကူကြောင်း သိရသည်။

ကူးယူဖော်ပြခွင့်မပြုပါ။
Source: The Strait Times
Photo: The Diplomat

ဝေဖန်မှုများရှိနေသော်လည်း ပိုင်းလော့တစ်ဦးတည်းထားရှိရန် လေကြောင်းလိုင်းများ ဆက်လက်ပြင်ဆင်

လုံခြုံရေးပိုင်းတွင် အားနည်းသွားနိုင်ကြောင်း ဝေဖန်မှုများ ရှိနေသော်လည်း ခရီးသည်တင်လေကြောင်းလိုင်းများတွင် ပိုင်းလော့နှစ်ဦးအစား တစ်ဦးတည်းဖြင့် မောင်းနှင်စေရန် လေကြောင်းလိုင်းများနှင့် လေကြောင်းအာဏာပိုင်များက ကြိုးပမ်းလျက်ရှိကြောင်း သိရသည်။

အဆိုပါကဲ့သို့ ပိုင်းလော့တစ်ဦးတည်းဖြင့် မောင်းနှင်လည်ပတ်ပါက စရိတ်စကခြွေတာနိုင်မည်ဖြစ်သလို လေယာဉ်မှူးများ ရှားပါးမှု ပြဿနာကို ဖြေရှင်းနိုင်မည်ဖြစ်သော်လည်း ပိုင်းလော့တစ်ဦးတည်းအပေါ်တွင် တာဝန်များ ပုံအပ်ထားခြင်းမှာ လုံခြုံရေးအရ မေးခွန်းများစွာ ရှိနေခဲ့သည်။

ယင်းအစီအစဉ်ကို အကောင်အထည်ဖော်ရန် ကြိုးပမ်းနေသည့်နိုင်ငံများတွင် ဂျာမနီ၊ ဗြိတိန်နှင့် နယူးဇီလန်အပါအဝင် နိုင်ငံပေါင်း ၄၀ခန့်ပါဝင်ပြီး ပိုင်းလော့တစ်ဦးတည်းဖြင့် မောင်းနှင်ခြင်းကို တရားဝင်ဖြစ်စေရန် ကုလသမဂ္ဂ၏ လက်အောက်ခံအဖွဲ့အစည်းတစ်ခုဖြစ်သော နိုင်ငံတကာလေကြောင်းအဖွဲ့ချုပ် (ICAO) ထံသို့ တွန်းအားပေးလျက်ရှိကြောင်း သိရသည်။

ဥရောပ လေကြောင်းလုံခြုံရေးအဖွဲ့ချုပ် (EASA) အနေဖြင့် ပိုင်းလော့တစ်ဦးတည်းဖြင့် မောင်းနှင်ရာတွင် လိုအပ်မည့် နည်းပညာများနှင့် နည်းပဒေများ ဖော်ဆောင်ရန်အတွက် လေယာဉ်ထုတ်လုပ်ရေး ကုမ္ပဏီများဖြင့် ပူးပေါင်းဆောင်ရွက်လျက်ရှိပြီး ၂၀၂၇ခုနှစ်တွင် စတင်အကောင်အထည်ဖော်နိုင်ရန် ရည်မှန်းထားသည်။

သို့သော် ပိုင်းလော့များနှင့် ခရီးသည်များ အတွက်မူ အဆိုပါ သတင်းမှာ သွေးလန့်စရာ ဖြစ်နေခဲ့သည်။

သြစတြေးလျ ပိုင်းလော့အဖွဲ့ချုပ်၏ ဥက္ကဋ္ဌဖြစ်သလို ကာတာလေကြောင်းလိုင်း၏ ပိုင်းလော့တစ်ဦးဖြစ်သည့် မစ္စတာ တိုနီလူးကပ်စ်က အကယ်၍ ပိုင်းလော့တစ်ဦးတည်းဖြင့်သာ လေယာဉ်မောင်းနှင်ပါက အရေးပေါ်အခြေအနေတွင် ကိုင်တွယ်ရန် အလွန်ခက်ခဲမည်ဟု သုံးသပ်သည်။

