Min Thwe Kyaw

တွစ်တာ Blue Tick အတွက် iPhone သုံးသူများ ပိုမိုကုန်ကျဖွယ်ရှိ

Tesla သူဌေး အီလွန်မက်ခ် ဝယ်ယူလိုက်သော လူမှုမီဒီယာပလက်ဖေါင်း တွစ်တာတွင် အပြောင်းအလဲများ ပြုလုပ်နေပြီး အသိအမှတ်ပြု အပြာရောင်အမှန်ခြစ် အမှတ်အသား – Blue Tick Verification အား ရယူလိုပါက အသုံးပြုသူတိုင်းသည် ၁ လလျှင် ၇.၉၉ ဒေါ်လာ ကျသင့်မည်ဖြစ်သည်။

သို့သော်လည်း twitter သည် Apple App Store ပေါ်တွင် ၎င်းတို့ application အား ၁၁ ဒေါ်လာခန့်ဖြင့် verification လစဉ်ကြေးကျသင့်စေပြီး အခြား နေရာများက ဒေါင်းလုဒ်ဆွဲလျှင်မူ ၇ ဒေါ်လာ ခန့်သာ ရှိမည်ဟု သတင်းထွက်ပေါ်နေသည်။
ယခုကိစ္စဖြစ်ပေါ်လာရခြင်းမှာ Apple ၏ မူဝါဒပိုင်းဆိုင်ရာ ပြောင်းလဲမှုကြောင့်ဖြစ်ပြီး Apple က ၎င်း၏ App Store ပေါ်တွင် တင်ရောင်းသော မည်သည့် developers, လုပ်ငန်းမဆို ၁ နှစ်လျှင် ဒေါ်လာ ၁ သန်းကျော်ရရှိပါက အရောင်း၏ ၃၀% ကို Apple က ဖြတ်ယူလိုသောကြောင့်ဖြစ်သည်။

Apple နှင့် တွစ်တာပိုင်ရှင်သစ် အီလွန်မက်ခ်တို့အကြား အဆိုပါ မူဝါဒနှင့်ပတ်သက်၍ လူသိရှင်ကြား ပြဿနာတက်ခဲ့သည်။
ယခု သတင်းမှန်ခဲ့လျှင် Apple App Store ကို အသုံးပြုနေရသော iPhone သုံးစွဲသူများမှာ Twitter Blue Tick Verification အတွက် ငွေကြေးပိုမိုကုန်ကျလာနိုင်သည်။

ကူးယူဖေါ်ပြခြင်းခွင့်မပြုပါ။
Source: Standard Co UK, Reuters
Image: Twitter

ဘရာဇီးတွင် ဒစ်ဂျစ်တယ်ငွေကြေးသုံးစွဲသော ကုမ္ပဏီများ စံချိန်တင်တိုးတက်

တောင်အမေရိကရှိ ဒစ်ဂျစ်တယ်ငွေကြေး – Cryptocurrencies သုံးစွဲသော နိုင်ငံများထဲတွင် ဘရာဇီးသည် ဦးဆောင်သည့် နိုင်ငံ ၁ နိုင်ငံအဖြစ်ပါဝင်နေသည်။
နိုင်ငံ၏ အကောက်ခွန်အာဏာပိုင်အဖွဲ့ – Receita Federal က ပြီးခဲ့သည့် အောက်တိုဘာလအတွင်း ကုမ္ပဏီပေါင်း ၄၁,၈၁၇ ခုသည် cryptos – ဒစ်ဂျစ်တယ်ငွေကြေးများဖြင့် ငွေပြောင်းလွှဲမှုများ ပြုလုပ်ခဲ့သည်ဟု ယမန်နေ့ (ဒီဇင်ဘာ ၇ ) က ထုတ်ပြန်ခဲ့သည်။

ဘရာဇီးအစိုးရသည် ၂၀၁၉ ခုနှစ်အတွင်းက ဒစ်ဂျစ်တယ်ငွေကြေးဆိုင်ရာ ဖြေလျှော့ပေးမှုနှင့် ခွင့်ပြုချက်များပါဝင်သည့် ဥပဒေပြဌာန်းပြီးနောက် နိုင်ငံအတွင်းရှိ ကုမ္ပဏီများသည် ဒစ်ဂျစ်တယ်ငွေကြေးများကို ပိုမို လွယ်လွယ်ကူကူ သုံးစွဲလာခဲ့ခြင်းလည်းဖြစ်သည်။

ဘရာဇီးဥပဒေရေးဆွဲသူများက ပြီးခဲ့သည့် သီတင်းပတ်တွင် Bitcoin ကို ငွေပေးချေရာတွင် သုံးစွဲခွင့်ပြုခြင်းနှင့်ပတ်သက်သော ပြည့်စုံသည့် စည်းမျဉ်းများကို ရေးဆွဲ ခွင့်ပြုခဲ့သည်။