သာဓကအနေဖြင့် ၂၀၀၉ ခုနှစ် ဇွန်လ ၁ရက်နေ့တွင် ပြင်သစ်လေကြောင်းလိုင်း အမှတ် ၄၄၇ ၏ ဖြစ်ရပ်ကို ကြည့်နိုင်ပြီး ထိုစဉ်က လေယာဉ်မှာ အမြင့်ပေ တစ်သောင်းကျော်တွင် ပျံသန်းနေစဉ်ဖြစ်ပြီး လေယာဉ်မှူကြီး ခေတ္တအနားယူနေချိန်တွင် လက်ထောက်လေယာဉ်မှူးသည် အမြန်နှုန်းပြဒိုင်ခွက်၌ သတိပေးချက်ကို ရရှိခဲ့သည်။

လေယာဉ်မှူးကြီးအနေဖြင့် စက္ကန့်၉၀ အတွင်း လေယာဉ်မောင်းခန်းသို့ အရောက်ပြန်လာခဲ့သော်လည်း လေယာဉ်မှာ အမြန်နှုန်းကျဆင်း၍ ပင်လယ်ထဲသို့ ထိုးစိုက်ကာ လေယာဉ်မှူးများ၊ လေယာဉ်ဝန်ထမ်းများနှင့် ခရီးသည်စုစုပေါင်း ၂၂၈ဦး အသက်ဆုံးရှုံးခဲ့ရသည်။

အထက်ပါကဲ့သို့ ပိုင်းလော့တစ်ဦးတည်းဖြင့် မောင်းနှင်ပါက တစ်ဦးတည်းသော ပိုင်းလော့အနေဖြင့် ကျန်းမာရေးကြောင့် သော်လည်းကောင်း၊ အခြားတစ်စုံတစ်ခုကြောင့်သော်လည်းကောင်း အရေးပေါ်အခြေအနေဖြစ်လာလျှင် မည်သည့်နည်းပညာ၊ အလိုလျောက်စနစ်များဖြင့် လုံခြုံရေး စိတ်ချမှု ရရှိစေရန် ကြံဆောင်မည်ဆိုသည်ကို လက်ရှိအချိန်တွင် ရှင်းလင်းစွာ မသိရသေးပါ။

ကူးယူဖော်ပြခွင့်မပြုပါ။
Source: The Strait Times
Photo: L3Harris Flight Academy

 

Alibaba ၏ သုံးလပတ်စာရင်းရှင်းတမ်းတွင် မျှော်လင့်ထားသည်ထက် အမြတ်ငွေ လျှော့နည်းခဲ့

ကိုဗစ်၏ ရိုတ်ခတ်မှုများ အဆုံးမသတ်သေးခြင်းနှင့် စားသုံးသူများ၏ ငွေသုံးနိုင်အား လျှော့နည်းနေခြင်းက Alibaba ၏ သုံးလပတ် စာရင်းရှင်းတမ်းတွင် အမြတ်ငွေရာခိုင်နှုန်းကို ထင်ထားသည်ထက် လျှော့နည်းစေခဲ့သည်။

အထူးသဖြင့် တရုတ်ပြည်မကြီးတွင် လက်ရှိအချိန်အထိ ဇီးရိုးကိုဗစ်ပေါ်လစီကို ကိုင်စွဲထားခြင်းက မကြာခဏ Lockdown လုပ်ခြင်းများ ဖြစ်ပေါ်စေပြီး နိုင်ငံ၏ စီးပွားရေးကို တုံ့နှေးစေခဲ့ကာ နိုင်ငံသားများ၏ ငွေသုံးနိုင်အားကို လျှော့နည်းစေခဲ့သည်ဟု သုံးသပ်ကြသည်။

သည့်အပြင် တရုတ်တွင် စိုက်ပျိုးရေးကဏ္ဍ ထုတ်ကုန်များကို စားသုံးသူများထံ တိုက်ရိုက်ချိတ်ဆက်ရောင်းဝယ်နိုင်သည့် Pinduoduo ကဲ့သို့ ပလက်ဖောင်းများ၊ ByteDance ၏ Tiktok တရုတ်ဗားရှင်းဖြစ်သော Douyin တို့က အွန်လိုင်းရှော့ပင်းကဏ္ဍသို့ နယ်ပယ်ချဲ့ထွင်လာခြင်းများကြောင့်လည်း Alibaba ၏ ဈေးကွက်ဝေစုကို ထိခိုက်မှုများ ရှိလာခဲ့သည်။

Alibaba ၏ ထုတ်ပြန်ချက်အရ စက်တင်ဘာလတွင် ကုန်ဆုံးခဲ့သော ၂၀၂၂ခုနှစ်၏ တတိယသုံးလပတ် စာရင်းရှင်းတမ်းတွင် အမြတ်ငွေ ၃ ရာခိုင်နှုန်း တိုးတက်လာခဲ့ပြီး ပမာဏအားဖြင့် ယွမ် ၂၀၇.၁၈ ဘီလီယံ (ဒေါ်လာ ၂၈.၉၆ ဘီလီယံ) ရှိကြောင်း သိရသည်။