လွန်ခဲ့သည့် သီတင်းပတ်အနည်းငယ်က ဖြစ်ပွားခဲ့သော ဒစ်ဂျစ်တယ်အိတ်ချိန်း – FTX နှင့် ဆက်စပ်လုပ်ငန်းများ ဒေဝါလီခံရမှုသည် ဘရာဇီးနိုင်ငံအတွင်းရှိ crypto သုံးစွဲမှုများအပေါ် သက်ရောက်မှု မရှိသလောက်ဖြစ်နေသည်ဟု Transfero Group ၏ အမှုဆောင်ချုပ်ဖြစ်သူ သီယာဂို ဆီဇာ (thiago Cesar) က CoinTelegraph သို့ ပြောကြားခဲ့သည်။

ကူးယူဖေါ်ပြခြင်းခွင့်မပြုပါ။
Source: Coindesk, CoinTelegraph, Bitcoin Magazine
Image: PYMNTS

တရုတ် BYD က ၂၀၂၃ အစောပိုင်းမှစတင်ကာ ဂျပန်တွင်လျှပ်စစ်ကားများရောင်းမည်

တရုတ်လျှပ်စစ်ကားထုတ်လုပ်ရေးလုပ်ငန်း BYD က ၎င်းတို့၏ လျှပ်စစ်ကားများကို ဂျပန်တွင် လာမည့်နှစ် အစောပိုင်းမှ စတင်ကား ဖြန့်ဖြူးရောင်းချတော့မည်ဖြစ်ကြောင်း ဂျပန်ရှိ ရုံးခွဲက ယနေ့ တနင်္လာနေ့ တွင် ထုတ်ပြန်ခဲ့သည်။

တရုတ်ကုမ္ပဏီ BYD တွင် အမေရိကန်ရင်းနှီးမြှုပ်နှံသူ သူဌေး ဝါရင်ဘတ်ဖတ်၏ ရှယ်ယာအချို့လည်း ပါဝင်လျက်ရှိပြီး ဂျပန်ဈေးကွက်တွင် လျှပ်စစ်ကားမော်ဒယ် ATTO 3 အား ၂၀၂၃ ဇန်နဝါရီ ၃၁ ရက်နေ့မှ စ၍ ရောင်းချမည်ဖြစ်သည်။
အဆိုပါ မော်ဒယ်သည် ၁ ခါ အားသွင်းလျှင် ၄၈၅ ကီလိုမီတာ အထိ မောင်းနှင်နိုင်မည်ဖြစ်ကာ တန်ဖိုးအားဖြင့် ဂျပန်ယန်း ၄.၄ သန်း (ဒေါ်လာ ၃၂,၇၃၅ ခန့်) ကျသင့်မည်ဖြစ်သည်။

၎င်းတို့ပြိုင်ဘက် ဂျပန်ကားကုမ္ပဏီ နစ်ဆန်းထုတ် လျှပ်စစ်ကား Leaf မှာ ကီလိုမီတာ ၃၂၂ အထိ မောင်းနှင်နိုင်မည်ဖြစ်ကာ ၁ စီးလျှင် ယန်း ၃.၇ သန်း ခန့် အရောင်းဈေးရှိနေသည်။

တရုတ် BYD သည် နောက်ထပ် မော်ဒယ်သစ် ၂ မျိုးကို ၂၀၂၃ နှစ်ကုန်တွင် ဂျပန်၌ မိတ်ဆက်နိုင်ရန် ကြိုးစားဦးမည်ဖြစ်ပြီး ၎င်းတို့နှင့် ချိတ်ဆက်ထားသည့် ဂျပန်ကုန်သည်အရေအတွက်မှာ လာမည့် ၂၀၂၅ အကုန်တွင် ၁၀၀ ကျော် ရရှိလာရန် ရည်မှန်းထားသည်ဟု ကုမ္ပဏီက ဆိုသည်။

ဂျပန်ကားထုတ်လုပ်ရေး တိုယိုတာသည်လည်း လျှပ်စစ်ကားထုတ်လုပ်ရေးနယ်ပယ်သို့ ဒေါ်လာ ၃၈ ဘီလျံ ရင်းနှီးမြှုပ်နှံမှုဖြင့် ဝင်ရောက်ရန်စီစဉ်နေသည်မှာ ၁ နှစ်ခန့်ရှိလာပြီဖြစ်ပြီး ၎င်းတို့အနေဖြင့် ဂျပန်ပြည်တွင်းဈေးကွက်တွင် အငှားဖြင့်သာ အသုံးပြုရန် ရည်ရွယ်ထားသည့် လျှပ်စစ်ကားမော်ဒယ် bZ4X ကို ပြီးခဲ့သည့် မေလမှ စတင်၍ အမြောက်အများ ဖြန့်ဖြူးထုတ်လုပ်နေပြီဖြစ်သည်။ အဆိုပါကားကို ၁၀ နှစ် အငှားစာချုပ်ဖြင့် ငှားရမ်းပြီး ပထမ ၄ နှစ်စာအတွက် ၁ လလျှင် ငှားခ ဂျပန်ယန်း ၁ သိန်း ၆ထောင် ခန့် ကုန်ကျမည်ဖြစ်သည်။

ကူးယူဖေါ်ပြခြင်းခွင့်မပြုပါ။
Source: Money US News, Reuters, Asia Nekkei
Image: Forbes

Tesla က ၎င်းတို့ထုတ် Semi truck များ စတင်ပို့ဆောင်နေဟုထုတ်ပြန်

လျှပ်စစ်ကားဈေးကွက်ဦးဆောင်သူ Tesla ၏ အမှုဆောင်ချုပ် အီလွန်မက်ခ်က ၎င်းတို့အနေဖြင့် ဖေါက်သည်များထံ semi truck လျှပ်စစ်ထရပ်ကားများကို စတင်ပေးပို့နေပြီဖြစ်ကြောင်း ကြာသပတေးနေ့က ပြောကြားခဲ့သည်။

Tesla ၏ Semi Truck သည် လျှပ်စစ်စွမ်းအင်ကို အပြည့်အဝအသုံးပြုမည့် Class 8 အမျိုးအစားဖြစ်ပြီး အား ၁ ကြိမ်သွင်းပြီးလျှင် ကုန်စည်အပြည့်ဖြင့် မိုင် ၅၀၀ ခရီးကို မောင်းနှင်နိုင်သည်ဟု သိရသည်။
သူဌေး အီလွန်မက်စ်ခ်က အဆိုပါပြောကြားချက်အား ယမန်နေ့က နီဗားဒါး စက်ရုံတွင်ပြုလုပ်သော အခမ်းအနားတွင် ပြောကြားခဲ့ခြင်းဖြစ်သည်။

Tesla သည် ၎င်းတို့ ထရပ်ကားအား ယာဉ်မောင်းသူထိုင်ရမည့် နေရာကို ဘယ်ဘက်၊ ညာဘက်ကပ်ထားသည့် စတီရီယာရင်ပုံစံမဟုတ်ဘဲ အလည်တည့်တည့်မှ ထိုင်မောင်းစေမည့် ပုံစံ ဒီဇိုင်း ပြုလုပ်ထားခြင်းဖြစ်သည်။
ဒီဇိုင်းပုံစံ Concept ကို ၂၀၁၇ ကတည်းက အများပြည်သူသို့ ထုတ်ပြထားခဲ့ပြီး ယခုအခါတွင် ထုတ်လုပ်ပြီးစီးသည့်ကားများကို ပေးပို့နေပြီလည်းဖြစ်သည်။

သို့သော်လည်း ထရပ်ကားများကို လျှပ်စစ်စွမ်းအင်သာ အသုံးပြု၍ ရောင်းချနေသည့် ဈေးကွက်တွင် ပြိုင်ဘက်များဖြစ်သော Volvo, Daimler နှင့် Nikola စသည့် ကုမ္ပဏီများကလည်း ထုတ်လုပ်နိုင်နေပြီဖြစ်သည်။

အီလွန်မက်စ်ခ်က Tesla ထရပ်တွင် အသုံးပြုထားသည့် နည်းပညာများကိုဂုဏ်ယူစွာ ထည့်သွင်းပြောဆိုခဲ့ပြီး ဖေါက်သည်ဖြစ်သည့် ပက်စီ အချိုရည်လုပ်ငန်းကိုလည်း ကျေးဇူးတင်ကြောင်း ပြောကြားခဲ့သည်။

ကူးယူဖေါ်ပြခြင်းခွင့်မပြုပါ။
Source: CNBC Business, Freight Waves, Tesla
Image: Tesla

လစ်သီယမ်နယ်ပယ်တွင် တရုတ်လွှမ်းမိုးနေမှု ကမ္ဘာ့နိုင်ငံများမတုံ့ပြန်နိုင်သေး

ကမ္ဘာ့လစ်သီယမ်ဘက်ထရီထုတ်လုပ်ရေးဈေးကွက်တွင် တရုတ်နိုင်ငံ၏ လွှမ်းမိုးနေမှုကို ကျန်နိုင်ငံများက လုံလောက်သည့်လျင်မြန်မှုဖြင့် မတုံ့ပြန်နိုင်သေးဟု American Lithium ၏ အမှုဆောင်ချုပ် ဆိုင်မွန်ကလာ့က် (Simon Clarke) က ပြောကြားခဲ့သည်။
တရုတ်နိုင်ငံအနေဖြင့် ကစားပွဲကို ကောင်းမွန်စွာ ကစားထားနိုင်ခဲ့ပြီး ဆယ်စုနှစ်များစွာကြာအောင် ကမ္ဘာပေါ်ရှိ အရင်းအမြစ်ကောင်းများစွာကို ထိန်းချုပ်ထားနိုင်ခဲ့သည်ဟု ဆိုင်မွန်က စီအန်ဘီစီနှင့် အင်တာဗျူးတွင် ဖြေခဲ့သည်။