Alibaba သည် ယမန်နှစ်က တရုတ်အာဏာပိုင်များ၏ အရေးယူမှုကိုခံခဲ့ရပြီးနောက် ပြန်လည်ရုန်းထရန် ကြိုးပမ်းနေဆဲဖြစ်ကာ မကြာသေးခင်က ပြီးစီးသွားခဲ့သည့် Single Day (11.11) ဈေးရောင်းပွဲတွင်လည်း မည်မျှရောင်းရသည်ကို ထုတ်ပြန်ခြင်း မပြုခဲ့ပါ။

Alibaba အနေဖြင့် ထိုသို့ မထုတ်ပြန်ခြင်းမှာ ယခုနှစ်သည် ပထမဆုံးအကြိမ်ဖြစ်ပြီး ရောင်းအားမှာ ယမန်နှစ်ကနှင့် မတိမ်းမယိမ်းဖြစ်ကြောင်း မီဒီယာများသို့ ပြောကြားခဲ့သော်လည်း ယမန်နှစ်သည် ၎င်းတို့၏ Single Day ဈေးရောင်းပွဲတော်နှစ်များအတွင်း ရောင်းအားအနည်းဆုံး နှစ်ဖြစ်သည်။

ကူးယူဖော်ပြခွင့်မပြုပါ။
Source: Reuters
Photo: Tech in Asia

ဗဟိုဘဏ်များ ချိတ်ဆက်ငွေလွှဲနိုင်မည့် နားလည်မှု စာချွန်လွှာကို အာဆီယံ နိုင်ငံ(၅)ခု ရေးထိုး

အဆိုပါ နားလည်မှု စာချွန်လွှာကို အင်ဒိုနီးရှားနိုင်ငံ ဘာလီမြို့တွင် ကျင်းပသည့် G20 ထိပ်သီးအစည်းအဝေးပွဲတွင် ရေးထိုးခဲ့ခြင်းဖြစ်ပြီး ပါဝင်သည့် နိုင်ငံများမှာ အင်ဒိုနီးရှား၊ မလေးရှား၊ ထိုင်း၊ ဖိလစ်ပိုင်နှင့် စင်္ကာပူတို့ဖြစ်ကြသည်။

အဆိုပါ စာချွန်လွှာလက်မှတ်ရေးထိုးပွဲ အခမ်းအနားတွင် အင်ဒိုနီးရှား ဗဟိုဘဏ်ဥက္ကဋ္ဌ ပယ်ရီ ဝါဂျီယိုက ယခု သဘောတူစာချုပ်ချုပ်ဆိုခဲ့သည့် ဒေသတွင်း ငွေကြေးဖလှယ်မှု ကွန်ရက်သည် QR ကုတ်အပေါ် အခြေခံသွားမည်ဖြစ်ကြောင်း ပြောကြားခဲ့သည်။

အင်ဒိုနီးရှားသည် ယခုနှစ်အစောပိုင်းတွင် ထိုင်းနှင့် အပြန်အလှန်ငွေလွှဲပြောင်းနိုင်သော QR ကုတ်စနစ်ကို စတင်အကောင်အထည်ဖော်ခဲ့ပြီးနောက် ယခုအခါ နောက်ထပ် အာဆီယံ လေးနိုင်ငံဖြင့် ချိတ်ဆက်နိုင်ခဲ့ခြင်းဖြစ်သည်။

ယခုစနစ်တွင် အမေရိကန်ဒေါ်လာသို့ ပြောင်းလဲတွက်ချက်၍ ငွေလွှဲပြောင်းမှုစနစ်အစား သက်ဆိုင်ရာနိုင်ငံ၏ ငွေကြေးအပေါ် မူတည်တွက်ချက်သည့် စနစ်ကို အသုံးပြုသွားမည်ဖြစ်ကြောင်း မစ္စတာ ပယ်ရီက ဆက်လက်ပြောကြားခဲ့သည်။

လက်ရှိတွင် အသေးစား ငွေကြေးလွှဲပြောင်းမှု စနစ်ကို စတင် အကောင်အထည်ဖော်မည်ဖြစ်သော်လည်း နောင်တွင် ကုန်သွယ်မှု အဆင့် ငွေလွှဲပြောင်းမှုမှသည် ဗဟိုဘဏ်အချင်းချင်း ဒစ်ဂျစ်တယ်ငွေကြေးများ လွှဲပြောင်းနိုင်သည့်အထိ အဆင့်မြှင့်တင်သွားရန်ရှိကြောင်း သိရသည်။

အဆိုပါ အခမ်းအနားသို့ အင်ဒိုနီးရှား သမ္မတ ဂျိုကိုဝီဒိုက ဗီဒီယိုဖြင့် မိန့်ခွန်းပြောကြားပေးခဲ့ပြီး ယနေ့ လက်မှတ်ရေးထိုး သဘောတူခဲ့သော ဒေသတွင်း ငွေလွှဲပြောင်းမှု စနစ်သည် ကမ္ဘာ့အဆင့် ကွန်ရက်ချိတ်ဆက်မှုသို့ တချိန်တွင် ရောက်ရှိနိုင်ရန် မျှော်လင့်ကြောင်း ပြောကြားသွားခဲ့သည်။

ကူးယူဖော်ပြခွင့်မပြုပါ။
Source: Bangkok Post
Photo: Reuters

Crypto Exchange တစ်ခုဖြစ်သော FTX ပြိုလဲမှုနှင့် နောက်ဆက်တွဲ ရိုတ်ခတ်မှုများ

ကမ္ဘာ့အကြီးဆုံး Crypto Exchange များတွင်တစ်ခုအပါအဝင်ဖြစ်သော FTX သည် ယခုအပတ်အတွင်း ဘဏ္ဍာရေး အခက်အခဲများဖြင့် ကြုံတွေ့နေရပြီးနောက် အဆိုပါ ဂယက်သည် ဒစ်ဂျစ်တယ်ငွေကြေးဈေးကွက်ကိုသာမက အားကစားကဏ္ဍကိုပါ ဆက်လက်ရိုက်ခတ်သွားနိုင်ကြောင်း သုံးသပ်လျက်ရှိသည်။

ပြီးခဲ့သည့် ရက်ပိုင်းတွင် FTX အသုံးပြုသူများသည် ၎င်းတို့၏ အကောင့်များအတွင်းမှ ဒစ်ဂျစ်တယ်ငွေကြးပေါင်း ဒေါ်လာ ၆ ဘီလီယံခန့်ကို အလုအယက် ထုတ်ယူခဲ့ကြပြီးနောက် FTX သည် လုပ်ငန်းဆက်လက်လည်ပတ်ရန်အတွက် ဘဏ္ဍာရေးလိုငွေ ဒေါ်လာ ၈ဘီလီယံအထိရှိသွားခဲ့သည်။

လက်ရှိတွင် FTX သည် ဒစ်ဂျစ်တယ်ငွေကြေးများ ဆက်လက်ထုတ်ယူမှုနှင့် အသုံးပြုသူအသစ်များ လက်ခံခြင်းကို ဆက်လက်လုပ်ဆောင်ပေးနိုင်တော့မည်မဟုတ်ဘဲ ကုမ္ပဏီ၏ CEO ဘန့်မန်း ဖရိုင်းသည် အသက်ကယ်ဆေးအနေဖြင့် အခြားရင်းနှီးမြှပ်နှံမှုများ ရရှိရန် အပူတပြင်းလုပ်ဆောင်လျက်ရှိကြောင်း သိရသည်။

ကနဦးတွင် အခြား Crypto Exchange တစ်ခုဖြစ်သော Binance က FTX ကို ဝယ်ယူမည်ဟု သတင်းများ ထွက်ပေါ်ခဲ့သော်လည်း နောက်ပိုင်းတွင် Binance က လက်ရှောင်သွားသဖြင့် ဆွေးနွေးမှုမှာ ပျက်ပြယ်သွားခဲ့ရကာ CEO ဘန့်မန်း ဖရိုင်းက သူ့အနေဖြင့် ရင်းနှီးမြှပ်နှံငွေရရှိရန် ကြိုးပမ်းနေကြောင်း ဝန်ထမ်းများသို့ ပေးပို့သော မေးလ်အရ သိရသည်။

သို့သော်လည်း ယခုဖြစ်ရပ်သည် ဒစ်ဂျစ်တယ်ငွေကြေးလောက၌ အကြီးဆုံးပြိုလဲမှု ဖြစ်လာနိုင်သလို ဆုံးရှုံးသွားသည့် အသုံးပြုသူဦးရေမှာလည်း အလွန်မြင့်မားလေရာ ရင်းနှီးမြှပ်နှံရန် စဉ်းစားသူများအဖို့ ဓါးခုတ်ရာ လက်ဝင်လျှိုရမည့် ကိစ္စဖြစ်သည်။