လစ်သီယမ်သည် ယနေ့မျက်မှောက်ခေတ်၏ နေ့စဉ်ဘဝတွင် အရေးပါနေပြီး ဖုန်းများ၊ ကွန်ပျူတာများ၊ တက်ဘလက်များနှင့် နောက်ဆုံးတွင် လျှပ်စစ်ကားများအထိပါ လစ်သီယမ်ဘက်ထရီကို သုံးစွဲလာရပြီဖြစ်သည်။

၂၀၂၂ ကမ္ဘာ့စွမ်းအင်ဆိုင်ရာထုတ်ပြန်ချက် တွင် ကမ္ဘာတဝှမ်း လစ်သီယမ်ထုတ်လုပ်မှုစုစုပေါင်း၏ ၆၀% ကို တရုတ် ၁ နိုင်ငံတည်းက ထုတ်လုပ်နေပြီး လစ်သီယမ် – အိုင်းယွန်း ဘက်ထရီကဏ္ဍတွင် တရုတ်က ကမ္ဘာ့စက်ရုံစုစုပေါင်း၏ ၄ ပုံ ၃ ပုံ အထိ ထုတ်လုပ်နိုင်နေသည်ဟုလည်း ပါရှိသည်။

ဥရောပကော်မရှင် ဥက္ကဌ Ursula von der Leyen – အာဆူလာ က ပြီးခဲ့သည့် စက်တင်ဘာတွင်ပြောကြားခဲ့သော သူမ၏ မိန့်ခွန်းတွင် ယနေ့ကမ္ဘာ၏ ချပ်စ်ပြားလုပ်ငန်းခွင် – processing industry ၁ ခုလုံးကို တရုတ်က ထိန်းချုပ်ထားနိုင်ပြီး မြေရှားသတ္ထု (Rare earth) တွင် ၉၀% အထိ နှင့် လစ်သီယမ်တွင် ၆၀% အထိ တရုတ်တွင် လည်ပတ်ထုတ်လုပ်နေသည်ဟု ဖေါ်ပြခဲ့သည်။

အမေရိကန်ကုမ္ပဏီ Goldman Sachs အနေဖြင့် ဥရောပနှင့် အမေရိကန်ပြည်ထောင်စုတို့သည် တရုတ်လျှပ်စစ်ကား ဘက်ထရီများအပေါ်မှီခိုနေရမှုအား လာမည့် ၂၀၃၀ တွင် ရပ်တန့်နိုင်မည်ဟု ယုံကြည်ကြောင်း ထုတ်ပြန်ထားသော်လည်း ၎င်းတို့ အားထားနေသည့် ကနေဒါ – ကိဘက် (North American Lithium) ထုတ်လုပ်ရေးများမှာ ၂၀၂၃ ပထမ ၃ လပတ်တွင်မှ စတင်လည်ပတ်နိုင်မည်ဖြစ်သည်။

လွန်ခဲ့သည့် သီတင်း ၂ ပတ်က ကနေဒါ အစိုးရသည် ၎င်းတို့နိုင်ငံအတွင်းရှိ တရုတ်ကုမ္ပဏီများအား လစ်သီယမ်နှင့်ပတ်သက်သည့် ရှယ်ယာများကို ရောင်းချပေးရန် အမိန့်များထုတ်ပြန်ခဲ့သည်။

၁၉၈၅ ခုနှစ်နောက်ပိုင်း ဂျပန်ပညာရှင် အာကီရာ ယိုရှီနို၏ လစ်သီယမ်-အိုင်းယွန်း ဘက်ထရီများကို ဘေးကင်းစွာနှင့် စီးပွားရေးအရ အမြောက်အများအသုံးပြုလာနိုင်စေရန် နည်းလမ်းများ တွေ့ရှိခဲ့ပြီး ဂျပန်နိုင်ငံသည် ကမ္ဘာ့ဈေးကွက်သို့ လစ်သီယမ်တင်ပို့မှုကဏ္ဍတွင် ဦးဆောင်သူဖြစ်လာခဲ့သည်။
ထို့နောက်တွင် တောင်ကိုးရီးယားသည်လည်း ၎င်းတို့ဖွံ့ဖြိုးတိုးတက်မှုတွင် လစ်သီယမ် ဘက်ထရီများကို ရောင်းချနိုင်သူအဖြစ် ပါဝင်လာခဲ့သည်။