သည့်အပြင် FTX သည် ဘတ်စကတ်ဘော၊ ဘေ့စ်ဘောနှင့် ဖော်မြူလာဝမ်း ပြိုင်ပွဲများနှင့် ပါတနာ စာချုပ်များ၊ စပွန်စာ စာချုပ်များကို နှစ်ရှည်ချုပ်ဆိုထားလေရာ ၎င်းတို့ ပြိုလဲပါက အဆိုပါ စာချုပ်များ မည်သို့ဆက်ဖြစ်မည်ဆိုသည်မှာ မေးခွန်းထုတ်စရာဖြစ်လာခဲ့သည်။

၎င်းတို့သည် NBA ဘတ်စကတ်ဘော အသင်းတစ်ခုဖြစ်သော Miami Heat အသင်း၏ အားကစားကွင်းအမည်ကို American Airlines Arena မှ FTX Arena အဖြစ်သို့ ပြောင်းလဲခေါ်ဝေါ်ရန်အတွက် ၁၉နှစ်စာ စာချုပ်အဖြစ် ဒေါ်လာ ၁၃၅ သန်းတန်ကြေးဖြင့် ချုပ်ဆိုထားသည့်အပြင် မေဂျာလိဂ် ဘေ့စ်ဘောအဖွဲ့ချုပ်ရှိ ဒိုင်များ၏ ယူနီဖောင်းပေါ်တွင် FTX လိုဂိုတပ်ဆင်ရန်အတွက်လည်း အဓိက စပွန်ဆာအဖြစ် စာချုပ်ချုပ်ထားခြင်းဖြစ်သည်။

သည့်အပြင် FTX သည် ဖော်မြုလာဝမ်း ပြိုင်ကားအသင်းတစ်သင်းဖြစ်သော Mercedes-AMG Petronas ၏ အဓိက စပွန်ဆာလည်းဖြစ်သလို ဘတ်စကတ်ဘောနှင့် ဘေ့စ်ဘော အားကစားရှိ နာမည်ကျော် အားကစားသမားများနှင့်လည်း ကုမ္ပဏီ၏ Brand Ambassador အဖြစ် စာချုပ်များစွာ ရှိနေသေးသည်။

လက်ရှိတွင် FTX အနေဖြင့် မီဒီယာများ၏ အာရုံစိုက်မှုကို ခံနေရခြင်းကြောင့် သတင်းဌာနများ၏ မေးမြန်းချက်များကို ပြန်လည်တုံ့ပြန်ခြင်းမပြုဘဲရှိရာ ကုမ္ပဏီအနေဖြင့် မည်သို့ရှေ့ဆက်မည်ဆိုသည့် အချက်အလက်များနှင့် စပွန်ဆာ စာချုပ်များ မည်သို့ ဆက်ဖြစ်မည်ကို မေးခွန်းများသည် ဆက်လက်စောင့်ကြည့်ရမည့် အခြေအနေဖြစ်သည်။

ကူးယူဖော်ပြခွင့်မပြုပါ။
Source: Reuters, CNN, CNBC
Photo: Watcher Guru

Blue Mark အတွက် ၈ဒေါ်လာအပါအဝင် အပြောင်းအလဲများစွာဖြင့် Elon Musk ၏ တွစ်တာ

တွစ်တာသည် ပြီးခဲ့သည့် စနေနေ့တွင် Apple ၏ App Store ၌ update အသစ်တင်ပေးခဲ့ပြီး အဆိုပါ အသစ်တွင် မိမိ Profile ၏ နောက်၌ ထင်ပေါ်ကျော်ကြားသူများကဲ့သို့ Blue Mark ပါဝင်ချင်ပါက လစဉ်ကြေး ၈ဒေါ်လာ ကျသင့်မည့် အစီအစဉ်အပါအဝင် အခြားပြောင်းလဲမှုများ ပြုလုပ်ထားကြောင်း သိရသည်။

Tesla နှင့် SpaceX တို့၏ Boss ဖြစ်သူ အီလွန်မက်ခ်စ်သည် ပြီးခဲ့သည့် တစ်ပတ်ခန့်က တွစ်တာကို ဒေါ်လာ ၄၄ ဘီလီယံဖြင့် ဝယ်ယူခဲ့ပြီးနောက် စတင်ပြောင်းလဲမှုများကို အချိန်တိုအတွင်း ပြုလုပ်နေခဲ့ပြီဖြစ်သည်။

ယမန်နေ့က App Store တွင် ထွက်ရှိခဲ့သော် Update ၌ လစဉ်ကြေး ၇.၉၉ ပေးသွင်းယုံဖြင့် သင် သဘောကျသော အနုပညာရှင်များ၊ နိုင်ငံရေးသမားများနှင့် ကုမ္ပဏီများကဲ့သို့ Blue Mark ကို အလွယ်တကူ ရယူနိုင်ပြီဖြစ်ကြောင်း ရေးသားထားသည်။

ယခင်ကမူ တွစ်တာသည် အဆိုပါ Blue Mark ကို အလွယ်တကူပေးလေ့မရှိဘဲ လူပုဂ္ဂိုလ် (သို့မဟုတ်) ကုမ္ပဏီအဖွဲ့အစည်း တစ်ခုခုသည် အဆိုပါ အကောင့်ကို အမှန်တကယ်အသုံးပြုကြောင်း စိစစ်ပြီးမှသာ ပေးအပ်လေ့ရှိသော်လည်း ယခုကဲ့သို့ အခကြေးငွေယူ၍ Blue Mark ပေးရာတွင် အစစ်အမှန်ဟုတ်မဟုတ် မည်သို့ အတည်ပြုမည်ကို တိကျရှင်းလင်းစွာ ဖော်ပြထားခြင်း မရှိခဲ့ပါ။

ယခု တွစ်တာ Update အသစ်တွင် ကြော်ငြာများကို တစ်ဝက်ခန့် လျှော့ချထားပြီး ဗီဒီယို အရှည်များကိုလည်း တင်နိုင်စေရရန် ပြုလုပ်ထားကြောင်း စနေ့နေ့ ကြေငြာချက်တွင် တွေ့ရသည်။

တွစ်တာသည် ယခင်က ၎င်းတို့၏ ဝန်ဆောင်မှု အတော်များများကို အခမဲ့ သုံးစွဲနိုင်သော်လည်း အီလွန်မက်ခ်စ်သည် သူ လက်လွှဲယူသည့်အချိန်၌ တွစ်တာကို ကြော်ငြာများတွင် အဓိက မှီခိုနေရမှုအား လျှော့ချ၍ အခြားနေရာများမှ ဝင်ငွေပိုမိုရရှိရန် ဆောင်ရွက်မည်ဟု ဆိုထားခဲ့ဖူးသည်။

လက်ရှိတွင် အဆိုပါ Update ၌ ပါဝင်သော Blue Mark ဝယ်ယူနိုင်သည့် ဝန်ဆောင်မှုကို အမေရိကန်၊ ကနေဒါ၊ သြစတြေးလျ၊ နယူးဇီလန်နှင့် ဗြိတိန်တို့တွင်သာ ရရှိဦးမည်ဖြစ်ပြီး အဆိုပါ နိုင်ငံများတွင် ကနဦး လုပ်ဆောင်ချက်များ အဆင်ပြေပါက ကျန်နေရာများကိုပါ ဆက်လက်ဝန်ဆောင်မှုပေးနိုင်ရန် ကြိုးပမ်းသွားမည်ဟု မက်ခ်စ်က ၎င်း၏ တွစ်တာတွင် ရေးသားခဲ့သည်။

သည့်အပြင် အခြားတွစ်တာပို့စ် တစ်ခု၌လည်း မက်ခ်စ်က တွစ်တာ၏ ရှာဖွေရေး Search စနစ်သည် အဓိက ပြင်ဆင်ရမည့်အပိုင်းဖြစ်ကြောင်း ရေးသားခဲ့သလို အခြားပို့စ်တစ်ခုတွင်လည်း အသုံးပြုသူတစ်ဦးက YouTube သည် ၎င်းတို့ ကြော်ငြာခများ၏ ၅၅ ရာခိုင်နှုန်းကို ပို့စ်တင်သူများသို့ ပြန်လည်ခွဲဝေပေးကြောင်း မှတ်ချက်ရေးသားခဲ့ရာ မက်ခ်စ်က “ ငါတို့က သာစေရမယ်” ဟု ပြန်လည် ဖြေကြားခဲ့သည်။

ကူးယူဖော်ပြခွင့်မပြုပါ။
Source: Reuters, BBC, Bloomberg
Photo: Reuters