၁၉၉၅ တွင်မူ တရုတ်ကုမ္ပဏီ BYD ကို တည်ထောင်မည့် ဝမ် ချွန်ဖူ က ရှန်းကျန့်သို့ ရောက်ရှိလာခဲ့ပြီး ဖုန်းများနှင့် အိမ်သုံးပစ္စည်းများအတွက် လစ်သီယမ်ဘက်ထရီများကို စတင်ထုတ်လုပ်လာသည်။
တရုတ်အစိုးရ၏ မူဝါဒပိုင်းဆိုင်ရာ ပံ့ပိုးမှုများ ရရှိခဲ့ပြီးနောက် BYD နှင့် CATL ကဲ့သို့ တရုတ်ကုမ္ပဏီများ ဖွံ့ဖြိုးလာကာ ၂၀၁၅ တွင် တရုတ်နိုင်ငံသည် တောင်ကိုးရီးယားနှင့် ဂျပန် ၂ နိုင်ငံစလုံးကို လစ်သီယမ်ကဏ္ဍတွင် ကျော်ဖြတ်နိုင်ခဲ့သည်။

တရားဝင်ဖေါ်ပြထားသည့် အချက်အလက်များအရ ဆယ်စုနှစ် ၃ ခုအကြာကြိုးပမ်းမှုများအပြီး တရုတ်နိုင်ငံက လစ်သီယမ်ထုတ်လုပ်မှုအား ကမ္ဘာ့ဈေးကွက်၏ ၆၀% အထိ ထိန်းချုပ်လာနိုင်ပြီး ယင်းကို တန်ပြန်ရန် အမေရိကန်ပြည်ထောင်စုနှင့် ဥရောပနိုင်ငံများက ၂၀၃၀ အမီ ရည်မှန်းချက်များ ချမှတ်ထားကြသည်။

ကူးယူဖေါ်ပြခြင်းခွင့်မပြုပါ။
Source: CNBC Business, Nasdaq, Stock Head, C & EN, Financail Times, American Lithium Corp
Image: New Statesman

ချစ်ပ်ပြား ဆုံချက်ဖြစ်လာရန် EU ကြိုးပမ်း

ဥရောပသမဂ္ဂ European Union – EU နိုင်ငံများသည် ယူရိုငွေ ၄၃ ဘီလျံ (ဒေါ်လာ ၄၄.၄ ဘီလျံ) ကိုသုံးစွဲကာ ကုန်သွယ်ရေးဘလော့အတွင်း တပိုင်းလျှပ်ကူးပစ္စည်း (ချစ်ပ်ပြား) ထုတ်လုပ်ရေး ကဏ္ဍ ကို ရုတ်ချည်းမြန်ဆန်သည့် အလျင်ဖြင့် လုပ်ဆောင်ရန် သဘောတူခဲ့ကြသည်။
အဆိုပါသဘောတူညီမှုကို ဗုဒ္ဓဟူးနေ့ (နိုဝင်ဘာ ၂၃) က ဥရောပသမဂ္ဂအဖွဲ့ဝင်နိုင်ငံများ၏ သံများက ထောက်ခံခဲ့ကြခြင်းဖြစ်သည်ဟု သိရသည်။

EU နိုင်ငံများ၏ ဝန်ကြီးများသည် ဗုဒ္ဓဟူးနေ့သဘောတူညီချက်အား လာမည့်လ အစည်းအဝေးတွင် အတည်ပြုတံဆိပ်တုံးထုနိုင်ရန် မျှော်မှန်းထားကြသည်။
၎င်းတို့အကြား အငြင်းပွားဖွယ်ရာဖြစ်နေသည်မှာ ဥရောပသမဂ္ဂ၏ ရံပုံငွေများကို အသုံးပြုမှုအခြေအနေဖြစ်သည်။
ဗုဒ္ဓဟူးနေ့က အဖွဲ့ဝင်နိုင်ငံများသည် တပိုင်းလျှပ်ကူးပစ္စည်းများ (chips – semiconductors) အတွက် သုတေသနပြုလုပ်ရန် လျာထားသော ယူရိုငွေ သန်း ၄၀၀ ကို ကဏ္ဍပြောင်းရွှေ့နေရာချခြင်းကို သဘောမတူခဲ့ချေ။

အဘယ်ကြောင့်ဆိုသော် ချစ်ပ်ပြား ထုတ်လုပ်ရေးနယ်ပယ်နှင့်ဈေးကွက်သေးသေးကိုသာ ပိုင်ဆိုင်သည့် အဖွဲ့ဝင်နိုင်ငံများသည် အဆိုပါငွေအမြောက်အများကိုသာ အသုံးပြုပါက နိုင်ငံကြီးများဖြစ်သော ဂျာမဏီကဲ့သို့ နိုင်ငံများသာ အကျိုးစီးပွား ပိုမိုဖြစ်ထွန်းမည်ကို စိုးရိမ်နေကြခြင်းဖြစ်သည်။
ထို့ကြောင့် လိုအပ်သော ငွေကြေးကို အခြားနေရာမှ ရှာဖွေရန် အဖွဲ့ဝင်နိုင်ငံများ၏ သံအမတ်များက လိုလားနေသည်။

အဖွဲ့ဝင်နိုင်ငံများအကြား ဆွေးနွေးမှုများမှာ ဌာနအပိုင်းလိုက် ၃ ခု ဆွေးနွေးပြီးမှသာ ဥရောပပါလီမန်က အတည်ပြုမည်လည်းဖြစ်သည်။

ဥရောပသမဂ္ဂ – EU အနေဖြင့် ၂၀၃၀ နှစ် ကမ္ဘာ့ ချစ်ပ်ပြား ထုတ်လုပ်မှုစုစုပေါင်း၏ ၂၀% ကို ဥရောပသမဂ္ဂအဖွဲ့ဝင်နိုင်ငံများတွင် ထုတ်လုပ်နိုင်လိုသည့် ရည်မှန်းချက်ရှိနေသည်။
ထို့ကြောင့် ရည်ရွယ်ထားသည့် ယူရိုငွေ ၄၃ ဘီလျံ အား ချစ်ပ်ပြားထုတ်လုပ်မှုနယ်ပယ်သို့ စီးဝင်အသုံးပြုမည်ဖြစ်သည်။
ယခု စီမံကိန်းမှာ အပြီးသတ် သတ်မှတ်ချက် ထွက်ပေါ်မလာသေးသော်လည်း ချစ်ပ်ပြားထုတ်လုပ်ရေးကုမ္ပဏီများဖြစ်သည့် Intel Corp, Global Foundries Inc, STMicroelectronics NV, Infineon Technologies AG စသည်တို့က ၎င်းတို့ စက်ရုံနေရာများကို အသီးသီး ကြေညာထားပြီးဖြစ်နေသည်။

ကူးယူဖေါ်ပြခြင်းခွင့်မပြုပါ။
Source: Economic Times: India Times, Bloomberg, Europa EU
Image: The Register

ဘဝသက်တမ်းတွင် ဒေါ်လာ ၁၂၄ ဘီလျံ ကိုလှူသွားမည်ဟု ဘီဇို့စ်ပြော

အွန်လိုင်းဈေးဝယ်ရောင်းလုပ်ငန်း Amazon ကို တည်ထောင်သူ သူဌေး ဂျက်ဘီဇို့စ်သည် စီအန်အန်နှင့် တွေ့ဆုံးမေးမြန်းရာတွင် သူ၏ သက်တမ်းတလျှောက် ပိုင်ဆိုင်မှုတန်ဖိုးအများစုဖြစ်သည့် ဒေါ်လာ ၁၂၄ ဘီလျံကို လှူဒါန်းသွားမည်ဟု ပြောကြားခဲ့သည်။
Jeff Bezos – ဘိဇို့စ် အနေဖြင့် သဘာဝပတ်ဝန်းကျင်ဆိုင်ရာပြောင်းလဲခြင်းများကို အံတုရန်၊ လူမှုရေးနှင့် နိုင်ငံရေးကွဲပြားမှုများအကြား လူသားချင်းစာနာမှုများကိုပေါင်းစည်းနိုင်ရေး ကြိုးပမ်းနေသူများ စသည်တို့အား ၎င်း၏ ချမ်းသာကြွယ်ဝမှုများကို ထောက်ပံ့သွားမည်ဖြစ်ကြောင်း ကတိပြုခဲ့ခြင်းဖြစ်သည်။

ဝါရှင်တန်ဒီစီရှိ ဘိဇိုစ်၏ နေအိမ်တွင် သူ၏ လက်တွဲဖေါ် (သတင်းသမားဘဝမှ ပရဟိတအလှူရှင်ဖြစ်လာသူ) လောရင် ဆန်ချေစ်နှင့် အတူရှိနေစဉ် အင်တာဗျူးပြုလုပ်ခဲ့ခြင်းဖြစ်သည်။

၎င်းတို့စုံတွဲသည် ဂီတပညာရှင် ဒေါ်လီပါတန်အား Bezos Courage and Civility Award အဖြစ် ဒေါ်လာ သန်း ၁၀၀ ကို ယမန်နေ့က ဆုချီးမြှင့်ထားသည်။

ကူးယူဖေါ်ပြခြင်းခွင့်မပြုပါ။
Source: CNN Business, Reuters Business, BBC, The Times
Image: Wall Street Journal

နေစွမ်းအင်က ၂၀၂၂ အတွင်း အာရှနိုင်ငံများကို စရိတ်သက်သာစေခဲ့

နေရောင်ခြည်မှ ရရှိသော လျှပ်စစ်စွမ်းအင် – Solar Power Generation များကြောင့် အာရှရှိ အဓိက နိုင်ငံကြီး ၇ နိုင်ငံသည် ၂၀၂၂ ပထမ ၆ လ အတွင်း ကျောက်မီးသွေးအတွက်ကုန်ကျမည့် ဒေါ်လာ ၃၄ ဘီလျံအား ချွေတာနိုင်စေခဲ့ကြောင်း စွမ်းအင်နှင့်သန့်စင်သောလေ သုတေသနဌာန (CREA) နှင့် စွမ်းအင်ဆိုင်ရာ စီးပွားရေးနှင့် ဘဏ္ဍာရေးလေ့လာမှုအဖွဲ့ (IEEFA) က ထုတ်ပြန်ခဲ့သည်။

အဆိုပါ နိုင်ငံ ၇ နိုင်ငံမှာ တရုတ်၊ အိန္ဒိယ၊ ဂျပန်၊ တောင်ကိုးရီးယား၊ ဗီယက်နမ်၊ ဖိလစ်ပိုင်နှင့် ထိုင်းနိုင်ငံတို့ ဖြစ်သည်ဟု သိရပြီး ၎င်းတို့ထဲမှ ၅ နိုင်ငံသည် အာရှတိုက်တွင် ဆိုလာစွမ်းအင်ကို အများဆုံးတပ်ဆင်ထားကြသော နိုင်ငံများဖြစ်ကြသည်။

ကန်ဒေါ်လာ ၃၄ ဘီလျံ အထိ သက်သာခဲ့သူများတွင် တရုတ်သည် အသက်သာဆုံးနိုင်ငံဖြစ်ပြီး ၎င်း ၁ နိုင်ငံတည်းက ဒေါ်လာ ၂၁ ဘီလျံဖိုးအထိ ကျောက်မီးသွေး တင်သွင်းရမှုကို လျှော့ချနိုင်ခဲ့သည်။
နေရောင်ခြည်စွမ်းအင်သည် တရုတ်နိုင်ငံ၏ လိုအပ်သော လျှပ်စစ်ဓါတ်အား အားလုံးမှ ၅% အထိ ပါဝင်အားဖြည့်ပေးလျက်ရှိသည်။

ဂျပန်နှင့် အိန္ဒိယတို့သည်လည်း ဒေါ်လာ ၅.၆ ဘီလျံ နှင့် ဒေါ်လာ ၄.၂ ဘီလျံ အသီးသီး သက်သာခဲ့ကြသည်။

၂၀၂၀ နောက်ပိုင်း အာရှ ပစိဖိတ် ဒေသရှိ နေရောင်ခြည်စွမ်းအင် သုံးရန် သဘောတူစာချုပ်များနှင့် ပြင်ဆင်နေကြသည့် အထဲတွင် ၅၇% မှာ ဓါတ်အားများ ထုတ်လုပ်နိုင်စွမ်းရှိလာနေသည်ဟုလည်း ဆိုသည်။
လုပ်ငန်းကြီးများအတွက် PPA ဟုခေါ်သော ပြန်လည်ပြည့်ဖြိုးမြဲစွမ်းအင်များဖြစ်သည့် လေအား လျှပ်စစ် နှင့် နေစွမ်းအင်တို့အသုံးပြုကြရန် သဘောတူညီချက် ရရှိထားမှုများသည် ၂၀၂၂ တွင် အမြင့်ဆုံးအခြေအနေဖြင့် တိုးတက်လာနေသည်ဟု ဆိုပြီး ၎င်းတို့အနေဖြင့် ရုပ်ကြွင်းလောင်စာများ၊ ကျောက်မီးသွေးများ၏ ကဏ္ဍကို ပိုမိုလျှော့ချ လိုနေလျက်ရှိသည်။

ကူးယူဖေါ်ပြခြင်းခွင့်မပြုပါ။
Source: PV Tech Org, Renew Economy, Ember Climate, PV Magazine
Image: IRENA

အင်ဒိုနီးရှားက တရုတ်ထံ ဆီအုန်း တန်ချိန် ၂.၅ သန်း ရောင်းမည်

သောကြာနေ့က အင်ဒိုနီးရှားရှိ ကုမ္ပဏီ ၉ ခုသည် တရုတ်ဝယ်လက် ၁၃ ဦးထံ ဆီအုန်းတန်ချိန် ၂.၅ သန်း ရောင်းချမည့် စာချုပ်ကို ချုပ်ဆိုနိုင်ခဲ့သည်။

အဆိုပါ ဆီအုန်းထုတ်ကုန်များ၏ စုစုပေါင်းတန်ဖိုးမှာ ကန်ဒေါ်လာ ၂.၆ ဘီလျံ ရှိသည်ဟု အင်ဒိုကုန်သွယ်ရေးဌာန၏ ထုတ်ပြန်ချက်တွင် ဖေါ်ပြထားသည်။

၂ နိုင်ငံအကြား အရောင်းအဝယ်သဘောတူညီချက်မှာ သမ္မတ ဂျိုကို ဝီဒိုဒို တရုတ်ပြည်သို့ ဇူလိုင်လအတွင်း သွားလာခဲ့မှု နောက်ဆက်တွဲရလဒ်ဖြစ်ပြီး တရုတ်အစိုးရသည် ထပ်မံ၍ ဆီအုန်း (မသန့်စင်ရသေးသော) တန်ချိန် ၁ သန်းကို ဝယ်ယူတင်သွင်းဦးမည်ဟုဆိုသည်။

အင်ဒိုနီးရှားသည် တရုတ်ထံသို့ ကျောက်မီးသွေးများကို အများဆုံး တင်ပို့ ရောင်းချနေသည့် နိုင်ငံလည်းဖြစ်သည်။
ပြီးခဲ့သည့် ဩဂုတ်လက ဆိုလျှင် တရုတ်သည် အင်ဒိုနီးရှားထံမှ ကျောက်မီးသွေးတန်ချိန် ၁၅.၈၂ သန်း တင်သွင်းခဲ့ပြီး ဇူလိုင်လတင်သွင်းမှုထက် ၃၅% ပိုမိုများပြားခဲ့သည်။

ဂျာကာတာအစိုးရသည် ပို့ကုန်မြင့်တက်လာစေရေးကို အားပေးသည့်အနေဖြင့် ဇူလိုင်လ အလယ်ခန့်ကတည်းက အခွန်သက်သာခွင့်များ ပေးထားပြီး ယခု နိုဝင်ဘာ လဝက်ကျော်လျင်မူ အခွန်များ ပြန်လည် ပြဌာန်းဖွယ်ရှိနေသည်။

ကူးယူဖေါ်ပြခြင်းခွင့်မပြုပါ။
Source: Channel News Asia, Reuters Business, South China Morning Post
Image: Reuters Business

တရုတ်ထုတ်လေယာဉ် အော်ဒါအစီးရေ ၃၃၀ လက်ခံရရှိ

တရုတ်အစိုးရပိုင် လေယာဉ်ထုတ်လုပ်ရေးလုပ်ငန်းဖြစ်သော ကောမက် – Comac (The Commercial Aircraft Corporation of China, Ltd) သည် လေယာဉ်အငှားကုမ္ပဏီအများအပြားထံမှ လေယာဉ် အစီးရေစုစုပေါင်း ၃၃၀ စီး မှာယူမှုကို လက်ခံရရှိခဲ့သည်ဟု တရုတ်ပြည်တွင်းသတင်းဌာန ရိခိုင် – Yicai က ဖေါ်ပြခဲ့သည်။

ကျူးဟိုင်တွင် အင်္ဂါနေ့က တရုတ်ပြည်၏အကြီးဆုံး လေကြောင်းပြပွဲပြုလုပ်ခဲ့ရာ COMAC ကုမ္ပဏီက အဆိုပါအော်ဒါများ ရရှိခြင်းကို ပြောကြားခဲ့ခြင်းဖြစ်ပြီး အစီးရေ ၃၀၀ မှာ ကိုယ်ထည်သေးသွယ်သော ဂျက်လေယာဉ်မော်ဒယ် C919s များ ဖြစ်ပြီး အခြား အစီး ၃၀ မှာ ARJ21 ပြည်တွင်းသုံး ဂျက်လေယာဉ်များဟု ဆိုသည်။

COMAC သည် လာမည့် ဒီဇင်ဘာလတွင် ၎င်းတို့၏ ပထမဆုံး C919 လေယာဉ်အား ဖေါက်သည် လေကြောင်းလိုင်း China Eastern သို့ ပေးပို့တော့မည်ဖြစ်သည်။

လေကြောင်းပြပွဲတွင် တရုတ်လေယာဉ်ထုတ်လုပ်ရေးကုမ္ပဏီသည် အခြားအကျိုးအမြတ် ၁ ခု အနေဖြင့် ကမ္ဘာကျော် ဘိုးရင်းလေယာဉ်ထုတ်လုပ်ရေးကုမ္ပဏီနှင့် လေကြောင်းသုတေသနလုပ်ငန်းများ ပူးပေါင်းလုပ်ဆောင်သွားရန်လည်း သဘောတူညီမှုရရှိခဲ့သည်ဟု ဥရောပသတင်းဌာန EuroNews က ဖေါ်ပြခဲ့သည်။

ကူးယူဖေါ်ပြခြင်းခွင့်မပြုပါ။
Source: EuroNews, Reuters, COMAC CC, Air Data News
Image: Airline Geeks